ທີ່ຫໍວັດທະນະທໍາແຫ່ງຊາດ ໄດ້ຈັດພິທີສະຫຼຸບປີທ່ອງທ່ຽວລາວ 2018 ໂດຍເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຊີ້ນໍາລະດັບຊາດໃນການຈັດປີທ່ອງທ່ຽວລາວ 2018 ມີບັນດາລັດຖະມົນຕີ ຮອງລັດຖະມົນຕີ ຫົວໜ້າກົມ ຮອງກົມ ຫົວ ໜ້າພະແນກ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວທົ່ວປະເທດ ແລະ ພາກສ່ວນກ່ຽວຂ້ອງເຂົ້າຮ່ວມ.
ຜ່ານການເປີດປີທ່ອງທ່ຽວແມ່ນໄດ້ຮັບຜົນສໍາເລັດໂດຍໃນປີ 2018 ມີຈໍານວນນັກທ່ອງທ່ຽວເຂົ້າມາຢ້ຽມຢາມ ສປປ ລາວ ຈໍານວນ 4.186.432 ເທື່ອຄົນ ເຊິ່ງເພີ່ມຂຶ້ນ 8,2% ເມື່ອທຽບໃສ່ປີ 2017 ແລະ ສ້າງລາຍຮັບເຂົ້າປະເທດໄດ້ 755.342.151 ໂດລາສະຫະລັດ ຫຼື ປະມານ 6 ພັນຕື້ກວ່າກີບ ເພີ່ມຂຶ້ນ 17% ທຽບໃສ່ປີ 2017 ພ້ອມນີ້ກໍ່ມີຫຼາຍກຸ່ມຕະຫຼາດທ່ອງທ່ຽວທີ່ເພີ່ມຂຶ້ນເຊັ່ນ: ກຸ່ມຕະຫຼາດອາຊີປາຊີຟິກ ເພີ່ມຂຶ້ນ 8,4% ມີອັດຕາສ່ວນກວມເອົາ 94,16 % ກຸ່ມຕະຫຼາດເອີຣົບ ເພີ່ມຂຶ້ນ 3% ມີອັດຕາສ່ວນ 3,96% ກຸ່ມຕະຫຼາດອາເມຣິກາ ເພີ່ມຂຶ້ນ 7,5% ມີອັດຕາສ່ວນ 1,65% ຂອງຈໍານວນນັກທ່ອງທ່ຽວທີ່ເຂົ້າມາທ່ຽວລາວ ມີພຽງກຸ່ມປະ ເທດ ອາຟຣິກກາ ແລະ ຕາເວັນອອກກາງທີ່ມີອັດຕາຫຼຸດ ລົງ 0,5% ແຕ່ກໍ່ກວມເອົາອັດຕາ ສ່ວນພຽງ 0,22% ເທົ່ານັ້ນ ຂອງຈໍານວນນັກທ່ອງທ່ຽວທີ່ເຂົ້າມາທ່ຽວລາວ.
ສໍາລັບຜົນໄດ້ຮັບຈາກການຈັດປີທ່ອງທ່ຽວລາວ ໄດ້ເຮັດໃຫ້ທຸກພາກສ່ວນໃນສັງຄົມໄດ້ຮັບຮູ້ ແລະ ມີສ່ວນຮ່ວມໃນການພັດທະ ນາ ແລະ ສົ່ງເສີມການທ່ອງທ່ຽວລາວ ພາກທຸລະກິດໄດ້ປະ ກອບສ່ວນຢ່າງຕັ້ງໜ້າເຂົ້າໃນການລົງທຶນ ພັດທະນາການທ່ອງທ່ຽວຂອງລາວ ຕາມແນວທາງນະໂຍບາຍຂອງລັດຄື:ສົ່ງເສີມການທ່ອງ ທ່ຽວທາງດ້ານທໍາມະຊາດ ປະຫວັດສາດ ແລະ ວັດທະນະທໍາ ອັນໄດ້ເຮັດໃຫ້ວຽກງານການທ່ອງທ່ຽວໄດ້ກາຍເປັນວຽກງານລວມຂອງທຸກຂະແໜງການ ແລະ ທ້ອງຖິ່ນໃນທົ່ວປະເທດຢ່າງແທ້ຈິງ ປະກອບສ່ວນສ້າງເງື່ອນໄຂ ແລະ ທ່ວງທ່າອັນດີໃຫ້ແກ່ການເປີດປີທ່ອງທ່ຽວລາວ-ຈີນ 2019.
ໃນພິທີໄດ້ມອບລາງວັນການພັດທະນາການທ່ອງທ່ຽວດີເດັ່ນ ແລະ ຍືນຍົງຈຳນວນ 127 ລາງ ວັນ ໃນນີ້ ສະຖານທີ່ທ່ອງທ່ຽວ ລວມມີ 16 ລາງວັນ ໂຮງແຮມ ມີ 19 ລາງວັນ ຣີສອດ ມີ 6 ລາງວັນ ເຮືອນພັກແຮມ ມີ 5 ລາງວັນ ບໍລິສັດທ່ອງທ່ຽວ ມີ 18 ລາງ ວັນ ພະນັກງານນຳທ່ຽວ 18 ລາງວັນ ຮ້ານອາຫານ 24 ລາງວັນ ການທ່ອງທ່ຽວແບບປະຊາຊົນມີສ່ວນຮ່ວມ 5 ລາງວັນ ເຮືອນພັກແຮມປະຊາຊົນ ມີ 5 ລາງວັນ ແລະ ພາກສ່ວນ ແລະ ບຸກຄົນອຸປະຖຳປີທ່ອງທ່ຽວ 2018 ມີ 11 ລາງວັນ.
ທີ່ມາ: ວຽງຈັນໃໝ່