ແຂວງບໍລິຄຳໄຊ ອະນຸດຍາກໃຫ້ ບໍລິສັດງົວເກົ້າໂຕ ພັດທະນາກະສິກຳ ບໍລິຄຳໄຊ ສຳປະທານເນື້ອທີ່ດິນຈຳນວນ 130 ເຮັກຕາ ສຳລັບໂຄງການພັດທະນາກະສິກຳ ປູກໝາກມັງກອນ ຢູ່ເຂດບ້ານນາຫີນ ເມືອງປາກກະດິງ .
ໂດຍໄດ້ພິທີເຊັນບົດບັນທຶກສຳປະທານທີ່ດິນ ໂດຍການຮ່ວມລົງນາມ ລະຫວ່າງທ່ານ ເລື່ອນວິໄລ ຈັນທະລາພັນ ຫົວໜ້າພະແນກແຜນການ ແລະ ການທຶນແຂວງ ແລະ ທ່ານ ເໜົາຮົງຕ່າວ ປະທານບໍລິສັດ ງົວເກົ້າໂຕ ພັດທະນາກະສິກຳ ບໍລິຄຳໄຊຈຳກັດ, ພ້ອມນີ້ຍັງມີພາກສ່ວນກ່ຽວຂ້ອງສອງຝ່າຍຮ່ວມລົງນາມ ເປັນສັກຂີພິຍານ.
ການເຊັນສັນຍາໃນຄັ້ງນີ້ ກໍເພື່ອເປັນເອກະສານຢັ້ງຢືນໄວ້ເປັນຫລັກຖານ ໃນການດຳເນີນການທັງສອງຝ່າຍ, ທັງເປັນການ ປະຕິບັດຕາມນິຕິກໍາຂອງຂັ້ນເທິງ ແລະ ແຜນພັດທະນາໂຄງການຂອງບໍລິສັດ ໃຫ້ຖືກຕ້ອງສອດຄ່ອງກັບລະບຽບກົດໝາຍທີ່ໄດ້ກຳນົດໄວ້.
ເຊິ່ງໂຄງການປູກໝາກມັງກອນ ຢູ່ເຂດບ້ານດັ່ງກ່າວ ກວມເອົາເນື້ອທີ່ທັງໝັດ 130 ເຮັກຕາ, ມູນຄ່າການລົງທຶນຕາມສັນຍາ 15 ລ້ານໂດລາສະຫະລັດ, ໄລຍະການສຳປະ ທານ 30 ປີ ນັບແຕ່ມື້ລົງນາມເປັນຕົ້ນໄປ.
ໂອກາດນີ້, ທ່ານ ເໜົາຮົງຕ່າວ ໄດ້ເວົ້າວ່າ:
ການປະຕິບັດໂຄງການປູກໝາກມັງກອນນີ້ ຈະເປັນໂຄງການໜຶ່ງທີ່ຈະສ້າງວຽກເຮັດງານທຳໃຫ້ແກ່ພໍ່ແມ່ປະຊາ ຊົນເຂດດັ່ງກ່າວ ແລະ ພາຍຫລັງລົງມືປູກໝາກມັງກອນ ປະມານ 2 ປີກໍສາມາດໃຫ້ຜົນຜະລິດໄດ້.
ແຫຼ່ງຂໍ້ມູນ: ສຳນັກຂ່າວສານປະເທດລາວ