ກົມໂຄສະນາການທ່ອງທ່ຽວ ກະຊວງຖະແຫລງຂ່າວ ວັດທະນະທໍາ ແລະທ່ອງທ່ຽວ ແຫ່ງ ສປປ ລາວ ຮ່ວມກັບ ຮ່ວມກັບ ສູນວັດທະນະທໍາຈີນ ປະຈໍາລາວ ແລະ ພະແນກວັດທະນະທໍາ ແລະທ່ອງທ່ຽວ ແຂວງເສສວນ ສປ ຈີນ ຈັດງານປາຖະກະຖາການທ່ອງທ່ຽວ ແນ່ໃສ່ເປີດກວ້າງດ້ານການທ່ອງທ່ຽວລາວ-ຈີນ ແລະເພື່ອເສີມຂະຫຍາຍການຮ່ວມມືດ້ານການທ່ອງທ່ຽວ ກໍຄືການແລກປ່ຽນທາງດ້ານວັດທະນະທຳຂອງສອງປະເທດ
ງານດັ່ງກ່າວໄດ້ຈັດຂຶ້ນ ໃນວັນທີ 30 ພຶດສະພາ 2019 ທີ່ຫໍວັດທະນະທຳແຫ່ງຊາດ ໂດຍການເຂົ້າຮ່ວມຂອງທ່ານ ບູນລັບ ດວງພູມີ ຮອງຫົວໜ້າກົມໂຄສະນາການທ່ອງທ່ຽວ, ທ່ານ ເຕົ້າ ເຫວີຍປິງ (DOU WEIPING), ຫົວໜ້າພະແນກວັດທະນະທຳ ແລະທ່ອງທ່ຽວ ແຂວງເສສວນ, ສປ ຈີນ, ທ່ານ ນາງ ຕິ່ງຊິ່ງ ຫົວຫນ້າສູນວັດທະນະທໍາຈີນ ປະຈໍາ ສປປ ລາວ, ມີບັນດາທ່ານຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ ຈາກກະຊວງ ຖວທ ແລະກະຊວງອ້ອມຂ້າງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ບູນລັບ ດວງພູມີ ໃຫ້ຮູ້ວ່າ ລາວ ແລະສປ ຈີນ ເປັນປະເທດທີ່ມີຊາຍແດນຕິດຈອດກັນ ແລະເປັນພີ່ເປັນນ້ອງຮ່ວມຊະຕາກຳອັນດຽວກັນມາແຕ່ສະໄໝດຶກດຳບັນ. ທັງສອງປະເທດໄດ້ມີການພົວພັນກັນຢ່າງສະໜິດແໜ້ນທາງ ດ້ານການເມືອງ, ເສດຖະກິດ ແລະວັດທະນະທໍາ-ສັງຄົມມາເປັນເວລາຫຼາຍປີແລ້ວ. ດ້ານການທ່ອງທ່ຽວ ລາວ ແລະຈີນ ໄດ້ມີການຮ່ວມມືກັນຢ່າງຕໍ່ເນື່ອງ ນັບທັງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວ ເຊັ່ນ ການເປີດຖ້ຽວຈາກລາວ ຫາບາງແຂວງຂອງຈີນ ຄື: ກວາງໂຈ, ໜານນິງ, ຄຸນໝິງ, ປັກກິ່ງ ແລະອື່ນໆ. ນອກນັ້ນ ໃນມໍ່ໆນີ້, ທັງສອງປະເທດກໍຈະໄດ້ນຳໃຊ້ເສັ້ນທາງສາຍໃໝ່ນັ້ນກໍຄື ເສັ້ນທາງລົດໄຟຄວາມໄວສູງ ລາວ-ຈີນ ເຊິ່ງຈະເປັນການ ອຳນວຍຄວາມສະດວກໃນການເດີນທາງໄປມາ-ຫາສູ່ກັນລະຫວ່າງປະຊາຊົນສອງປະເທດ ກໍຄື ນັກທ່ອງທ່ຽວລາວ-ຈີນ ແລະສາກົນໃນອານະຄົດ.
ສະພາະງານປາຖະກະຖາຄັ້ງນີ້ ໄດ້ຮັບຟັງການບັນຍາຈາກທ່ານ ກູ້ຊ່ຽງກັ່ງ ໂດຍຜ່ານປະສົບການຕົວຈິງດ້ານການທ່ອງທ່ຽວຂອງ ແຂວງເສສວນ-ສປ ຈີນ ເພື່ອຊອກຫາ “ກຸນແຈຄໍາ” ໃນການພັດທະນາດ້ານການທ່ອງທ່ຽວຂອງລ, ຮ່ວມແບ່ງປັນຕະຫຼາດທີ່ຍິ່ງໃຫຍ່ຂອງນັກທ່ອງທ່ຽວຈີນທີ່ເດີນທາງອອກຕ່າງປະເທດ, ຮ່ວມແລກປ່ຽນປະສົບການດ້ານການບໍລິການແກ່ນັກທ່ອງທ່ຽວຕ່າງປະເທດທີ່ເດີນທາງເຂົ້າ ສປ ຈີນ ນໍາອີກ.
Hits: 4
