ເພື່ອເຮັດໃຫ້ຄູ-ອາຈານ ແລະນັກສຶກສາມີຄວາມເຂົ້າໃຈ ແລະເຫັນໄດ້ເຖິງຄວາມຈຳເປັນຂອງມາລະຍາດຂອງສັງຄົມທີ່ຕ້ອງໄດ້ໄປໝູນໃຊ້ເຂົ້າໃນຊີວິດປະຈຳວັນຂອງຕົນໄດ້ດີຂຶ້ນ.
ທີ່ຄະນະສຶກສາສາດ ມະຫາວິທະຍາໄລແຫ່ງຊາດ ໄດ້ຈັດພິທິຝຶກອົບຮົມມາລະຍາດທາງສັງຄົມ, ວັດທະນະທຳ ແລະຮີດຄອງປະເພນີໃຫ້ແກ່ນັກສຶກສາຂອງຄະນະຕົນ, ຂຶ້ນທີ່ຫ້ອງປະຊຸມ ສະໂມສອນໃຫຍ່ ຂອງມະຫາວິທະຍາໄລແຫ່ງຊາດ.
ໂດຍການໃຫ້ກຽດເຂົ້າຮ່ວມເປີດຂອງທ່ານ ວິຊຽນ ທອງທະວີ ຮອງຄະນະບໍດີ ຄະນະສຶກສາສາດ, ໃຫ້ກຽດບັນ ຍາຍໂດຍທ່ານ ຮສ. ອາລຸນ ສີລັດຕະນະກຸນ ອະດີດຄະນະບໍດີ ຄະນະອັກສອນສາດ ມະຫາວິທະຍາໄລແຫ່ງຊາດ, ມີຜູ້ຕາງໜ້າຈາກຫ້ອງການຄຸ້ມຄອງນັກສຶກສາ, ມີພະນັກງານ, ຄູ-ອາຈານ ແລະນັກສຶກສາທົ່ວ ຄະນະສຶກສາສາດ ເຂົ້າຮ່ວມ.
ໂອກາດນີ້, ທ່ານ ຮສ. ອາລຸນ ສີລັດຕະນະກຸນ ກໍ່ໄດ້ບັນຍາຍຜ່ານຫຼາຍຫົວຂໍ້ເປັນຕົ້ນແມ່ນ ກິລິຍາມາລະຍາດ, ວັດທະນະທຳໃນການພົວພັນສັງຄົມ, ວັດທະນະທຳຮີດຄອງປະເພນີອັນດີງາມຂອງລາວ ແລະວິທີການດໍາລົງຊີວິດຂອງສັງຄົມໃນຍຸກປັດຈຸບັນ.
ໂດຍສະເພາະແມ່ນ ມາລະຍາດທາງສັງຄົມທີ່ນໍາໃຊ້ໃນຊີວິດປະຈໍາວັນ, ທ່ານໄດ້ອະທິບາຍລວມກ່ຽວກັບຫົວຂໍ້ມາລະຍາດທາງສັງຄົມຊຶ່ງມີຄວາມໝາຍຄວມສຳຄັນຢ່າງກ້ວາງຂວາງ ທີ່ຕິດພັນກັບການສຶກສາ ແລະມີຄວາມສຳຄັນຕໍ່ຄົນໃນສັງຄົມຊຶ່ງຈະຕ້ອງໄດ້ສະແດງອອກ ການຝຶກຫັດໃຫ້ກາຍເປັນແບບແຜນຄວາມຊິນເຄີຍ ແລະເປັນນິດໄສໃຈຄໍ.
ການຮັກສາກິລິຍາມາລະຍາດໃຫ້ສຸພາບຮຽບຮ້ອຍໃຫ້ກາຍເປັນຫຼັກການ ແລະມາດຕະຖານໜຶ່ງຂອງຄົນໃນສັງຄົມ, ໂດຍສະເພາະຕໍ່ນັກສຶກສາ, ນັກຮຽນຮູ້ປັນຍາຊົນ ຍິ່ງມີຄວາມຈຳເປັນຈະຕ້ອງໄດ້ໃສ່ໃຈໃນມາລະຍາດ ແລະມະນຸດສຳພັນອີກດ້ວຍ, ເພາະມາລະຍາດສັງຄົມ ແລະມະນຸດສຳພັນ ມັນເປັນເຄື່ອງມືທີ່ສຳຄັນ ໃນການຕັດສິນຜົນໄດ້-ຜົນເສຍໃນການພົວພັນຂອງມວນມະນຸດດ້ວຍກັນ.
ໃນພິທີ, ຍັງມີການສົນທະນາແລກປ່ຽນຄວາມຄິດເຫັນເຊິ່ງກັນ ແລະກັນອີກດ້ວຍ ໂດຍສະເພາະແມ່ນບາງບັນຫາກ່ຽວກັບມາລະຍາດທາງສັງຄົມ ເປັນຕົ້ນແມ່ນມາລະຍາດໃນການຟ້ອນລໍາວົງລາວ, ມາລະຍາດໃນການຈັບມື ແລະລວມເຖິງມາລະຍາດອຶ່ນໆ ທັງນີ້ກໍເພື່ອໃຫ້ ຄູ-ອາຈານ ແລະນັກສຶກສາໄດ້ມີຄວາມເຂົ້າໃຈ ແລະປະພຶດຕົນໃຫ້ຖືກຕ້ອງຕາມມາລະຍາດຂອງສັງຄົມ ກໍຄືວັດທະນະທໍາອັນດີງາມຂອງຊາດລາວເຮົາອີກດ້ວຍ.
ທີ່ມາ: https://www.nuol.edu.la