ເມື່ອເອີ່ຍເຖິງສວນວັດທະນະທຳ ຊຽງຄວນ ໃຜໆກໍ່ຄົງຈະນຶກພາບອອກທັນທີເຖິງເທວະຮູບ, ພຸດທະຮູບທີ່ຕັ້ງຢູ່ລຽງລາຍຊວນໃຫ້ໄປທ່ຽວຊົມ ແລະ ໜ້າສຶກສາຄົ້ນຫາເຖິງປະຫວັດຄວາມເປັນມາພຸດທະຮູບແຕ່ລະທີ່ຖືກສ້າງຂຶ້ນໂດຍນາຍຊ່າງວິຈິດສິນຜ່ານມາແລ້ວຊົ່ວຄົນ ປັດຈຸບັນສະຖານທີ່ແຫ່ງນີ້ກຳລັງມີການປັບປຸງປະຕູໂຂງ, ທາງຍ່າງ, ສວນດອກໄມ້ ແລະ ສິ່ງອຳນວຍຄວາມສະດວກສະບາຍຕ່າງໆໄວ້ໃຫ້ນັກທ່ອງທ່ຽວທີ່ມາທ່ຽວຊົມໃນແຕ່ລະວັນ.
ທ່ານ ນາງ ສ້ອຍສຸດາ ອິນເມືອງໄຊ ຜູ້ສຳປະທານ ສວນວັດທະນະທຳ ຊຽງຄວນ ກ່າວວ່າ: ວັດຊຽງຄວນເປັນສະຖານທີ່ບູນິຍະສະຖານຂອງຄົນລາວທັງຊາດເພື່ອໃຫ້ມີຄວາມເໝາະສົມ ແລະ ໜ້າທ່ຽວຊົມໃຫ້ມີຄວາມສວຍງາມ ແລະ ເໝາະສົມໄດ້ມີການອອກແບບປະຕູໂຂງທາງເຂົ້າແບບປະສົມປະ ສານໂດຍຜ່ານກົມວັດທະນະທຳ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໂດຍມີລວດ ລາຍຕ່າງໆຢູ່ໃນຍຸກກ່ອນໃຫ້ມີຄວາມກົມກືນກັບສວນດັ່ງກ່າວ ປັດຈຸບັນກຳລັງມີການກໍ່ສ້າງ, ພາຍໃນເບື້ອງຊ້າຍມືທາງເຂົ້າກໍ່ຈະເຫັນພະພຸດທະຮູບແຕ່ລະປາງທີ່ສວຍງາມ ສ່ວນດ້ານຂົວມືທີ່ເປັນດັ້ງເດີມແມ່ນຈະບໍ່ໄດ້ແຕະຕ້ອງຫຍັງທັງໝົດຈະມີພຽງແຕ່ບູລະນະຮັກສາເທວະຮູບທີ່ເຫັນວ່າຊຸດໂຊມແຕ່ກໍ່ຈະປະສົມບູນແບບພິເສດໃຫ້ມີຄວາມກົມກືນກັນ ນອກຈາກນັ້ນກໍ່ປູທາງຍ່າງ ແລະ ປູກຫຍ້າໃຫ້ມີຄວາມຂຽວງາມ ຫຍັບອອກໄປທາງແຄມຂອງກໍ່ຈະມີການປູກດອກໄມ້ແຕ່ລະລະດູໄວ້ຄອຍໃຫ້ນັກທ່ອງທ່ຽວສາມາດຖ່າຍຮູບໄວ້ເປັນທີ່ລະນຶກອວດອ້າງໝູ່ເພື່ອນກ່ອນຈະມາພັກທ່ຽວກິນເຂົ້າມີອາຫານຕາມສັ່ງ.
ໃນປີ 2018 ສວນວັດທະນະທຳ ຊຽງຄວນ ມີນັກທ່ອງທ່ຽວເຂົ້າມາຢ້ຽມຊົມປະມານ 3 ແສນກວ່າຄົນ ສ່ວນໃຫຍ່ແມ່ນພາຍໃນ, ສ.ເກົາຫຼີ ແລະ ສປ ຈີນ ໃນປີ 2019 ເປັນປີທ່ອງທ່ຽວ ລາວ-ຈີນ ຄາດວ່າຈະມີນັກທ່ອງທ່ຽວເດີນທາງມາສະຖານທີ່ດັ່ງກ່າວບໍ່ຕ່ຳກວ່າ 4-5 ແສນຄົນ.