ກອງປະຊຸມສະຫລຸບວຽກງານຕ້ານການຄ້າມະນຸດປະຈຳປີ 2018 ແລະ ວາງທິດທາງແຜນງານປີ 2019 ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທັງເປັນປະທານຄະນະກຳມະການຕ້ານການຄ້າມະນຸດລະດັບຊາດ ພ້ອມດ້ວຍພາກສ່ວນກ່ຽວຂ້ອງຕ່າງໆເຂົ້າຮ່ວມ.
ທ່ານ ເພັງສະພັນ ທິບພະວົງໄຊ ຮອງຫົວໜ້າກົມໃຫຍ່ຕຳຫລວດ, ຫົວໜ້າກອງເລຂາຄະນະກຳມະການຕ້ານການຄ້າມະນຸດລະດັບຊາດ ໄດ້ລາຍງານໃຫ້ຮູ້ວ່າ: ໃນໄລຍະຜ່ານມາ, ຄະນະກຳມະການຕ້ານການຄ້າມະນຸດລະດັບຊາດທຸກຂັ້ນໄດ້ເອົາໃຈໃສ່ຜັນຂະຫຍາຍແຜນງານໃນວຽກງານດັ່ງກ່າວຢ່າງຕັ້ງໜ້າ ໂດຍສະເພາະໄດ້ສ້າງ ແລະ ປັບປຸງນິຕິກຳຕ່າງໆໃນການຕ້ານການຄ້າມະນຸດໃຫ້ມີປະສິດທິຜົນ. ພ້ອມນີ້ ໄດ້ເອົາໃຈໃສ່ລົງຊຸກຍູ້ຕິດຕາມການຈັດຕັ້ງປະ ຕິບັດດຳລັດ 245/ນຍ ໃນຂອບເຂດທົ່ວປະເທດໃຫ້ມີປະສິດທິພາບ. ໄປຄຽງຄູ່ກັນນັ້ນ ໄດ້ເອົາໃຈໃສ່ວຽກງານໂຄສະນາປູກຈິດສຳນຶກໃຫ້ພະນັກງານ, ທະຫານ, ຕຳຫລວດ ຕະຫລອດຮອດປະຊາຊົນບັນດາເຜົ່າ ໄດ້ຮັບຮູ້ເຂົ້າໃຈຢ່າງກວ້າງຂວາງຕໍ່ຜົນຮ້າຍ ແລະ ໄພອັນຕະລາຍຈາກການຄ້າມະນຸດ ແລະ ມີຄວາມຕື່ນຕົວສະກັດກັ້ນບັນຫາດັ່ງກ່າວໃຫ້ຫລຸດລົງເທື່ອລະກ້າວ.
ທີ່ມາ: ໜັງສືພິມ ລາວພັດທະນາ