ມູນຄ່າການຄ້າສອງປະເທດ ລາວ-ຫວຽດນາມ ໃນປີ 2018 ບັນລຸ 1 ຕື້ໂດລາ, ເພີ່ມຂຶ້ນ 13% ທຽບໃສ່ປີ 2017 ລື່ນຄາດໝາຍຕາມການຕົກລົງຂອງສອງລັດຖະບານ ແລະ ໃນປີ 2019 ນີ້, ກໍໄດ້ວາງຄາດໝາຍສູ້ຊົນເພີ່ມຂຶ້ນ 10% ຂຶ້ນໄປ, ການລົງທຶນຂອງລັດວິສາຫະກິດຫວຽດ ນາມ ຢູ່ ລາວ ຈັດຢູ່ໃນອັນດັບ 3 ໃນຈໍານວນບັນດາປະເທດ ແລະ ເຂດແຄວ້ນ ທີ່ມີວິສາຫະ ກິດມາລົງທຶນຢູ່ລາວ. ປັດຈຸບັນ, ການລົງທຶນຂອງບັນດາວິສາຫະກິດຫວຽດນາມ ຢູ່ລາວ ມີທັງໝົດ 409 ໂຄງການ, ມູນຄ່າການລົງທຶນທັງໝົດ 4,1 ຕື້ໂດລາສະຫະລັດ.
ຂະແໜງພະລັງງານໄຟຟ້າ ເປັນຂະແໜງການໜຶ່ງ ທີ່ມີຄວາມບົ່ມຊ້ອນຂອງການຮ່ວມມືສອງຝ່າຍ ທີ່ຈະເຮັດໃຫ້ມູນຄ່າການຄ້າຂອງສອງປະເທດ ປະຕິບັດໄດ້ລື່ນຄາດໝາຍ. ໃນນີ້, ເຂື່ອນໄຟຟ້າເຊຂະໝານ 1 ແລະ ເຊຂະໝານຊານໄຊ ໄດ້ດຳເນີນການຜະລິດ ຂາຍກະແສໄຟຟ້າໄປຫວຽດນາມ ແລະ ສ້າງລາຍຮັບເຂົ້າງົບປະມານໃຫ້ແກ່ ສປປ ລາວ ຈຳນວນໜຶ່ງ. ພ້ອມກັນນີ້, ການຮ່ວມກັນຈັດຕັ້ງຜັນຂະຫລາຍໂຄງການຮ່ວມມືພັດທະນາ ທ່າທຽບເຮືອຫວຸງອ່າງ 1, 2, 3 ແລະ ການຕົກລົງລາຄາຊື້-ຂາຍໄຟຟ້າ, ເຊິ່ງຈະເຮັດໃຫ້ມູນຄ່າການຄ້າສອງຝ່າຍເພີ່ມຂຶ້ນອີກ ຫລາຍສົມຄວນ.
ທີ່ມາ: ຂປລ
