ແຂວງສະຫວັນນະເຂດຮ່ວມກັບສະຖານກົງສຸນໃຫຍ່ໄທ ປະຈຳແຂວງສະຫວັນນະເຂດ ຈະຈັດມະຫະກຳການແຂ່ງຂັນການແລ່ນວິບາກ (Trail Running) ໂດຍເປີດແຫຼ່ງສິລະປະ, ວັດທະນະທຳ ແລະ ທຳມະຊາດອັນຂຽວສົດງົດງາມຂອງແຂວງໃຫ້ບັນດານັກແລ່ນໄດ້ປະຊັນຄວາມສາມາດ.
ທ່ານ ວໍຣະວຸດ ພົງປຣະພາພັນ ກົງສຸນໃຫຍ່ປະຈຳແຂວງສະຫວັນນະເຂດເປີດເຜີຍວ່າສະຖານກົງສຸນໃຫຍ່ ຈະຮ່ວມກັບແຂວງສະຫວັນນະເຂດຈັດການແຂ່ງຂັນແລ່ນມາຣາທອນ “ສະຫວັນນະເຂດ Trail” ໃນວັນທີ 31 ມີນາ 2019 ໃນພື້ນທີ່ປ່າສະຫງວນດົງນາຕາດອັນອຸດົມສົມບູນ ໂດຍມີຈຸດເລີ່ມຕົ້ນແລະສິ້ນສຸດທີ່ບໍລິເວນພະທາດອີງຮັງ ເຊິ່ງເປັນພະທາດຄູ່ບ້ານຄູ່ເມືອງຂອງແຂວງ ສະຫວັນນະເຂດ.
“ການແຂ່ງຂັນແລ່ນມາຣາທອນຄັ້ງນີ້ ເປັນຄັ້ງທຳອິດໂດຍການຮ່ວມມືຈາກທຸກພາກສ່ວນທັງພາກລັດແລະເອກະຊົນຂອງລາວ-ໄທ ເພື່ອປະຊາສຳພັນແລະສົ່ງເສີມການທ່ອງທ່ຽວ ລວມເຖິງເຮັດໃຫ້ປະຊາຊົນຂອງທັງສອງປະເທດມີຄວາມໃກ້ຊິດກັນຫຼາຍຂຶ້ນຕາມນະໂຍບາຍການສົ່ງເສີມການທ່ອງທ່ຽວລາວ-ໄທແບບເຊື່ອມໂຍງ ຕາມແນວຄວາມຄິດ 2 ປະເທດ 1 ຈຸດໝາຍປາຍທາງ (Two Countries, One Destination) ຂອງລັດຖະບານ ລາຍໄດ້ຫຼັງຈາກຫັກຄ່າໃຊ້ຈ່າຍທັງໝົດຈະນຳເອົາໄປໃຊ້ໃນການບູລະນະສ້ອມແປງຫຼັງຄາສາລາທີ່ວັດໜອງລຳຈັນ ເມືອງຈຳພອນ ແຂວງສະຫວັນນະເຂດ”.
ການແຂ່ງຂັນຈະແບ່ງເປັນ 3 ໄລຍະທາງໄດ້ແກ່: 30 ກິໂລແມັດ, 10 ກິໂລແມັດ ແລະ 5 ກິໂລແມັດ ເຊິ່ງຜູ້ສົນໃຈສາມາດເລືອກປະເພດເຂົ້າຮ່ວມການແຂ່ງຂັນໄດ້ຕາມຄວາມສາມາດຂອງຕົນເອງ.
ເສັ້ນທາງການແຂ່ງຂັນຈະແລ່ນຜ່ານໜອງຫຼົ່ມທີ່ອຸດົມສົມບູນໄປດ້ວຍພືດພັນຕົ້ນໄມ້ນ້ອຍໃຫຍ່ແລະນົກປ່າຫຼາຍໆພັນ ລະຫວ່າງທາງກ່ອນໄປເຖິງໜອງກົ່ມ ເຊິ່ງເປັນຈຸດທີ່ສອງຈະຜ່ານເສັ້ນທາງທີ່ທ້າທາຍ ນັກແລ່ນພໍສົມຄວນເພາະຫນ້າພື້ນດິນເປັນດິນຊາຍທີ່ແລ່ນລຳບາກຍາກຫຼາຍຂຶ້ນ ແຕ່ກໍ່ຈະມ່ວນຊື່ນໄປກັບທຳມະຊາດຂອງທົ່ງນາ, ຕົ້ນໄມ້ໃບຫຍ້າ ແລະ ວິຖີຊີວິດຂອງຄົນແຖວນັ້ນ ຜ່ານໜອງກົ່ມຈະເປັນເສັ້ນທາງໄປໜອງເຕົ່າເຊິ່ງເປັນໜອງນໍ້າສຸດທ້າຍກ່ອນທີ່ຈະຮອດຈຸດສິ້ນສຸດທີ່ພະທາດອີງຮັງ ເສັ້ນທາງໄປໜອງເຕົ່າເປັນເສັ້ນທາງທີ່ເຕັມໄປດ້ວຍອຸປະສັກທຳມະຊາດທີ່ຕ້ອງຜ່ານຜ່າທັງການໂດດຂ້າມຂອນໄມ້ໃຫຍ່ທີ່ຂວາງທາງຢູ່ ແລະລຸຍແມ່ນໍ້າລຳທານໃສພາຍໃຕ້ບັນຍາກາດອັນຮົ່ມເຢັນ.
ພື້ນທີ່ໜອງເຕົ່າເປັນສັນຍາລັກແຫ່ງຄວາມສຳພັນອັນດີງາມລະຫວ່າງລາວ-ໄທ ເນື່ອງຈາກວ່າເປັນທີ່ຕັ້ງຂອງສູນພັດທະນາແລະບໍລິການກະສິກຳ-ປ່າໄມ້ ເຊິ່ງເປັນໂຄງການຮ່ວມມືທີ່ສົມເດັດພະເທບຣັດຕະນະຣາດຊະສຸດາສະຫຍາມບໍຣົມຣາດຊະກຸມານ ພະລາຊະທານໃຫ້ແກ່ລັດຖະບານ ສປປ ລາວ ເພື່ອເປັນສູນການຮຽນຮູ້ດ້ານການກະເສດ.
ການແຂ່ງຂັນແລ່ນມາຣາທອນໃນຄັ້ງນີ້ ນອກຈາກຈະເປັນເຄື່ອງໝາຍຂອງການຮ່ວມມືຮ່ວມໃຈຂອງທຸກພາກສ່ວນທີ່ຕ້ອງການສະໜັບສະໜູນແຂວງສະຫວັນນະເຂດໃນດ້ານການປະຊາສຳພັນແລະກະຕຸ້ນການທ່ອງທ່ຽວຂອງແຂວງໃຫ້ຄຶກຄື້ນແລ້ວ ຍັງຖືວ່າເປັນງານບຸນໃຫຍ່ທີ່ຄ່າສະໝັກຂອງຜູ້ເຂົ້າຮ່ວມການແຂ່ງຂັນຈະນຳໄປໃຊ້ໃນການບູລະນະສ້ອມແປງສາລາຂອງວັດໜອງລຳຈັນອີກດ້ວຍ.
ດ້ວຍເສັ້ນທາງທີ່ຍາກລຳບາກ ແຕ່ເຕັມໄປດ້ວຍວັດຖຸປະສົງອັນງົດງາມ ນັກແລ່ນສາຍແຂງ ແລະໃຈບຸນບໍ່ຄວນພາດໂອກາດນີ້.
ທີ່ມາ: ໄສະຖານກົງສຸນໃຫຍ່ໄທ ປະຈຳແຂວງສະຫວັນນະເຂດ