ກົມທະບຽນ ແລະ ຄຸ້ມຄອງວິສາຫະກິດ (ທຄວ) ກະຊວງອຸດສາຫະກຳ ແລະ ການຄ້າ ໄດ້ສະຫລຸບການຂຶ້ນທະບຽນ ຂອງບັນດາວິສາຫະກິດ ທີ່ມີຕົວເລກ ປະຈຳຕົວ ຜູ້ເສຍອາກອນ, ພ້ອມກັບ ການອອກ ໃບທະບຽນ ວິສາຫະກິດ ຢູ່ບັນດາຈຸດ ທີ່ໄດ້ຕິດຕັ້ງ ໂປຣແກຣມ ທະບຽນ ວິສາຫະກິດລວມສູນ ເຊື່ອມຕໍ່ກັບ ສ່ວຍສາອາກອນ ທັງໝົດ 110 ຈຸດທົ່ວປະເທດ ພາຍໃນ 2 ເດືອນໄດ້ມີ 4.284 ຫົວໜ່ວຍ, ໂດຍເລີ່ມແຕ່ວັນທີ 1 ກຸມພາ ຫາ 25 ເມສາ 2019, ໃນນັ້ນ ໄດ້ຂຶ້ນທະບຽນ ວິສາຫະກິດ ຢູ່ກົມ ທຄວ 768 ຫົວໜ່ວຍ, ຢູ່ 18 ພະແນກ ອຄ ແຂວງ/ນະຄອນຫລວງວຽງຈັນ 1.418 ຫົວໜ່ວຍ ແລະ ຢູ່ 91 ຫ້ອງການ ອຄ ເມືອງ ຈຳນວນ 2.098 ຫົວໜ່ວຍ.
ນອກຈາກນີ້, ບົດສະຫລຸບຍັງໄດ້ລາຍງານ ກ່ຽວກັບການຝຶກອົບຮົມການຕິດຕັ້ງ ແລະ ນຳໃຊ້ລະບົບໂປຣແກຣມດັ່ງກ່າວ ໃຫ້ເຈົ້າໜ້າທີ່ທະບຽນວິສາຫະກິດຂອງ ກົມ ທຄວ, ພະແນກ ອຄ ແຂວງ/ນະຄອນຫລວງ ແລະ ຫ້ອງການ ອຄ ເມືອງ ໃນທົ່ວປະເທດ ເພື່ອຮັບປະກັນຄວາມເຂົ້າໃຈ ໃນການນຳໃຊ້ໂປຣແກຣມ, ເຕັກນິກທາງດ້ານໄອທີ, ການບໍລິການຂຶ້ນທະບຽນ ແລະ ການຄຸ້ມຄອງຫລັງການຂຶ້ນທະບຽນວິສາຫະກິດ.
ລະບົບໂປຣແກຣມດັ່ງກ່າວ, ເປັນລະບົບທີ່ພັດທະນາມາຈາກ ລະບົບໂປຣແກຣມທະບຽນວິສາ ຫະກິດ ທີ່ເຄີຍໄດ້ນຳໃຊ້ມາແຕ່ປີ 2008, ຊຶ່ງໄດ້ມີການປັບປຸງບາງຈຸດ ທາງດ້ານເຕັກນິກໃໝ່ ເພື່ອໃຫ້ສາມາດເຊື່ອມຕໍ່ກັບການເອົາເລກປະຈຳຕົວ ຜູ້້ເສຍອາກອນຈາກຂະແໜງການເງິນ ແລະ ໃນອະນາຄົດ ຈະມີການຕິດຕັ້ງລະບົບດັ່ງກ່າວ ຢູ່ທຸກເມືອງທົ່ວປະເທດ.
ທີ່ມາ: ສຳນັກຂ່າວສານປະເທດລາວ