ກະຊວງວິທະຍາສາດ ແລະ ເຕັກໂນໂລຊີ ໃນນາມເປັນຈຸດປະສານງານວຽກງານອາຊຽນດ້ານວິທະຍາສາດ ເຕັກໂນໂລຊີ ແລະ ນະ ວັດຕະກຳ ໄດ້ນຳພາ ຄະນະຜູ້ຕິດຕາມ ແລະ ນ້ອງນັກຮຽນຈາກໂຮງຮຽນ ມສ ວຽງຈັນ ແລະ ໂຮງຮຽນ ກຽດຕິສັກ ຈຳນວນ 10 ຄົນເຂົ້າຮ່ວມກິດຈະກຳ ໂຄງການວິທະຍາສາດໜຸ່ມນ້ອຍ ອາຊຽນບວກສາມ ຫລື ASEAN Plus Three Junior Science Odyssey (APT JSO) ເຊິ່ງເປັນໂຄງການໜຶ່ງທີ່ບັນດາປະເທດສະມາຊິກອາຊຽນ ພັດປ່ຽນກັນເປັນເຈົ້າພາບໃນແຕ່ລະປີ, ໃນປີ 2019 ນີ້ເປັນ ຄັ້ງທີ 8 ໂດຍແມ່ນ ຣາຊະອານາຈັກໄທເປັນເຈົ້າພາບ ຈັດຂຶ້ນໃນລະຫວ່າງວັນທີ 9-15 ມິຖຸນານີ້ ທີ່ແຂວງປະທຸມທານີພາຍໃຕ້ຫົວຂໍ້ “ບົດບາດຂອງຊາວໜຸ່ມໃນການສື່ສານເອົາວຽກວິທະຍາສາດເຂົ້າ ໃນການຈັດຕັ້ງປະຕິບັດເປົ້າ ໝາຍໃນການພັດທະນາແບບຍືນຍົງ”.
ການແຂ່ງຂັນກິດຈະກຳຄັ້ງນີ້ນ້ອງນັກຮຽນຈາກ ມສ ວຽງຈັນ ສາມາດຍາດໄດ້ 1 ຫລຽນເງິນ ຈາກການນຳສະ ເໜີ ໂພສເຕີ, ໂຮງຮຽນກຽດຕິສັກ ໄດ້ 1 ຫລຽນທອງແດງ ຈາກການເຮັດທົດລອງໃນຫ້ອງປະຕິບັດການ ແລະ ຕາງໜ້າຈາກ ມສ ວຽງຈັນ ແລະ ໂຮງຮຽນກຽດຕິສັກ ໄດ້ຮັບຫລຽນທອງແດງຄົນລະ 1 ຫລຽນ ຈາກການເຮັດວຽກເປັນກຸ່ມຮ່ວມກັບປະເທດອື່ນ ພ້ອມຕາງໜ້າຈາກ ໂຮງຮຽນກຽດຕິສັກ ໄດ້ຮັບລາງວັນ ກຽດຕິຍົດ 1 ລາງ ວັນ.
ການແຂ່ງຂັນດັ່ງກ່າວ ເພື່ອຊຸກຍູ້ສົ່ງເສີມໃຫ້ນັກຮຽນເກີດມີຄວາມສົນໃຈ ກ່ຽວກັບວິທະຍາສາດ ແລະ ເຕັກໂນໂລຊີຫລາຍຂຶ້ນດ້ວຍ ການກະຕຸ້ນໃຫ້ນັກຮຽນມີຄວາມຢາກຮູ້ ໂດຍຜ່ານການ ແລກປ່ຽນບົດຮຽນ, ປະສົບການ ແລະ ການເຮັດທົດລອງຕົວຈິງ, ພ້ອມທັງເປັນການປູກຈິດສຳນຶກໃຫ້ນ້ອງນັກຮຽນມີຄວາມມັກຮັກໃນອາຊີບຕ່າງໆຂອງຂະແໜງການກ່ຽວກັບວິທະຍາສາດ ແລະ ເຕັກໂນໂລຊີ ໃນອະນາຄົດ.
ແຫຼ່ງຂໍ້ມູນ: ໜັງສືພິມລາວພັດທະນາ
