ບໍລິສັດ ປາກຊ່ອງພັດທະນາຂາເຂົ້າ-ຂາອອກ ຈຳກັດ ໜຶ່ງໃນ 9 ບໍລິສັດທີ່ເດັ່ນຂອງລາວເຮົາທີ່ໄດ້ຮັບລາງວັນ ASEAN BUSINESS AND INVESTMENT SUMMIT 2019 ຮ່ວມກັບຫົວໜ່ວຍທຸລະກິດບັນດາປະເທດສະມາຊິກອາຊຽນ ແລະ ອາຊຽນບວກ ເຊິ່ງພິທີມອບ-ຮັບລາງວັນດັ່ງກ່າວໄດ້ຈັດຂຶ້ນວັນທີ 2 ພະຈິກ 2019 ທີ່ນະຄອນ ຫຼວງບາງກອກ ປະເທດໄທ ອັນໄດ້ນຳເອົາຊື່ສຽງມາໃຫ້ປະເທດຊາດ ກໍຄື ທຸລະກິດຂອງລາວ.
ທ່ານ ອິນແປງ ຊາມຸນຕີ ປະທານບໍລິສັດ ປາກຊ່ອງພັດທະນາຂາເຂົ້າ-ຂາອອກ ຈຳກັດ ໃຫ້ສຳພາດວັນທີ 3 ພະຈິກ 2019 ວ່າ:
ການໄປຮັບລາງວັນຄັ້ງນີ້ແມ່ນມີຫຼາຍສາຂາລາງວັນ ສຳລັບບໍລິສັດ ປາກຊ່ອງພັດທະນາຂາເຂົ້າ-ຂາອອກ ຈຳກັດ ແມ່ນໄດ້ຮັບລາງວັນບຸລິມະສິດບໍລິສັດດີເດັ່ນທາງດ້ານກະສິກຳ ແລະ ການຊ່ວຍເຫຼືອພັດທະນາສັງຄົມ ເນື່ອງຈາກບໍລິສັດດຳເນີນທຸລະກິດກ່ຽວກັບການກະສິກຳ ທັງເປັນຜູ້ຜະລິດ ເກັບຊື້ ສົ່ງອອກ ແລະ ພັດທະນາຊ່ວຍເຫຼືອສັງຄົມຕາມນະໂຍບາຍຂອງລັດຖະບານສອງບວກສາມ ບໍລິສັດໄດ້ຮັບກຽດເຂົ້າໄປຈັບມືແຂ່ງຂັນກັບບັ້ນຮັກຊາດ ແລະ ພັດທະນາຊົນນະບົດ ເພື່ອລຶບລ້າງຄວາມທຸກຍາກຂອງປະຊາຊົນບັນດາເຜົ່າ ແລະ ໃນທ້າຍປີ 2020.
ລັດຖະບານຈະໄດ້ສະຫຼຸບຜົນງານທີ່ບໍລິສັດທີ່ເຮັດແທ້ທຳຈິງໃນໄລຍະຜ່ານມາ ແລະ ບໍລິສັດ ປາກຊ່ອງພັດທະນາຂາເຂົ້າ-ຂາອອກໄດ້ລົງທຶນສະໜອງວັດຖຸໃຫ້ປະຊາຊົນປະເພດພືດຜັກເມືອງໜາວ ຈະມີຜັກກາດຂາວ ກະລ່ຳປີ ກ້ວຍ ຖົ່ວດິນ ມັນດ້າງ ໝາກອຶ ໝາກຂາມ ໝາກນາວ ໝາກເຜັດ ແລະ ອື່ນໆ ມີພື້ນຖານການຜະລິດຢູ່ເມືອງປາກຊ່ອງ ແຂວງຈຳປາສັກ ເມືອງທ່າແຕງ ແຂວງເຊກອງ ແລະ ເມືອງເລົ່າງາມ ແຂວງສາລະວັນ.
ໂດຍບໍລິສັດເນັ້ນພືດກະສິກຳອິນຊີປອດສານພິດ ນອກນີ້ ບໍລິສັດຍັງມີທຸລະກິດມັນຕົ້ນທີ່ມີລາຄາຄ້ຳປະກັນໃຫ້ຊາວສວນ ແລະ ໂຄງການນີ້ກໍເປັນໂຄງການໜຶ່ງທີ່ປະຕິບັດຕາມນະໂຍບາຍຂອງລັດຖະບານວາງອອກເຊັ່ນດຽວກັບຮູບແບບສອງບວກສາມ ຄືສອງຊາວສວນຈະເປັນເນື້ອທີ່ດິນ ແລະ ແຮງງານທີ່ພັກ-ລັດຈັດສັນໃຫ້ເຮັດການຜະລິດ ສະເພາະບໍລິສັດສາມແມ່ນຈະມີປັດໄຈການຜະລິດ ຮັບຜິດຊອບເຝິກອົບຮົມເຕັກນິກວິຊາການໃນການປູກ ການບົວລະບັດຮັກສາ ແລະ ການເກັບຜົນຜະລິດໃຫ້ຊາວສວນ.
ເປັນການຕະຫຼາດທີ່ໄດ້ເຮັດສັນຍາກັບຝ່າຍຕະຫຼາດທີ່ເປັນສັນຍາຂາຍ ມີສັນຍາເກັບຊື້ກັບຊາວສວນທີ່ມີເງິນຄ້ຳປະກັນກັບຊາວສວນ 30% ເຊິ່ງກ່ອນທີ່ຈະໄດ້ຮັບລາງວັນອັນຊົງກຽດຄັ້ງນີ້ບໍລິສັດໄດ້ໃຊ້ເວລາມາ 20 ກວ່າປີ ແລະ ກຸ່ມປະເທດອາຊຽນກໍໄດ້ເລືອກເອົາບໍລິສັດ ປາກຊ່ອງພັດທະນາຂາເຂົ້າ-ຂາອອກ ເປັນບໍລິສັດໜຶ່ງທີ່ໄປຮ່ວມຮັບລາງວັນກັບນັກທຸລະກິດ 16 ປະເທດ ແຕ່ລາງວັນທີ່ເນັ້ນທຸລະກິດເລື່ອງກະສິກຳໃນອາຊຽນຈະໄດ້ 3 ປະເທດຄື: ໄທ ລາວ ແລະ ມາເລເຊຍ ນອກນັ້ນ ແມ່ນລາງວັນອື່ນໆ ດັ່ງນັ້ນ ພະນັກງານຜູ້ບໍລິຫານບໍລິສັດ ແລະ ຊາວສວນກຸ່ມປາກຊ່ອງຈະຕ້ອງໄດ້ຮັກສາລາງວັນນີ້ນຳກັນໃຫ້ຍືນຍົງຕະຫຼອດໄປ.
ແຫຼ່ງຂໍ້ມູນ: ນສພ ວຽງຈັນໃໝ່