ປະຈຸບັນສະພາບເສດຖະກິດຢູ່ພາຍໃນ ແລະ ຕ່າງປະເທດໄດ້ມີການປ່ຽນແປງໂດຍເປັນສາເຫດໜຶ່ງທີ່ເຮັດໃຫ້ລາຄານໍ້າມັນເຊື້ອໄຟໄດ້ມີການເໜັງຕີງປັບຂຶ້ນລົງຢູ່ຕະຫຼອດເວລາ ຊຶ່ງໄດ້ມີຜົນກະທົບຕໍ່ຜູ້ໃຊ້ຍານພາຫະນະລົດເປັນຕົ້ນລົດໃຫຍ່ສະນັ້ນທາງບໍລິສັດວຽງຈັນມໍເຕີມາເກັດຈຶ່ງໄດ້ນຳລົດໄຟຟ້າເອັມຈີເຂົ້າມາຈຳໜ່າຍຢູ່ຕະຫຼາດລາວເປັນລົດທີ່ປະຢັດລາຍຈ່າຍໄດ້ເຖິງ 50 ເທົ່າ ເມື່ອທຽບກັບລົດໃຫຍ່ທີ່ມີຈັກໃຊ້ນໍ້າມັນດຽວນີ້ມີຍອດສັ່ງຈອງແລ້ວ 10 ກວ່າຄັນ ຄາດຮອດມື້ນຳເຂົ້າມາທ້າຍປີອາດຮອດ 50 ຄັນ.
ທ່ານ ດາວວົງ ແກ້ວມະນີວົງ ຜູ້ອຳນວຍການບໍລິສັດວຽງຈັນມໍເຕີມາເກັດກ່າວວ່າ:
ບໍລິສັດແມ່ນເປັນຕົວແທນຈຳໜ່າຍລົດເອັມຈີພຽງຜູ້ດຽວໃນລາວປະກອບມີລົດ MG3, MG5, MG6, MG HS, MG ZS, ຊຶ່ງຍອດການຈຳໜ່າຍໃນໄລຍະ 2-3 ປີມານີ້
ເຫັນວ່າຫຼຸດລົງເຄິ່ງໜຶ່ງຍ້ອນສະພາບເສດຖະກິດຂະຫຍາຍຕົວຊ້າ ແລະບັນຫາອື່ນໆ ດັ່ງນັ້ນທາງບໍລິສັດຈຶ່ງຈະນຳລົດໄຟຟ້າເຂົ້າມາໃຫ້ລູກຄ້າໄດ້ຊົມໃຊ້ເປັນຜະລິດຕະພັນໃໝ່ຂອງເອັມຈີລຸ້ນ MG ZS EV ໃຊ້ ລະບົບໄຟຟ້າ 100% ປະຢັດລາຍຈ່າຍໄດ້ຫຼາຍໂດຍສາກໄຟເທື່ອໜຶ່ງບໍ່ເຖິງ 50 ພັນກີບແລ່ນໄດ້ປະມານ 360 ກິໂລແມັດ ໂດຍເທົ່າກັບລົດມີເຄື່ອງຈັກໃສ່ນໍ້າມັນເຕັມຖັງ, ລົດໄຟຟ້າລຸ້ນ MG ZS EV ນີ້ເປັນລົດທີ່ໃຊ້ໄຟຟ້າ 100% ຊຶ່ງຈະຊ່ວຍໃຫ້ລູກຄ້າກໍຄືຜູ້ຊົມໃຊ້ສາມາດປະຢັດລາຍຈ່າຍໄປເຖິງ 50 ເທົ່າ ເມື່ອທຽບໃສ່ລົດທີ່ມີເຄື່ອງຈັກໃຊ້ນໍ້າມັນເນື່ອງຈາກວ່າລົດດັ່ງກ່າວບໍ່ມີຈັກບໍ່ຈຳເປັນຕ້ອງໄດ້ໃສ່ນໍ້າມັນເຄື່ອງ, ລ້າງຈັດ ແລະອື່ນໆ.
ທ່ານ ດາວວົງ ແກ້ວມະນີວົງ ກ່າວຕື່ມວ່າ:
ລົດລະບົບໄຟຟ້າຂອງເອັມຈີແມ່ນໄດ້ນຳເຂົ້າມາແລ້ວ 1 ຄັນ ເພື່ອໃຫ້ ລູກຄ້າໄດ້ທົດລອງຂັບຂີ່ແຕ່ມາຮອດປະຈຸບັນລູກຄ້າສັ່ງຈອງແລ້ວ 10 ກວ່າຄັນຄາດຮອດມື້ນຳເຂົ້າຄືທ້າຍປີນີ້ຈະມີຮອດ 50 ຄັນ ສຳລັບລາຄາລົດດັ່ງກ່າວຢູ່ທີ່ 35 ພັນໂດລາຫຼື ປະມານ 300 ລ້ານ ກວ່າກີບ ຮັບປະກັບເຖິງ 6 ປີ ໄລຍະທາງ 1,8 ແສນກິໂລແມັດ ຊຶ່ງທ່ານໃດທີ່ສົນໃຈລົດດັ່ງກ່າວກໍສາມາດເຂົ້າໄປເບິ່ງໄດ້ທີ່ບໍລິສັດວຽງຈັນມໍເຕີມາເກັດໝາຍເລກໂທລະສັບ 021 514 111.
ແຫຼ່ງຂໍ້ມູນ: ຂຽນໂດຍ: ສະເຫຼີມໄຊ, ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ