ງານທ໊ອບໄທແບຣນ ຂອງທຸກໆປີ ນອກຈາກຈະມີສິນຄ້າຈາກປະເທດໄທແລ້ວ ຍັງມີສິນຄ້າຈາກ ສປປ ລາວ ອີກດ້ວຍ ເຊິ່ງສິນຄ້າຈາກປະເທດລາວສ່ວນໃຫ່ຍແມ່ນປະເພດສິນຄ້າ ຫັດຖະກຳ, ເຄື່ອງສີມື, ຂອງກິນ, ຢາສະຫມຸນໄພ, ຜ້າຝ້າຍ ແລະ ຜ້າໄຫມລາວ ສິນຄ້າຈາກລາວ ແມ່ນຈະເນັ້ນໃຊ້ວັດຖຸດິບຈາກການເກັບຊື້ນຳປະຊາຊົນ ເພື່ອໃຫ້ປະຊາຊົນ ມີລາຍຮັບເພີ່ມຂຶ້ນ ແລະ ບາງຜະລິດຕະພັນແມ່ນໃຫ້ປະຊາຊົນມີສ່ວນຮ່ວມໃນການຜະລິດ ເຊິ່ງປີນີ້ມີບູ໊ດສິນຄ້າລາວເຂົ້າຮ່ວມ 20 ກວ່າບູ໊ດ.
ໜຶ່ງໃນ ເຈົ້າຂອງຮ້ານ Huk Hom ໄດ້ບອກກັບເຮົາວ່າ: ຜ້າຝ້າຍຂອງຮ້ານເຮົາແມ່ນເຂັນມື 100% ເຊິ່ງຈະເນັ້ນໃຫ້ຊາວບ້ານມີສ່ວນຮ່ວມໃນການຜະລິດ ແລະ ຮ້ານເຮົາຍັງໄດ້ລະດົມໃຫ້ປະຊາຊົນປູກຝ້າຍ ແລະ ໃບຫ້ອມ ເພື່ອນໍາມາໃຊ້ໃນການຜະລິດອີກດ້ວຍ. ພິເສດ! ຖ້າທ່ານໃດທີ່ມາທ່ຽວຊົມງານທ໊ອບໄທແບຣນ 2019 ໃນວັນ ທີ່ 8 ມີນາ ນີ້ ແລ້ວມາແວ່ຊື້ຜະລິດຕະພັນກັບທາງຮ້ານເຮົາ ແລ້ວບອກວ່າຮູ້ຂ່າວມາຈາກ ເພຈ ອິນໄຊລາວ ຫຼື ເວບໄຊອິນໄຊລາວ ແມ່ນຈະມີສ່ວນຫລຸດໃຫ້ 30%.
ນອກຈາກນີ້ເຈົ້າຂອງຮ້ານ ບ້ານ ບ້ານ ເຊິ່ງເປັນຮ້ານຂາຍກະແລ້ມລາວ ໄດ້ບອກກັບທາງອິນໄຊລາວອີກວ່າ: ຜະລິດຕະພັນຂອງທາງຮ້ານ ແມ່ນໃຊ້ວັດຖຸດິບຈາກລາວໃນການຜະລິດ ເພື່ອເນັ້ນໃຫ້ຊາວບ້ານ ມີລາຍຮັບຫລາຍຂຶ້ນ. ຖ້າຊື້ກະແລັມຄົບ 20 ໄມ້ ແມ່ນຈະແຖມ ຖົງຜ້າໃຫ້ຫນຶ່ງຫນ່ວຍ.
ຮ້ານກະທິງທອງກໍເປັນຮ້ານຫນຶ່ງ ທີ່ໃຊ້ວັດຖຸດິບຈາກການເກັບຊື້ນຳປະຊາຊົນມາມີສ່ວນຮ່ວມໃນການຜະລິດ: “ສິນຄ້າຂອງຮ້ານເຮົາແມ່ນສະຫມຸນໄພລາວ ເຊິ່ງວັດຖຸດິບ 80% ແມ່ນຂອງຄົນລາວ ມີພຽງຂວດແກ້ວບັນຈຸ ກັບກ່ອງເທົ່ານັ້ນທີ່ນຳເຂົ້າ”.
ນອກຈາກນີ້ ທາງຮ້ານເຮົາຍັງມີດອກໄມ້ປະດິດດ້ວຍແປງ ເຊິ່ງເປັນສີມືຂອງປະຊາຊົນອ້ອມແອ້ມ ຈະໃຊ້ເວລາວ່າງເພຶ່ອມາຫາລາຍໄດ້ເສີມ ແລະ ສຳລັບວັນແມ່ຍິງທີ່ຈະມາຮອດນີ້ ທາງຮ້ານເຮົາກໍມີຂອງແຖມໃຫ້ກັບລູກຄ້າອີກຫລວງຫລາຍ.