ລັດຖະບານ ລາວ-ໄທ ລົງນາມເຊັນສັນຍາກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 ປາກຊັນ-ບຶງການມູນຄ່າກໍ່ສ້າງຢູ່ລະຫວ່າງ 3.930 ລ້ານບາດ ເປັນທຶນຮ່ວມສອງຝ່າຍ ໂດຍມີກໍານົດລົງມືກໍ່ສ້າງໃນກາງປີ 2019 ນີ້.
ທ່ານ ໄລທອງ ພົມມະວົງ ຜູ້ປະສານງານໂຄງການ ກົມຂົວທາງ ກະຊວງ ໂຍທາທິການ ແລະ ຂົນສົ່ງ ເປີດເຜີຍວ່າ: ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 ຈາກ ປາກຊັນ, ແຂວງ ບໍລິຄຳໄຊ – ຈັງຫວັດ ບຶງການປະເທດໄທ ມູນຄ່າການກໍ່ສ້າງ 3.930 ລ້ານບາດ ມີຄວາມຍາວ 1.350 ແມັດ ຄາດຈະລົງມືກໍ່ສ້າງໃນເດືອນ ມິຖຸນາ 2019 ນີ້ ຕາມແຜນແມ່ນຈະໃຊ້ເວລາໃນການກໍ່ສ້າງ 36 ເດືອນ ຫຼື ປະມານ 3 ປີກໍຄືປີ 2021 ຈິ່ງຈະສໍາ ຕອນນີ້ເຫຼືອພຽງແຕ່ການອະນຸມັດງົບປະມານເທົ່ານັ້ນ.
ໂຄງການກໍ່ສ້າງຂົວມິດຕະພາບແຫ່ງທີ 5 ບົນພື້ນຖານຜົນປະໂຫຍດສອງຝ່າຍທີ່ຈະອໍານວຍຄວາມສດວກສະບາຍໃນການໄປມາຫາສູ່ລະຫວ່າງປະເທດເພາະຜ່ານມາ ປາກຊັນ-ບຶງການ ໄປມາ ຫາສູ່ກັນແມ່ນເດີນທາງນ້ຳດ້ວຍເຮືອຈັກ ແລະ ເຮືອບັກ ຫາກຂົວແຫ່ງດັ່ງກ່າວສຳເລັດຈະເຮັດໃຫ້ການຂົນສົ່ງສິນຄ້າສະດວກຫຼາຍຂຶ້ນ ໂດຍສະເພາະແມ່ນການຂົນສົ່ງສິນຄ້າຈາກປະເທດໄທທີ່ຈະໃຊ້ຂົວແຫ່ງນີ້ເພື່ອນຳສິນຄ້າຂ້າມໄປຍັງປະເທດຫວຽດນາມຈະຊ່ວຍຫຼຸດຜ່ອນຕົ້ນທຶນຂອງການຂົນສົ່ງ ແລະ ປະຢັດເວລາໄດ້ຫຼາຍສົມຄວນ.
ສຳລັບຂົວມິດຕະພາບແຫ່ງທີ 1 ລາວ-ໄທ ມີຄວາມຍາວ 1.170 ແມັດ ເລີ່ມກໍ່ສ້າງປີ 1991-1994 ເຊື່ອມຈອດລະຫວ່າງ ນະຄອນຫຼວງ-ຈັງຫວັດໜອງຄາຍ, ຂົວມິດຕະພາບ ແຫ່ງທີ 2 ລາວ-ໄທ ສະຫວັນນະເຂດ-ມຸກດາຫານ ຍາວ 2.050 ແມັດ ໄລຍະກໍ່ສ້າງ 2003-2006, ຂົວມິດຕະພາບ ແຫ່ງທີ 3 ລາວ-ໄທ ຄຳມ່ວນ-ນະຄອນພະນົມ ຍາວ 780 ແມັດ ກໍ່ສ້າງປີ 2009-2012 ແລະ ຂົວມິດຕະພາບແຫ່ງທີ 4 ລາວ-ໄທ ຫ້ວຍຊາຍ ແຂວງບໍ່ແກ້ວ-ຊຽງຂອງ ຈັງຫວັດຊຽງຣາຍ ມີຄວາມຍາວ 2.480 ແມັດ ເປີດນໍາໃຊ້ໃນປີ 2013 ຂົວແຫ່ງນີ້ຈະຜ່ານເສັ້ນທາງ R3 ເຊື່ອມຈອດ ໄທ-ລາວ-ຈີນ ຈາກຊຽງຂອງ-ບໍ່ແກ້ວ-ຫຼວງນ້ຳທາ-12 ພັນນາ ສປ ຈີນ.