ກອງປະຊຸມປຶກສາຫາລືການສົ່ງເສີມການຜະລິດພືດຜັກ ແລະ ການເຂົ້າເຖິງຕະຫຼາດ ຈັດຂຶ້ນຢູ່ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ (ນວ) ໂດຍມີທ່ານ ອາດສະພັງທອງ ສີພັນດອນ ຮອງເຈົ້າຄອງ ນວ ທ່ານ ເບີລິນ ເພັດຈັນທະຣາດ ຫົວໜ້າພະແນກອຸດສາຫະກຳ ແລະ ການຄ້າ ນວ ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະ ປ່າໄມ້ ນວ ພ້ອມດ້ວຍຂະແໜງການກ່ຽວຂ້ອງ ຜູ້ປະກອບການ ແລະ ກຸ່ມກະສິກຳອິນຊີ ເຂົ້າຮ່ວມ.
ເພື່ອຈັດຕັ້ງປະຕິບັດຂໍ້ຕົກລົງຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງຄະນະສະເພາະກິດ ສົ່ງເສີມການຜະລິດ ແລະ ຊົມໃຊ້ຜະລິດຕະພັນທີ່ຜະລິດໄດ້ຢູ່ພາຍໃນ ແລະ ການຄຸ້ມຄອງການນຳເຂົ້າສິນຄ້າອຸປະໂພກ ແລະ ບໍລິໂພກ ຂໍ້ຕົກລົງວ່າດ້ວຍການແຕ່ງຕັ້ງຄະນະປະສານງານໃນວຽກງານດັ່ງກ່າວ ຂັ້ນ ນວ ໃຫ້ມີປະສິດທິຜົນ.
ທ່ານນາງ ວັນມະນີ ພິມມະສານ ຮອງຫົວໜ້າພະແນກອຸດສາຫະກຳ ແລະ ການຄ້າ ນວ ໄດ້ລາຍງານຄວາມຄືບໜ້າການຈັດຕັ້ງປະຕິບັດຂໍ້ຕົກລົງ ແຕ່ວັນທີ 25 ກັນຍາ-25 ຕຸລາ 2019 ວ່າ:
ການກວດກາສິນຄ້ານຳເຂົ້າໄດ້ກວດກາປະເພດສິນຄ້າພືດຜັກນຳເຂົ້າ ຜ່ານດ່ານຂົວມິດຕະພາບ ລາວ-ໄທ 11 ລາຍການ 1.990 ກິໂລ ມູນຄ່າ 18 ລ້ານກວ່າກີບ ຜ່ານການກວດກາພົບເຫັນສິນຄ້ານອກລະບົບ ແລະ ມີສານຕົກຄ້າງ ຈຶ່ງຈັດພິທີທຳລາຍຢູ່ບ້ານທ່າມ່ວງ ເມືອງຫາດຊາຍຟອງ ໄດ້ຕິດຕາມກວດກາສິນຄ້ານຳເຂົ້າຕາມເສັ້ນທາງເລກທີ 13 ໃຕ້.
ພົບລົດບັນທຸກສິນຄ້າປະເພດຫົວຜັກບົ່ວ ຜັກທຽມທີ່ນຳເຂົ້າຈາກປະເທດເພື່ອນບ້ານ ຜ່ານການກວດກາດ້ານເອກະສານມີໃບຢັ້ງຢືນເສຍພາສີ ມີການຢັ້ງຢືນຈາກຂະແໜງກະສິກຳ ແຕ່ການແຈ້ງເສຍພາສີເກີນ 6.625 ກິໂລ ຈຶ່ງໄດ້ປະຕິບັດຕາມລະບຽບ ກວດກາລົດເມສາຍຕ່າງປະເທດອຸດອນ-ຂອນແກ່ນ 2 ຄັ້ງ ພົບເຫັນສິນຄ້າປະເພດດູກໝູ ແລະ ເຄື່ອງໃນໝູ 192 ກິໂລ ບໍ່ມີເຈົ້າຂອງ ຈຶ່ງໄດ້ຢຶດມາເພື່ອທຳລາຍ ນອກນີ້ ຍັງໄດ້ເກັບກຳການຈຳໜ່າຍພືດຜັກກະສິກຳອິນຊີຢູ່ ນວ ປັດຈຸບັນມີ 6 ຈຸດ ໃນ 5 ເມືອງ.
ສຳລັບແຜນການຕໍ່ໜ້າຈະສືບຕໍ່ກວດກາການນຳເຂົ້າສິນຄ້າປະເພດພືດຜັກ ໝາກໄມ້ ສັດ ຕາມບັນດາດ່ານ ແລະ ຕະຫຼາດ ປະສານສົມທົບກັບພະແນກກະສິກຳ ແລະ ປ່າໄມ້ ນວ ເພື່ອຊຸກຍູ້ສົ່ງເສີມກຸ່ມຜະລິດພືດຜັກກະສິກຳອິນຊີ ແລະ ຜັກທົ່ວໄປ ໃຫ້ສະໜອງພືດຜັກເຂົ້າຈຳໜ່າຍໃນຕະຫຼາດໃຫ້ພຽງພໍກັບຄວາມຕ້ອງການຂອງຜູ້ຊົມໃຊ້ໃນແຕ່ລະວັນ.
ແຫຼ່ງຂໍ້ມູນ: ນສພ ວຽງຈັນໃໝ່