ທີ່ຫໍປະຊຸມສະພາແຫ່ງຊາດ ນະຄອນຫລວງວຽງຈັນ, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ລາຍງານກ່ຽວກັບ ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມແຫ່ງຊາດ ແລະ ແຜນງົບປະ ມານແຫ່ງລັດ 4 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງແຜນການໃນ 6 ເດືອນທ້າຍປີ 2019 ໃນໂອ ກາດໄຂກອງປະຊຸມ ສະໄໝສາມັນ ເທື່ອທີ 7 ຂອງສະພາ ແຫ່ງຊາດ ຊຸດທີ VIII, ໂດຍທ່ານ ໄດ້ຍົກບາງສະພາບ ທີ່ພົ້ນເດັ່ນ ສຳລັບໄລຍະ 4 ເດືອນ ດັ່ງນີ້:
ຜົນຜະລິດເຂົ້ານາແຊງ ບັນລຸໄດ້ປະມານ 453.230 ໂຕນ ເທົ່າກັບ 10,3% ຂອງແຜນການຜະລິດເຂົ້ານາແຊງ, ສາລີອາຫານສັດ ປະມານ 30.000 ໂຕນ ເທົ່າກັບ 3% ຂອງແຜນການ, ມັນຕົ້ນ ປະມານ 113.056 ໂຕນ ເທົ່າກັບ 4,9% ຂອງແຜນການ; ການນໍາເຂົ້າ-ສົ່ງອອກ ບັນລຸໄດ້ 2.573 ລ້ານໂດລາສະຫະລັດ ເທົ່າກັບ 22,7% ຂອງແຜນການ ໃນນີ້ການນໍາເຂົ້າ ໄດ້ປະມານ 1.217 ລ້ານໂດລາສະຫະລັດ, ເທົ່າກັບ 21% ຂອງແຜນການ ການສົ່ງອອກ: ປະຕິບັດໄດ້ 1.356 ລ້ານໂດລາສະຫະລັດ ເທົ່າກັບ 24,5 % ຂອງແຜນການ.
ການຄຸ້ມຄອງລາຄາສິນຄ້າແມ່ນປະຕິບັດໄດ້ດີ ເຮັດໃຫ້ລາຄາສິນຄ້າເໜັງຕີງຢູ່ໃນລະດັບປົກກະ ຕິ ແລະ ສົມເຫດສົມຜົນ ໂດຍສະເພາະໃນໄລຍະເທສະການຕ່າງໆ.
ການຈໍລະຈອນສິນຄ້າ ສາມາດໄປທົ່ວເຖິງ ໃນຂອບເຂດທົ່ວປະເທດ ເຊິ່ງມີມູນຄ່າທັງໝົດ 15.500 ຕື້ກີບ, ທຽບໃສ່ແຜນປີປະຕິບັດໄດ້ 23,8%.
ສໍາລັບການຄຸ້ມຄອງລາຄາສິນຄ້າ ໄດ້ດຳເນີນໄປຄຽງຄູ່ກັບການສົ່ງເສີມອຸດສາຫະກໍາປຸງແຕ່ງ ແລະ ຫັດຖະກໍາ ຕິດພັນກັບການ ຂະຫຍາຍຕະຫລາດສົ່ງອອກຂອງ ສປປ ລາວ ໃນພາກພື້ນ ແລະ ສາກົນ, ສາມາດບັນລຸ ມູນຄ່າ ການຜະລິດ ອຸດສາຫະກໍາປຸງແຕ່ງ ແລະ ຫັດຖະກໍາ 3.240 ຕື້ກີບ ທຽບໃສ່ແຜນປີເທົ່າກັບ 26,1%.
ໄປພ້ອມກັນນີ້, ລັດຖະບານ ຍັງໄດ້ສົ່ງເສີມ ການຜະລິດ ເປັນສິນຄ້າ ຕິດພັນ ກັບຕະຫລາດ ໂດຍສ້າງຍີ່ຫໍ້ສິນຄ້າ ຂອງ ສປປ ລາວ ໃນນັ້ນ, ອັນພົ້ນເດັ່ນ ແມ່ນການອອກ ໃບອະນຸຍາດ ໃຫ້ແກ່ສິນຄ້າໜຶ່ງເມືອງໜຶ່ງຜະລິດຕະພັນ ຈໍານວນ 6 ຫົວໜ່ວຍ, 18 ຜະລິດຕະພັນ, ມາເຖິງປັດຈຸບັນລວມທັງໝົດ 171 ຫົວໜ່ວຍ ແລະ 647 ຜະລິດ ຕະພັນ.
ສ່ວນການຈັດຕັ້ງປະຕິບັດຄໍາສັ່ງເລກທີ 15/ນຍ ນັ້ນໄດ້ລົງ ກວດກາ ການລະເມີດ ແລະ ຍຸບເລີກໂຮງງານທີ່ຜິດລະບຽບ, ບໍ່ໄດ້ມາດຕະຖານ ເຮັດໃຫ້ສາມາດ ຫລຸດຈໍານວນ ໂຮງງານອຸດ ສາຫະກໍາໄມ້ລົງເຫລືອ 1.086 ໂຮງ ງານ ຈາກຈໍານວນ 1.595 ໃນປີ 2016.
ພ້ອມກັນນີ້, ກໍສາມາດສົ່ງເສີມການຜະລິດພາຍໃນ ແລະ ສົ່ງອອກຜະລິດຕະພັນໄມ້ສໍາເລັດຮູບ ທັງໝົດຈໍານວນ 140.800 ແມັດກ້ອນ ເປັນມູນຄ່າ ປະມານ 71,8 ລ້ານໂດລາສະຫະລັດ.
ດ້ານພະລັງງານ ແລະ ບໍ່ແຮ່ ແມ່ນສາມາດຜະລິດກະແສໄຟຟ້າ ໄດ້ 7.590 ລ້ານກິໂລວັດໂມງ, ມູນຄ່າປະມານ 3.750 ຕື້ກີບ, ທຽບໃສ່ໄລຍະດຽວຂອງປີຜ່ານມາ ເພີ່ມຂຶ້ນ 2,3% ໃນນີ້ ສົ່ງອອກຕ່າງປະເທດ 5.740 ລ້ານກິໂລວັດໂມງ ທຽບໃສ່ໄລຍະດຽວປີຜ່ານມາຫລຸດລົງ 7,7% ເທົ່າກັບ 23% ຂອງແຜນການ, ມູນຄ່າ 334 ລ້ານໂດລາ ເທົ່າກັບ 23% ຂອງແຜນການ; ຜະລິດແຮ່ທາດ ໄດ້ 3.199 ຕື້ກີບ ເທົ່າກັບ 26,9% ຂອງແຜນການ.
ນອກຈາກນີ້, ການສົ່ງເສີມການລົງທຶນຂອງພາກເອກະຊົນ ພາຍໃນ ແລະ ຕ່າງປະເທດ ຢູ່ສູນກາງ ແລະ ທ້ອງຖິ່ນ ສາມາດບັນລຸໄດ້ ຈໍານວນ 1.266 ໂຄງການ ດ້ວຍທຶນຈົດທະບຽນ 4.735 ລ້ານໂດລາສະຫະລັດ; ການຄຸ້ມ ຄອງເງິນຕາ ດຳເນີນໄປຢ່າງຮັດກຸມສົມຄວນ ແລະ ສາມາດຮັກສາໄດ້ ອັດຕາເງິນເຟີ້ ສະເລ່ຍໃນລະດັບ 1,5%, ປະລິມານເງິນ (M2) ຢູ່ໃນລະດັບ 9%, ເງິນກີບ ທຽບເງິນໂດລາສະຫະລັດ ສະເລ່ຍອ່ອນຄ່າ 0,4 % ແລະ ເງິນກີບທຽບກັບເງິນບາດ ອ່ອນຄ່າ 3,4% ທຽບໃສ່ທ້າຍປີຜ່ານມາ, ສ່ວນຕ່າງລະຫວ່າງອັດຕາແລກປ່ຽນທະນາຄານທຸລະກິດ ແລະ ຕະຫລາດ ສໍາລັບເງິນກີບທຽບໃສ່ເງິນໂດລາ ສະເລ່ຍຢູ່ໃນລະດັບ 1,7% ແລະ ເງິນກີບທຽບໃສ່ເງິນບາດ ສະເລ່ຍຢູ່ໃນລະດັບ 0,4%; ການຈັດຕັ້ງປະຕິບັດ ໂຄງການກໍ່ສ້າງພື້ນຖານໂຄງລ່າງຂະໜາດໃຫຍ່ ດຳເນີນໄປຕາມແຜນການ ເປັນຕົ້ນແມ່ນ:
ໂຄງການກໍ່ສ້າງທາງດ່ວນ (ຊ່ວງທີ1) ແຕ່ນະຄອນຫລວງວຽງຈັນ-ວັງວຽງ ຄວາມຍາວ 109 ກິໂລແມັດ ປັດຈຸ ບັນ ປັກຫລັກໝາຍເຂດນະຄອນຫລວງວຽງຈັນໄດ້ 80% ແລະ ຊົດເຊີຍສິ່ງກີດຂວາງໄດ້ 3,6 ກິໂລແມັດ; ການກໍ່ສ້າງທາງລົດໄຟລາວ-ຈີນ ປະຕິບັດໄດ້ 64,2%, ຊົດເຊີຍສິ່ງກີດຂວາງມາຮອດໄລຍະ 3 ເດືອນຕົ້ນປີ ໄດ້ 851,53 ຕື້ກີບ.
ແຫຼ່ງຂໍ້ມູນ: ສຳນັກຂ່າວສານປະເທດລາວ
