ເຂດເສດຖະກິດພິເສດ (ຂພສ) ບຶງທາດຫຼວງ ໄດ້ມີການລົງມືກໍ່ສ້າງເສັ້ນທາງຕັດຜ່ານມາຈາກ4 ແຍກໄຟແດງ ໂພນທັນ-ບ້ານໂນນຫວາຍ ຄວາມຍາວປະມານ 2,6 ກິໂລແມັດມີ 3 ເລນ ຂຶ້ນ-ລ່ອງ ຄາດວ່າຈະໃຫ້ສຳ ເລັດຊ່ວງປີໃໝ່ລາວ, ສ່ວນອີກ 2 ເສັ້ນແມ່ນເປັນແຜນຕໍ່ໄປ ແນວໃດກໍ່ຕາມເສັ້ນທາງທັງ 3 ເສັ້ນຈະສຳເລັດພາຍໃນປີ 2019 ນີ້ແນ່ນອນເພື່ອສະຫຼອງສະຫຼອງປີທ່ອງທ່ຽວ ລາວ-ຈີນ ໃນເຂດດັ່ງກ່າວໄປພ້ອມກັບການຈັດເທດສະການໂຄມໄຟທີ່ວ່າກັນວ່າຈະຈັດໃຫ້ອະລັງການ.
ທ່ານ ສົມກຽດ ສີຫາລາດ ຮອງຫົວໜ້າຄະນະຄຸ້ມຄອງເຂດເສດຖະກິດພິເສດ, ນະຄອນຫຼວງວຽງຈັນ ກ່າວວ່າ: ເຂດເສດຖະກິດພິເສດບຶງທາດຫຼວງໄດ້ລົງມຶກໍ່ສ້າງເສັ້ນທາງທີ 1 ມາແຕ່ທ້າຍປີ 2018 (ຈາກທັງໝົດທີ່ມີ 3 ເສັ້ນທາງ) ນັບຈາກທາງເຂົ້າເຂດໃຫ້ອອກໄປຊອດບ້ານໂນນຫວາຍ, ໂດຍມີຄວາມຍາວປະມານ 2 ກິໂລແມັດກວ່າ ປະກອບດ້ວຍ 2 ຂົວຂ້າມຖືກອອກແບບມາໃຫ້ປູດ້ວຍຢາງອັດສະຟານກ້ວາງ 36 ແມັດ ມີເສັ້ນຂຶ້ນ 3 ເລນ ແລະ ເສັ້ນລ່ອງ 3 ເລນ ປັດຈຸບັນວິຊາການຮັບເໝົາກຳລັງເລັ່ງກໍ່ສ້າງຄາດຈະໃຫ້ສຳເລັດກ່ອນປີໃໝ່ລາວທີ່ຍັງເຫຼືອອີກປະມານ 2 ເດືອນກວ່າ.
ພາຍຫຼັງກໍ່ສ້າງເສັ້ນທາງທີ 1 ສຳເລັດແລ້ວກໍ່ຈະສືບຕໍ່ສ້າງເສັ້ນທາງ 2 ຈາກບໍລິເວນເຂດຕະຫຼາດທີ່ກຳລັງມີການຄ້າຂາຍຄືກຄື້ນແຄມໜອງອອກໄປຫາເສັ້ນທາງບ້ານດອນກອຍ-ເມືອງນ້ອຍ ໂດຍຈະມີຄວາມຍາວປະມານ 400 ແມັດ ກວ້າງ 24 ແມັດ ແລະ ເສັ້ນທາງທີ 3 ຈາກເຂດລຽບໄປຫາສູນການຄ້າ ລາວ-ໄອເຕັກ-ອາຊຽນມໍ ຍາວປະມານ 760 ແມັດ ກວ້າງ 24 ແມັດ ທັງໝົດ 3 ເສັ້ນແມ່ນຈະກໍ່ສ້າງໃຫ້ສຳເລັດພາຍໃນປີ 2019 ແລະ ຈະມີການສະເຫຼີມສະຫຼອງປີທ່ອງທ່ຽວ ລາວ-ຈີນ ທີ່ຈະມີການຈັດເທດສະການໂຄມໄຟ, ປະດັບປະດາໄປດ້ວຍແສງສີສຽງຢ່າງອະລັງການຈາກ ບໍລິສັດ ຈືກຸ້ງ ຈາກ ສປ ຈີນ ທີ່ໄດ້ເຊັນສັນຍາກັບຜູ້ພັດທະນາບຶງທາດຫຼວງກ່ອນໜ້າແລ້ວ.
Hits: 14
