ກົມຄຸ້ມຄອງມົນລະພິດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແຈ້ງໃຫ້ຮູ້ວ່າ ນະຄອນຫຼວງວຽງຈັນໃນປະຈຸບັນພວມປະເຊີນໜ້າກັບ ຝຸ່ນລະອອງ PM 2.5 ທີ່ເປັນພິດຕໍ່ສຸຂະພາບ ໃນເກນອັນຕະລາຍ ແຕ່ບໍ່ເຖິງຂັ້ນຮ້າຍແຮງ ແລະ ຄາດວ່າ ອີກ 2-3 ມື້ສະຖານະການຈະປັບຕົວດີຂຶ້ນ.
ຈາກການວັດແທກຂອງ ວິຊາການກົມຄຸ້ມຄອງມົນລະພິດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມວານນີ້ຊີ້ໃຫ້ເຫັນວ່າ ມີປະລິມານຄວາມໜາແໜ້ນຂອງຝຸ່ນ PM 2.5 ຢູ່ທີ່ 172 ໄມໂຄຣກຼາມ (mcg) ຕໍ່ ແມັດກ້ອນ ສະເພາະ ມື້ນີ້ ແມ່ນ 140 mcg ຕໍ່ ແມັດກ້ອນ.
ມາດຕະຖານຄຸນນະພາບອາກາດກຳນົດໂດຍອົງການອະນາໄມໂລກ ອະນຸຍາດໃຫ້ມີຄວາມໜາແໜ້ນຂອງຝຸ່ນລະອອງ PM 2.5 ສູງສຸດບໍ່ເກີນ 25 ມິໂກຣກຼາມ (mcg) ຕໍ່ໜຶ່ງແມັດກ້ອນບໍ່ເກີນ 3 ມື້ໃນໜຶ່ງປີ. ຢ່າງໃດກໍຕາມ ເວັບໄຊສະຖິຕິຕ່າງປະເທດ (https://www.statista.com) ລາຍງານໃຫ້ຮູ້ວ່າ ໃນລະຫວ່າງປີ 1990 ຫາ 2016 ປະລິມານຄວາມໜາແໜ້ນຂອງຝຸ່ນລະອອງ PM 2.5 ໃນສປປລາວ ແມ່ນສູງກວ່າຄ່າມາດຕະຖານທີ່ອົງການອະນາໄມໂລກກຳນົດ ຄື ຢູ່ລະຫວ່າງ 27 mcg (ປີ 1990, 1995, 2000) ຫາ 31 mcg (2013, 2014).
ທີ່ມາ: ຂປລ
Hits: 30
