ກອງປະຊຸມຜູ້ບໍລິຫານການສຶກສາຊັ້ນສູງທົ່ວປະເທດ ປະຈຳປີ 2018 ຈັດຂຶ້ນທ້າຍເດືອນເມສາ 2019 ຜ່ານມາ ຢູ່ມະຫາວິທະຍາໄລແຫ່ງຊາດ (ມຊ) ໂດຍເປັນປະທານຂອງທ່ານ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກີລາ (ສສກ) ມີທ່ານ ສາຍຂອງ ສາຍນາສິນ ຫົວໜ້າກົມການສຶກສາຊັ້ນສູງ ບັນດາຄະນະອະທິການບໍດີມະຫາວິທະຍາໄລ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສາຍຂອງ ສາຍນາສິນ ກ່າວວ່າ: ຜ່ານການຈັດຕັ້ງມະຕິກອງປະຊຸມຜູ້ບໍລິຫານການສຶກສາຊັ້ນສູງທົ່ວປະເທດ ປະຈຳປີ 2017 ແລະ ແຜນການເຄື່ອນໄຫວຂອງຂະແໜງການສຶກສາຊັ້ນສູງ ປະຈຳປີ 2018 ສາມາດຕີລາຄາຜົນສຳເລັດຫຼາຍດ້ານ ໂດຍສະເພາະ ການຂະຫຍາຍໂອກາດເຂົ້າຮຽນໃນປີ 2018 ທົ່ວປະເທດມີສະຖາບັນການສຶກສາຊັ້ນສູງ 80 ແຫ່ງ ໃນນີ້ ພາກລັດ 21 ແຫ່ງ ເອກະຊົນ 59 ແຫ່ງ ທີ່ໄດ້ດຳເນີນການຮຽນ-ການສອນແຕ່ລະດັບອະນຸປະລິນຍາຕີ ປະລິນຍາຕີ ລົງເລິກຂະແໜງການຊ່ຽວຊານຊັ້ນ 1 ຊ່ຽວຊານຊັ້ນ 2 ປະລິນຍາໂທ ແລະ ປະລິນຍາເອກ ທຽບໃສ່ປີ 2017 ແມ່ນບໍ່ມີການປ່ຽນແປງ ຈຳນວນນັກສຶກສາໃນສະຖາບັນການສຶກສາຊັ້ນສູງ ມີ 65.472 ຄົນ ໃນນີ້ ພາກລັດ 41.892 ຄົນ ເທົ່າກັບ 25,39% ເອກະຊົນ 23.580 ຄົນ ເທົ່າກັບ 53,75% ສະເພາະມະຫາວິທະຍາໄລ 4 ແຫ່ງທີ່ຂຶ້ນກັບກະຊວງ ສສກ ມີ 34.736 ຄົນ ຍິງ 15.998 ຄົນ ເທົ່າກັບ 46,05%.
ການປະຕິບັດນະໂຍບາຍຕໍ່ນັກສຶກສາເພດຍິງຢູ່ 4 ມະຫາວິທະຍາໄລ ສາມາດປະຕິບັດໄດ້ຕາມຄາດໝາຍທີ່ວາງອອກໃນອັດຕາ 45% ຕໍ່ນັກສຶກສາທັງໝົດ ສ່ວນສະຖິຕິຂອງອາຈານ ພະນັກງານຢູ່ ມຊ ມີ 1.755 ຄົນ ຍິງ 785 ຄົນ ມະຫາວິທະຍາໄລຈຳປາສັກ (ມຈ) 401 ຄົນ ຍິງ 152 ຄົນ ມະຫາວິທະຍາໄລສຸພານຸວົງ (ມສ) 413 ຄົນ ຍິງ 123 ຄົນ ມະຫາວິທະຍາໄລສະຫວັນນະເຂດ (ມຂ) 313 ຄົນ ຍິງ 134 ຄົນ ໃນປີ 2018 ມີຜູ້ສຳເລັດການສຶກສາ ແລະ ໄດ້ຮັບປະກາສະນິຍະບັດຈາກສະຖາບັນການສຶກສາຊັ້ນສູງພາກລັດ ແລະ ເອກະຊົນ ລະດັບອະນຸປະລິນຍາ-ປະລິນຍາເອກ 13.112 ຄົນ ຍິງ 5.479 ຄົນ ແລະ ໃນມະຫາວິທະຍາໄລ 4 ແຫ່ງ 9.975 ຄົນ ຍິງ 3.828 ຄົນ.
ສຳລັບແຜນຈຸດສຸມ ປະຈຳປີ 2019 ໂດຍສະເພາະການຂະຫຍາຍໂອກາດການເຂົ້າຮຽນ ຈະສືບຕໍ່ປະຕິບັດນະໂຍບາຍໃຫ້ທຶນການສຶກສາແກ່ນັກຮຽນເກ່ງ ແມ່ຍິງ ແລະ ຜູ້ດ້ອຍໂອກາດຈາກຄອບຄົວທຸກຍາກ 20% ແມ່ນໄດ້ຮັບເບ້ຍລ້ຽງຈາກລັດຖະບານ ໃນນີ້ 10% ແມ່ນມອບໃຫ້ມະຫາວິທະຍາໄລຄົ້ນຄວ້າຄັດເລືອກ ແລະ ອີກ 10% ມອບໃຫ້ພະແນກ ສສກ ແຕ່ລະແຂວງຄົ້ນຄວ້າຄັດເລືອກ ແລະ 80% ແມ່ນຈ່າຍຄ່າຮຽນ (ໂດຍການສອບເສັງລະດັບຊາດ) ຊຸກຍູ້ການແລກປ່ຽນ ແລະ ຮ່ວມມືກັບຕ່າງປະເທດ ລະຫວ່າງນັກສຶກສາ ຄູ-ອາຈານ ເພື່ອພັດທະນາການສຶກສາຊັ້ນສູງໃຫ້ມີຄຸນນະພາບກ້າວສູ່ຂົງເຂດ ແລະ ສາກົນ ສືບຕໍ່ປະເມີນບັນດາວິທະຍາໄລ ຕິດຕາມການສອບເສັງເຂົ້າຮຽນມະຫາວິທະຍາໄລ 4 ແຫ່ງ ແລະ ສະຖາບັນການສຶກສາຊັ້ນສູງແຫ່ງຕ່າງໆ ປະຈຳສົກສຶກສາ 2019-2020 ແລະ ກະກຽມຈັດກອງປະຊຸມສະຫຼຸບຖອດຖອນບົດຮຽນ ກ່ຽວກັບການຈັດຕັ້ງປະຕິບັດ ແລະ ແຜນການສອບເສັງ ປະຈຳສົກສຶກສາ 2020-2021 ໃຫ້ມີຜົນສຳເລັດ.
ທີ່ມາ: ສຳນັກຂ່າວສານປະທດລາວ
