ໃນວັນທີ 19 ກຸມພາ 2019 ທີ່ນະຄອນຫຼວງວຽງຈັນ ທະນາຄານແຫ່ງ ສປປລາວ ຮ່ວມກັບທະນາຄານແຫ່ງປະເທດໄທໄດ້ຈັດຕັ້ງການສຳມະນາພາຍໃຕ້ຫົວຂໍ້ “ພາວະຄວາມເປັນຜູ້ນຳແລະການສື່ສານ” ໂດຍການໃຫ້ກຽດເຂົ້າຮ່ວມຂອງທ່ານສອນໄຊສິດພະໄຊຜູ້ວ່າການທະນາຄານແຫ່ງ ສປປລາວແລະທ່ານໄພບູນກິດຕິສີຣິກັງວານຮອງຜູ້ວ່າການທະນາຄານແຫ່ງປະເທດໄທແລະ ມີນັກສຳມະນາກອນທີ່ເປັນພະນັກງານຂັ້ນນຳຈາກກົມ/ທຽບເທົ່າກົມຂອງທະນາຄານແຫ່ງ ສປປລາວ – ບັນດາທະນາຄານລັດ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານໄພບູນກິດຕິ ສີຣິກັງວານ ຮອງຜູ້ວ່າການທະນາຄານແຫ່ງປະເທດໄທແລະ ທ່ານນາງອາລິສຣາ ມະຫາສັນທະນາ ຜູ້ຊ່ວຍຜູ້ວ່າການ (ທີ່ປຶກສາ) ທະນາຄານແຫ່ງປະເທດໄທໄດ້ນຳສະເໜີກ່ຽວກັບບັນຫາພາວະຄວາມເປັນຜູ້ນຳ ແລະ ການສື່ສານທີ່ໄດ້ສ່ອງແສງໃຫ້ເຫັນພາວະຂອງຜູ້ນຳແລະຜູ້ຕາມໃນອົງກອນໂດຍສະເພາະກໍ່ແມ່ນການບໍລິຫານອົງກອນ, ບໍລິຫານຄົນ, ບໍລິຫານວຽກ, ບໍລິຫານເງິນ…ແລະການສື່ສານຢ່າງຖືກຕ້ອງຊຶ່ງເປັນນິມິດໝາຍທີ່ດີທີ່ພະນັກງານບໍລິຫານຂັ້ນຕ່າງໆໄດ້ຮັບຮູ້, ເຂົ້າໃຈແລະປະຕິບັດໃຫ້ສອດຄ່ອງກັບອົງກອນຕົນແລະການສຳມະນາໃນຫົວຂໍ້ດັ່ງກ່າວແມ່ນນອນໃນຂອບການຮ່ວມມືລະຫວ່າງທະນາຄານແຫ່ງ ສປປລາວແລະທະນາຄານແຫ່ງປະເທດໄທຊຶ່ງໄດ້ເປັນການສອດຄ່ອງກັບຍຸກແຫ່ງການພັດທະນາແລະການເຊື່ອມໂຍງພາກພື້ນແລະສາກົນ; ສະນັ້ນ, ມັນຈຶ່ງໄດ້ເລັ່ງທວງໃຫ້ບັນດາພະນັກງານບໍລິຫານຂັ້ນຕ່າງໆຈະຕ້ອງເຂົ້າໃຈຢ່າງເລິກເຊິ່ງຕໍ່ບັນຫາດັ່ງກ່າວເພາະມັນເປັນປັດໃຈທີ່ມີຄວາມສຳຄັນໃນການຂັບເຄື່ອນແລະພັດທະນາວຽກງານລວມຂອງແຕ່ລະຂົງເຂດ ເພື່ອໃຫ້ບັນລຸຜົນສຳເລັດຢ່າງມີປະສິດທິພາບສູງ.
ໃນໂອກາດດັ່ງກ່າວ; ບັນດານັກວິທະຍາກອນແລະນັກສຳມະນາກອນກໍ່ໄດ້ມີການຖາມ – ຕອບຫຼາຍບັນຫາພ້ອມທັງມີກິດຈະກຳຕ່າງໆ ໂດຍສະເພາະແມ່ນການນຳສະເໜີຄວາມຮູ້ຜ່ານວິດີໂອທີ່ປິ່ນອ້ອມຫົວຂໍ້ “ພາວະຄວາມເປັນຜູ້ນຳແລະການສື່ສານ”; ຜ່ານການສຳມະນາໃນເທື່ອນີ້ ໄດ້ເຮັດໃຫ້ບັນດາພະນັກງານຂັ້ນນຳຈາກກົມ/ທຽບເທົ່າກົມຂອງທະນາຄານແຫ່ງ ສປປລາວ – ບັນດາທະນາຄານລັດສາມາດກຳໄດ້ແໜ້ນ ແລະຈະເອົາໄປນຳໃຊ້ຢ່າງປະດິດສ້າງເພື່ອໃຫ້ເກີດປະໂຫຍດສູງສຸດຕໍ່ອົງກອນຂອງຕົນໃນຕໍ່ໜ້າ.