ທີ່ໂຮງແຮມດອນຈັນພາເລດ ນະຄອນຫລວງວຽງຈັນ ໄດ້ມີພິທີເຊັນສັນຍາກໍ່ສ້າງພະລັງງານໄຟຟ້າແສງຕາເວັນຂະໜາດ 230 ເມກາວັດ ຢູ່ເຂດກະສິກຳເລກທີ 1 ກອງທັບ (ໜອງໝາກຈັບ) ເມືອງທ່າພະບາດ, ແຂວງບໍລິຄຳໄຊ ໃນມູນຄ່າ 345 ລ້ານໂດລາສະຫະລັດ ລະຫວ່າງ ທ່ານ ສຸລິຍາ ສີສະນົນ ຜູ້ອຳນວຍການ ບໍລິສັດ ສຸລິຍາພົນ ການຄ້າສາກົນ ຈຳກັດ ແລະ ທ່ານ ຫວາງລຽນມາວ ຜູ້ອຳນວນການ ບໍລິສັດ ຈຽງຊີຮົວເຜີງອຸດສາຫະກຳ ຈຳກັດ.
ໃນພິທີມີຕາງໜ້າຈາກກະຊວງປ້ອງກັນປະເທດ ແລະ ພະນັກງານສອງຝ່າຍເຂົ້າຮ່ວມເປັນສັກຂີພິຍານ.
ໂຄງການກໍ່ສ້າງພະລັງງານໄຟຟ້າແສງຕາເວັນຢູ່ເຂດກະສິກຳເລກ 1 ກອງທັບ ເມືອງທ່າພະບາດ ແມ່ນຢູ່ໃນພື້ນທີ່ດິນຂອງກະຊວງປ້ອງກັນປະເທດ ເຊິ່ງເປັນການລົງທຶນຂອງບໍລິສັດ ສຸລິຍາພົນ ການຄ້າສາກົນ ຈຳກັດ 100% ໂດຍການຮັບເໝົາກໍ່ສ້າງຂອງບໍລິສັດຈຽງຊີຮົວເຜີງ ອຸດສາຫະກຳ ຈຳກັດ ຮ່ວມກັບ ບໍລິສັດ ດັກຈຶງມາຍນິ້ງ ຈຳກັດ.
ການກໍ່ສ້າງໄຟຟ້າແສງຕາເວັນດັ່ງກ່າວແມ່ນ ເພື່ອຮັບໃຊ້ເຂດເສດຖະກິດພິເສດຂອງແຂວງບໍລິຄຳໄຊ ແລະ ຕິດພັນກັບການຜະລິດກະສິກຳຕ່າງໆແບບຄົບວົງຈອນຂອງເຂດກະສິກຳເລກ 1 ກອງທັບໃຫ້ມີຄວາມສະດວກສະບາຍຂຶ້ນກວ່າເກົ່າ.
ໂຄງການກໍ່ສ້າງໄຟຟ້າພະລັງແສງຕາເວັນຄາດວ່າໃຊ້ເວລາກໍ່ສາ້ງປະມານ 2 ປີຈຶ່ງສຳເລັດ.