ຕາມການລາຍງານຈາກ ທ່ານ ສົມເພັດ ເອີດລັດດາ ເຈົ້າເມືອງໆທ່າແຕງ ແຂວງເຊກອງໃຫ້ຮູ້ວ່າ:
ໃນປີ 2019 ນີ້, ເມືອງທ່າແຕງຈະເນັ້ນໜັກ 5 ບັນຫາສຳຄັນ ເພື່ອເຮັດໃຫ້ການຜະລິດກາຍເປັນສິນຄ້າ, ມີຈຸດສຸມ ແລະ ຖືກຕາມຄວາມຕ້ອງການຂອງຕະຫລາດ ແລະ ສົ່ງເສີມປະຊາຊົນ ຜະລິດເປັນສິນຄ້າໃຫ້ຫລາຍຂຶ້ນ.
ໃນ 5 ບັນຫາສຳຄັນດັ່ງກ່າວປະກອບມີ:
ສືບຕໍ່ສົ່ງເສີມປະຊາຊົນ ຜະລິດເປັນສິນຄ້າ, ສົ່ງເສີມການປູກພືດທີ່ມີຕະຫລາດຮອງຮັບເພື່ອຂາຍເປັນສິນຄ້າ ໃຫ້ປະຊາຊົນມີລາຍຮັບເພີ່ມຂຶ້ນ; ຊ່ວຍເຫລືອປະຊາຊົນຜູ້ທີ່ຂາດເຂີນທຶນຮອນການຜະລິດ ໃຫ້ເຂົາເຈົ້າສາມາດ ເຂົ້າ ເຖິງແຫລ່ງທຶນຈາກທະນາຄານ ເພື່ອນຳໃຊ້ເຂົ້າໃນການຜະລິດຄືກັບຄອບຄົວອື່ນ ທີ່ພໍຢູ່ພໍກິນ ແລະ ຮັ່ງມີແລ້ວ.
ພ້ອມນັ້ນ ກໍຊ່ວຍແນະນໍາ ເຕັກນິກວິຊາການເ ຂົ້າຊ່ວຍ ໃນການຜະລິດ; ສືບຕໍ່ປັບປຸງ ແລະ ຈັດສັນເຂດການຜະ ລິດ ໃຫ້ເໝາະສົມກັບທ່າແຮງ ແລະ ເໝາະສົມກັບເງື່ອນໄຂຕົວຈິງ ຂອງແຕ່ລະທ້ອງຖິ່ນ, ແຕ່ລະບ້ານ; ຈັດຫາວຽກເຮັດງານທຳໃຫ້ປະຊາຊົນ,ຄອບຄົວປະຊາຊົນ ຜູ້ທີ່ບໍ່ມີເນື້ອທີ່ທຳການຜະລິດ ເຊິ່ງຈະໃຫ້ເຂົາເຈົ້າ ໄດ້ເຂົ້າເຮັດວຽກ ນຳບັນດາບໍລິສັດ ແລະ ໂຄງການລົງທຶນຕ່າງໆພາຍໃນເມືອງ; ພະຍາຍາມຍາດແຍ່ງ ແລະ ດຶງດູດເອົາການລົງທຶນຈາກ ພາກສ່ວນຕ່າງໆທົ່ວສັງຄົມ ໂດຍສະເພາະແມ່ນ ການລົງທຶນ ຂອງພາກເອກະຊົນ ໃຫ້ເຂົ້າມາລົງທຶນ ພາຍໃນເມືອງທ່າແຕງ ໃຫ້ນັບມື້ຫລາຍຂຶ້ນ.
ສຳລັບການຜະລິດເປັນສິນຄ້າ ໃນປີ 2018 ຜ່ານມາ ສາມາດເກັບກູ້ຜົນຜະລິດກາເຟໄດ້ 19.679ກວ່າໂຕນ; ໝາກແໜ່ງ 1.405 ໂຕນ; ສາລີ 8.784 ໂຕນ; ຜັກກາດຫໍ່ ກະລໍາປີ 27.120 ໂຕນ; ກ້ວຍ 5.103 ໂຕນ; ຖົ່ວດິນ 615 ໂຕນ; ມັນຕົ້ນທາດແປ້ງ 15.304ໂຕນ ແລະ ໝາກນັດ 1.250 ໂຕນ, ນອກນັ້ນ ຍັງມີສັດລ້ຽງປະເພດຄວາຍ, ງົວ, ແບ້, ໝູ ແລະ ສັດປີກ ເຊິ່ງເຮັດໃຫ້ການສົ່ງອອກສິນຄ້າຂອງເມືອງບັນລຸໄດ້ 42 ຕື້ກີບ.
ແຫຼ່ງຂໍ້ມູນ: ສຳນັກຂ່າວສານປະເທດລາວ
ຮູບພາບ: Tono Chormphachun