ໃນຕອນເຊົ້າຂອງວັນທີ 3 ມີຖຸນາ 2019 ຢູ່ທີ່ເດີ່ນໂຮງຮຽນປະຖົມສົມບູນໄຊຍະພູມ ນະຄອນໄກສອນ ພົມວິ ຫານ ໄດ້ຈັດພິທີມອບ-ຮັບໂຄງການສ້ອມແປງ-ປັບປຸງອາຄານຮຽນຂອງໂຮງຮຽນປະຖົມສົມບູນໄຊຍະພູມ,ໂດຍການເຂົ້າຮ່ວມຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ.
ໃນພິທີທ່ານ ພູມີ ສິງຄຳປະເສີດ ຜູ້ຕ່າງໜ້າກຸ່ມບໍລິສັດ ລາວມີໄຊ ກໍ່ໄດ້ລາຍງານການສ້ອມແປງອາຄານໂຮງຮຽນປະຖົມສົມບູນໄຊຍະພູມວ່າ:
ທາງອຳນາດການປົກຄອງຂັ້ນແຂວງໄດ້ເຫັນຄວາມສຳຄັນໃນການສຶກສາຄົ້ນຄວ້າ ແລະ ເປັນໜຶ່ງໃນສະຖານທີ່ປະຫວັດສາດເພື່ອໃຫ້ລູກຫຼານໄດ້ຮໍ່າຮຽນເປັນແບບຢ່າງ ດັ່ງນັ້ນຈຶ່ງມອບໃຫ້ກຸ່ມ ບໍລິສັດ ລາວມີໄຊ ເປັນຜູ້ດຳ ເນີນການເຊິ່ງໜ້າວຽກທີ່ຈະຕ້ອງໄດ້ປັບປຸງແມ່ນມີ ມຸງຫຼັງຄາດ້ວຍດິນຂໍ, ໃສ່ແພດານຫ້ອງຮຽນ, ໂບກຝາຫ້ອງຮຽນ, ຍົກລະດັບເດີ່ນໂຮງຮຽນ, ເຮັດຮ່ອງລະບາຍນ້ຳ, ເສີມແພດານຫ້ອງຮຽນ, ປັບປຸງຫ້ອງນ້ຳ, ປັບປຸງປະຕູໃຫຍ່ດ້ານໜ້າມຸງດ້ວຍດິນຂໍ ແລະ ປະຕູທາງເຂົ້ານ້ອຍ 3 ດ້ານ. ໃນການສ້ອມແປງ-ປັບປຸງຄັ້ງນີ້ແມ່ນໄດ້ຮັບການປະກອບທຶນຮອນຈາກພາຍໃນ ແລະ ຕ່າງປະເທດ ເຊິ່ງລວມມູນຄ່າທັງໝົດ 1.865.000.000 ( ນື່ງຕື້ແປດຮ້ອຍຫົກສິບຫ້າລ້ານກີບ ) ແລະ ໃຊ້ເວລາໃນການກໍ່ສ້າງທັງໝົດ 7 ເດືອນ ແລະ ໄດ້ສໍາເລັດລົງໃນວັນທີ 3 ເດືອນ ມີຖຸນາ 2019 ນີ້.
ໂອກາດດຽວກັນທ່ານ ບຸນຍູ້ ທຳມະວົງ ເຈົ້ານະຄອນ ໄກສອນພົມວິຫານ ກໍ່ໄດ້ກ່າວຮັບ ແລະ ສະແດງຄວາມຂອບໃຈຕໍ່ບັນດາບໍລິສັດ ແລະ ນັກທຸລະກິດ ເຮັດໃຫ້ໂຮງຮຽນທີ່ມີຊຸດໂຊມໃຫ້ກັບຄືນມາມີຄວາມສວຍສົດງົດງາມຄືແຕ່ກ່ອນ ທັງນີ້ຍ້ອນຄວາມຕັດສິນໃຈ ແລະ ເຈດຈຳນົງຂອງບັນດານັກທຸລະກິດທີ່ເຫັນຄວາມສຳຄັນໃນປະຫວັດສາດ ກໍ່ຄື ອາຄານດັ່ງກ່າວເຄີຍເປັນບ່ອນສຶກສາຮໍ່າຮຽນຂອງປະທານ ໄກສອນ ພົມວິຫານ ເຊິ່ງເປັນໜຶ່ງອະນຸສອນສະຖານມູນເຊື້ອທາງປະຫວັດສາດ ແລະ ເປັນບ່ອນທັດສະນະສຶກສາຄົ້ນຄວາມຮໍ່າຮຽນຂອງລູກຫຼານພາຍໃນ ນະຄອນໄກສອນ ພົມວິຫານ ໂດຍອາຄານດັ່ງກ່າວແມ່ນຈະມອບຕໍ່ໃຫ້ຫ້ອງການສຶກສາທິການ-ກິລາ ນະຄອນໄກສອນ ກໍ່ຄືຜູ້ອຳການໂຮງຮຽນ, ອຳນາດການປົກຄອງບ້ານເປັນຜູ້ບົວລະບັດຮັກສາ ແລະ ນຳໃຊ້ໃຫ້ເກີດປະໂຫຍດສູງສຸດ.
ຈາກນັ້ນບັນດາການນຳກໍ່ໄດ້ມອບໃບຍ້ອງຍໍໃຫ້ບັນດາບໍລິສັດ ແລະ ນັກທຸລະກິດທີ່ຮ່ວມອຸປະຖໍາໃນການກໍ່ສ້າງອາຄານຮຽນຫຼັງດັ່ງກ່າວແລ້ວ ກໍໍ່ຍ່າງຢ້ຽມຊົມເບິ່ງອາຄານຫ້ອງຮຽນ ແລະ ປູກຕົ້ນໄມ້ເພື່ອເປັນທີ່ລະລຶກເນື່ອງໃນວັນປູກຕົ້ນໄມ້ແຫ່ງຊາດອີກດ້ວຍ.
ແຫຼ່ງຂໍ້ມູນ: Midia Laos
Hits: 4
