ສະມາຄົມນັກທຸລະກິດແມ່ຍິງລາວ ຮ່ວມກັບ ສູນກາງສະຫະແມ່ຍິງລາວ ໄດ້ຈັດງານເທດສະການອາຫານລາວ ປະຈຳປີ 2019 ໃນລະຫວ່າງວັນທີ 23-26 ມັງກອນ 2019 ຢູ່ແຄມຂອງ ນະຄອນຫລວງວຽງຈັນ, ເຊິ່ງໄດ້ລວບລວມເອົາອາຫານ ທີ່ເປັນເອກະລັກສະເພາະ ຈາກບັນດາແຂວງໃນຂອບເຂດທົ່ວປະເທດ ມາວາງສະແດງ ແລະ ບໍລິການຂາຍ ໃຫ້້ມວນຊົນທັງພາຍໃນ ແລະ ຕ່າງປະເທດໄດ້ຊື້, ໄດ້ຊິມລົດຊາດອາຫານລາວ ທີ່ເປັນເອກກະລັກ ນັບແຕ່ເໜືອຮອດໃຕ້.
ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງລາວ ກ່າວໃນພິທີເປີດງານເທດສະການອາຫານ ຢ່າງເປັນທາງການ ໃນວັນທີ 23 ມັງກອນນີ້ວ່າ: ງານເທດສະການອາຫານດັ່ງກ່າວ, ມີຮ້ານວາງສະແດງທັງໝົດ 180 ຮ້ານ, ໃນນັ້ນເປັນຮ້ານອາຫານ 140 ຮ້ານ, ຮ້ານຫັດຖະກຳ-ກະສິກຳ 20 ຮ້ານ, ຮ້ານຈາກປະເທດອາຊຽນ ແລະ ສະຖານທູດ 2 ຮ້ານ ແລະ ຮ້ານທີ່ມາຈາກເຄືອຂ່າຍໜຶ່ງຕຳບົນ, ໜຶ່ງຜະລິດຕະພັນ ປະເທດໄທ 18 ຮ້ານ, ເຊິ່ງໄດ້ນຳເອົາອາຫານ, ເຄື່ອງດື່ມ, ຢາສະໝູນໄພ ແລະ ເຄື່ອງຫັດຖະກຳ-ກະສິກຳ ມາວາງສະແດງ ແລະ ບໍລິການຂາຍ ເປັນຈຳນວນຫລວງຫລາຍ.
ທ່ານ ນາງ ຈັນທະຈອນ ວົງໄຊ ຍັງໃຫ້ຮູ້ອີກວ່າ: ງານເທດສະການອາຫານລາວ ໄດ້ຈັດຂຶ້ນໃນທຸກໆປີ ນັບແຕ່ປີ 2006 ເປັນຕົ້ນມາ, ປີນີ້, ຖືວ່າເປັນປີທີ 14 ໂດຍມີຈຸດປະສົງ ເພື່ອປະກອບ ສ່ວນອານຸລັກ ຮິດຄອງປະເພນີ ແລະ ວັດທະນະທຳອັນດີງາມ ທີ່ເປັນເອກກະລັກຂອງຄົນລາວ ໄວ້ໃຫ້ຢູ່ຄູ່ຄົນລາວຕະຫລອດໄປ, ທັງເຊື່ອມໂຍງ ແລະ ເຜີຍແຜ່ສິ່ງຍອດຍິ່ງຂອງລາວ ຕໍ່ນັກທ່ອງທ່ຽວຈາກ ບັນດາປະເທດອາຊຽນ ແລະ ໃນທົ່ວໂລກ, ທັງເປັນການຕ້ອນຮັບປີທ່ອງທ່ຽວລາວ-ຈີນ ຕື່ມອີກ, ພ້ອມດຽວກັນ, ຍັງເປັນການສ້າງໂອກາດ ໃຫ້ແມ່ຍິງຜູ້ປະກອບການ ໃນຂະແໜງການປຸງແຕ່ງອາຫານ ຢູ່ທ້ອງຖິ່ນ, ຕ່າງແຂວງ ແລະ ຜູ້ລົງທຶນໃນ ສປປ ລາວ ໄດ້ເຂົ້າມາຮ່ວມວາງສະແດງ ແລະ ບໍລິການຂາຍຜະລິດຕະພັນຂອງຕົນ, ສ້າງໂອກາດໃຫ້ແມ່ຍິງ ໄດ້ສະແດງຄວາມສາມາດບົ່ມຊ້ອນ, ຫົວຄິດປະ ດິດສ້າງ ແລະ ສະຕິປັນຍາຂອງຕົນ ໃນການປຸງແຕ່ງອາຫານລາວ, ທັງໄດ້ແລກປ່ຽນປະສົບການ ໃນການປຸງແຕ່ງອາຫານລາວ ແລະ ສົ່ງເສີມແມ່ຍິງຜູ້ປະກອບການ ຂະແໜງການຜະລິດກະສິກຳ, ຫັດຖະ ກຳ, ອຸດສາຫະກຳປຸງແຕ່ງ, ໂຮງແຮມ ແລະ ຮ້ານອາຫານ ມີບົດບາດໃນການສ້າງ ຜະລິດຕະພັນຂອງຕົນໃຫ້ເປັນສິນຄ້າ ສາມາດຕອບສະໜອງ ຕາມຄວາມຕ້ອງການ ຂອງຕະຫລາດໃນຍຸກປັດຈຸບັນ.
ທີ່ມາ: ຂປລ