ພິທີມອບ-ຮັບໂຄງການກໍ່ສ້າງໂຮງຮຽນມັດທະຍົມສຶກສາຕອນຕົ້ນສົງ ເມືອງແກ່ນທ້າວ ແຂວງໄຊຍະບູລີ ຈັດຂຶ້ນວັນທີ 2 ກັນຍາ 2019 ຢູ່ໂຮງຮຽນດັ່ງກ່າວ (ບ້ານຈອມແກ້ວ) ໂດຍມີພະອາຈານ ມະຫາພູສະຫວັນ ພັນທະບົວລີ ຫົວໜ້າກຳມາທິການສຶກສາສົງສູນກາງ ພະອາຈານ ບຸນທຽນ ພຸດທະວະໂຣ ປະທານອົງການພຸດທະສາສະໜາສຳພັນລາວ ແຂວງໄຊຍະບູລີ ພະອາຈານ ດ໋ອງນິມ ປະທານອົງການກູດແຮນສ໌ ສ ເກົາຫຼີ ແມ່ຊີ ອີມແດ່ ຜູ້ໃຫ້ທຶນຊ່ວຍເຫຼືອ ປະທານອົງການກູດແຮນສ໌ ປະຈຳລາວ ພ້ອມດ້ວຍຜູ້ຕາງໜ້າຈາກກະຊວງສຶກສາທິການ ແລະ ກີລາ ກະຊວງການຕ່າງປະເທດ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສົມພອນ ຈີນດາວົງ ຫົວໜ້າຫ້ອງການສຶກສາທິການ ແລະ ກີລາ ເມືອງແກ່ນທ້າວ ກ່າວວ່າ:
ໂຄງການກໍ່ສ້າງໂຮງຮຽນດັ່ງກ່າວ ໄດ້ຮັບການຊ່ວຍເຫຼືອລ້າຈາກອົງການກູດແຮນສ໌ ສ ເກົາຫຼີ ໃນປີ 2018 ມູນຄ່າ 187.000 ໂດລາສະຫະລັດ ຫຼື ປະມານ 1,49 ຕື້ກີບ ເປັນອາຄານ 1 ຊັ້ນ ເຮັດດ້ວຍເບຕົງເສີມເຫຼັກ ມຸງດ້ວຍກະເບື້ອງສີ ຂະໜາດ 32X33 ແມັດ ມີເນື້ອທີ່ 1.056 ຕາແມັດ ປະກອບມີ 10 ຫ້ອງ ໃນນີ້ ມີ 7 ຫ້ອງຮຽນ ແຕ່ລະຫ້ອງມີຂະໜາດ 8X7 ແມັດ ສາມາດບັນຈຸນັກຮຽນໄດ້ 350 ອົງ ມີ 1 ຫ້ອງສະໝຸດ 1 ຫ້ອງການ ແລະ 1 ຫ້ອງຄອມພິວເຕີ ແລະ ຫ້ອງນ້ຳ 8 ຫ້ອງ ໄດ້ເລີ່ມກໍ່ສ້າງແຕ່ວັນທີ 23 ພະຈິກ 2018 ແລະ ສຳເລັດວັນທີ 19 ສິງຫາ 2019 ໂດຍແມ່ນບໍສິສັດ NCG ຈຳກັດ ເປັນຜູ້ຮັບເໝົາ.
ພະອາຈານ ດ໋ອງນິມ ກ່າວວ່າ:
ໂຮງຮຽນດັ່ງກ່າວ ແມ່ນໂຮງຮຽນທີ 14 ທີ່ພວກເຮົາໄດ້ສ້າງຂຶ້ນ ແລະ ເປັນໂຮງຮຽນພຸດທະສາສະໜາແຫ່ງທຳອິດຂອງພວກເຮົາ ເຊິ່ງຢູ່ເຂດນີ້ສະຖານທີ່ການສຶກສາບໍ່ພຽງພໍສຳລັບນັກຮຽນທີ່ຮຽນຈົບຊັ້ນປະຖົມສຶກສາ ເພື່ອໄປຮຽນຕໍ່ມັດທະຍົມສຶກສາ ໂດຍສະເພາະ ນັກຮຽນສຳມະເນນທີ່ບໍ່ສາ ມາດຈ່າຍຄ່າຮຽນໄດ້ ໂຮງຮຽນພຸດທະສາສະໜາຈຶ່ງເປັນໂຮງຮຽນມັດທະຍົມສຶກສາແຫ່ງດຽວເທົ່ານັ້ນ ທີ່ຈະຊ່ວຍສ້າງຄວາມກ້າວໜ້າໃຫ້ສຳມະເນນນັກຮຽນໄດ້ ແລະ ຫວັງຢ່າງຍິ່ງວ່າ ພາຍຫຼັງການມອບ-ຮັບຄັ້ງນີ້ ທຸກພາກສ່ວນຈະໃຫ້ຄວາມສຳຄັນບູລະນະຮັກສາໂຮງຮຽນໃຫ້ສາມາດນຳໃຊ້ໄດ້ຢ່າງຍາວນານ.
ພະອາຈານ ບຸນທຽນ ພຸດທະວະໂຣ ຕາງໜ້າພະສົງສຳມະເນນ ການນຳພັກ-ລັດ ຊາວພຸດພາຍໃນແຂວງ ເວົ້າລວມ ເວົ້າສະເພາະຊາວເມືອງແກ່ນທ້າວ ສະແດງຄວາມຂອບໃຈມາຍັງອົງການກູດສ໌ແຮນ ພ້ອມທັງຈະເອົາໃຈໃສ່ປົກປັກຮັກສາໂຮງຮຽນແຫ່ງນີ້ ເພື່ອໃຫ້ນຳໃຊ້ປະໂຫຍດຢ່າງຍາວນານ.
ແຫຼ່ງຂໍ້ມູນ: ໜັງສືພິມວຽງຈັນໃໝ່