ພິທີປະກາດແຕ່ງຕັ້ງຕໍາແໜ່ງອະທິການບໍດີ ມະຫາວິທະຍາໄລແຫ່ງຊາດ ໄດ້ຈັດຂຶ້ນທີ່ຫ້ອງປະຊຸມ ຄະນະເສດຖະ ສາດ ແລະບໍລິຫານທຸລະກິດ ມະຫາວິທະຍາໄລແຫ່ງຊາດ ໂດຍການເປັນປະທານຂອງ ທ່ານ ຮສ. ປອ. ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະກີລາ, ມີທ່ານ ສຈ. ປອ. ສົມສີ ຍໍພັນໄຊ ອະທິການບໍດີ ມະຫາວິທະຍາໄລແຫ່ງຊາດ, ມີບັນດາທ່ານຮອງອະທິການ, ຫົວໜ້າຫ້ອງການຄະນະພັກ ແລະ ຫົວໜ້າກົມຈັດຕັ້ງພະນັກງານກະຊວງສຶກສາທິການ ແລະກີລາ, ພ້ອມດ້ວຍບັນດາຄະນະບໍດີ, ຮອງຄະນະບໍດີ, ຫົວໜ້າຫ້ອງການ, ຮອງຫົວໜ້າຫ້ອງການ, ຜູ້ອໍານວຍການສະຖາບັນ, ສູນ, ຫໍສະໝຸດກາງ, ໂຮງໝໍ ແລະໂຮງຮຽນພອນສະຫວັນ ເຂົ້າຮ່ວມ.
ໂອກາດນີ້, ທ່ານ ນາງ ວຽງແກ້ວ ພົມມະວົງ ຫົວໜ້າກົມຈັດຕັ້ງພະນັກງານກະຊວງສຶກສາທິການ ແລະກີລາ ໄດ້ຂຶ້ນຜ່ານດຳລັດຂອງນາຍົກລັດຖະມົນຕີ ສະບັບເລກທີ 130/ນ.ຍ ວົງວັນທີ 10/05/2019; ວ່າດ້ວຍການແຕ່ງ ຕັ້ງ ອະທິການບໍດີ ມະຫາວິທະຍາໄລແຫ່ງຊາດ, ໂດຍແຕ່ງຕັ້ງໃຫ້ ທ່ານ ສຈ. ປອ. ສົມສີ ຍໍພັນໄຊ ເປັນອະທິການບໍດີ ມະຫາວິທະຍາໄລແຫ່ງຊາດ.
ຂະນະດຽວກັນ, ທ່ານ ຄໍາພວງ ບຸນມີໄຊ ຫົວໜ້າຫ້ອງການຄະນະພັກກະຊວງສຶກສາທິການ ແລະກີລາ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະພັກມະຫາວິທະຍາໄລແຫ່ງຊາດ, ໂດຍແຕ່ງຕັ້ງໃຫ້ທ່ານ ຮສ. ປອ. ອຸດົມ ພອນຄໍາເພັງ ເປັນຮອງເລຂາຄະນະພັກ ຄະນະປະຈຳພັກ, ທ່ານ ຮສ. ປອ. ຮຸ່ງເພັດ ຈັນທະວົງ ເປັນປະທານກວດກາພັກ, ຄະນະປະຈໍາພັກ ມະຫາວິທະຍາໄລແຫ່ງຊາດ.
ໃນພິທີ ທ່ານ ຮສ. ປອ. ກອງສີ ແສງມະນີ ກໍໄດ້ກ່າວສະແດງຄວາມຍໍຍ້ອງຊົມເຊີຍໃນການປະຕິບັດ ໜ້າທີ່ຂອງຄະນະພັກ ຄະນະນຳມະຫາວິທະຍາໄລແຫ່ງຊາດໃນໄລຍະຜ່ານມາ, ພ້ອມນັ້ນ ທ່ານຍັງໄດ້ເນັ້ນໜັກກ່ຽວກັບການມີວິໄສທັດທີ່ກວ້າງໄກ, ມີການພັດທະນາຢ່າງຮອບດ້ານ ໃຫ້ເທົ່າທຽບເທົ່າກັບພາກພື້ນ ແລະສາກົນ;
ສືບຕໍ່ປັບປຸງກົງຈັດການຈັດຕັ້ງໃນແຕ່ລະຂັ້ນໃຫ້ເໝາະສົມ, ພັດທະນາດ້ານວິຊາໂດຍສະເພາະກໍແມ່ນໃຫ້ນັກສຶກສາມີຫົວຄິດປະດິດສ້າງ ພັດທະນາຜະລິດຕະພັນທີ່ເປັນເອກະລັກຂອງຕົນເອງ; ໃນໂອກາດດຽວກັນທ່ານກໍຍັງໄດ້ໃຫ້ຄໍາຊີ້ທິດເຍືອງທາງໃນການທາບທາມເອົາຄະນະນຳມະຫາວິທະຍາໄລແຫ່ງຊາດ (ຂັ້ນຮອງອະທິການບໍດີ) ເພື່ອມາບໍລິຫານໃນຕຳແໜ່ງຫວ່າງ ໃນອະນາຄົດອັນໃກ້ນີ້.
ຈາກນັ້ນ, ທ່ານ ສຈ. ປອ. ສົມສີ ຍໍພັນໄຊ ທີ່ຫາກໍໄດ້ຮັບການແຕ່ງຕັ້ງເປັນ ອະທິການບໍດີ ມຊ ກໍໄດ້ຂຶ້ນຮັບຄຳໂອວາດຕັກເຕືອນ ຈາກ ທ່ານ ຮອງລັດຖະມົນຕີ ກະຊວງສຶກສາທິການ ແລະກີລາ, ເຊິ່ງທ່ານໄດ້ໃຫ້ຄຳໝັ້ນສັນ ຍາ ຈະເຮັດໜ້າທີ່ໃນການບໍລິຫານ, ຊີ້ນຳໆພາໃຫ້ຈະເລີ່ນກ້າວໜ້າຕໍ່ໄປ.
ແຫຼ່ງຂໍ້ມູນ: National University of Laos
