ການເກັບຄ່າຜ່ານທາງ16 A (ແຕ່ຂົວປາກເຊ ຫາ ຊາຍແດນວັງເຕົ່າ) ແຂວງຈຳປາສັກ ເປັນປະເດັດຮ້ອນທີ່ສັງຄົມຈົ່ມວ່າມາດົນນານ; ຂະນະທີ່ລັດຖະບານກໍໄດ້ພະຍາຍາມແກ້ຈົນມີການແຕ່ງຕັ້ງຄະນະສະເພາະກິດຂຶ້ນມາ ເພື່ອແກ້ໄຂບັນຫາດັ່ງກ່າວໃຫ້ເໝາະສົມທີ່ສຸດ.
ຫຼ້າສຸດສໍານັກງານນາຍົກລັດຖະມົນຕີ ໄດ້ອອກແຈ້ງການເລກທີ 1983 ລົງວັນທີ 12 ພະຈິກ 2019 ເລື່ອງ ທິດຊີ້ນຳກ່ຽວກັບຜົນການກວດກາໂຄງການກໍ່ສ້າງເສັ້ນທາງເລກທີ 16 A (ແຕ່ຂົວປາກເຊ ຫາ ຊາຍແດນວັງເຕົ່າ) ແລະ (ແຕ່ສາມແຍກສາລາຂຽວຫຼັກ 9 ຫາ ທາງແຍກເລກທີ 16 A ຢູ່ເມືອງປາກຊ່ອງ ແຂວງຈໍາປາສັກ) ໂດຍອີງຕາມເອກະສານລາຍງານສະບັບເລກທີ 2015/ກຜທ.ລທ5, ລົງວັນທີ 6 ກັນຍາ 2019 ຂອງກະຊວງແຜນການ ແລະ ການລົງທຶນ; ອີງຕາມການຕົກລົງ ແລະ ທິດຊີ້ນໍາຂອງກອງປະຊຸມນາຍົກ-ຮອງນາຍົກລັດຖະມົນຕີ ຄັ້ງວັນທີ 6 ພະຈິກ 2019.
ຫ້ອງວ່າການສໍານັກງານນາຍົກລັດຖະມົນຕີ ຂໍຖືເປັນກຽດແຈ້ງການຕົກລົງ ແລະ ທິດຊີ້ນໍາຂອງກອງປະຊຸມນາຍົກ-ຮອງນາຍົກລັດຖະມົນຕີ ໃຫ້ຮູ້ວ່າ:
1). ເຫັນດີຮັບຮອງດ້ານຫຼັກການເອົາຜົນການເຈລະ ຈາກ່ຽວກັບການເກັບຄ່າຜ່ານທາງ ແລະ ອາຍຸສໍາປະທານໂຄງການກໍ່ສ້າງເສັ້ນທາງເລກທີ 16 A (ແຕ່ຂົວປາກເຊ-ຊາຍແດນວັງເຕົ່າ) ຕາມການສະເໜີຂອງກະຊວງແຜນການ ແລະ ການລົງທຶນ
ຄື: ເພີ່ມອາຍຸສໍາປະທານໂຄງການດັ່ງກ່າວຕື່ມອີກ 8 ປີ ລວມອາຍຸສໍາປະທານເປັນ 50 ປີ ແລະ ໃຫ້ເກັບຄ່າບໍລິການຜ່ານທາງຫຼຸດລົງ 25% ຂອງລາຄາປີ້ຜ່ານທາງຂອງລົດແຕ່ລະປະເພດທີ່ກໍາລັງເກັບໃນປັດຈຸບັນ.
ພ້ອມກັນນັ້ນ, ກໍ່ໃຫ້ກະຊວງແຜນການ ແລະ ການລົງທຶນ ປຶກສາຫາລື ແລະ ເຈລະຈາກັບບໍລິສັດ ຕື່ມກ່ຽວກັບການໃຫ້ນະໂຍບາຍການເກັບຄ່າຜ່ານທາງຕໍ່ປະຊາຊົນທີ່ອາໄສຢູ່ລຽບຕາມສາຍທາງ ແລະ ໃຫ້ຄົ້ນຄວ້າກ່ຽວກັບການຕິດຕັ້ງຈຸດເກັບເງິນເພີ່ມຕື່ມອີກຈຸດໜຶ່ງໃສ່ລະຫວ່າງກາງຂອງເສັ້ນທາງດັ່ງກ່າວຕື່ມ ເພື່ອເຮັດແນວໃດໃຫ້ມີຄວາມຍຸຕິທໍາ ແລະ ຫຼຸດຜ່ອນຫາງສຽງຈົ່ມວ່າຈາກປະຊາຊົນ.
2). ສໍາລັບເສັ້ນທາງເລກທີ 16 ແຕ່ສາມແຍກສາລາຂຽວຫຼັກ 9 ຫາ ທາງແຍກຫຼັກ 21 ເມືອງບາຈຽງຈະເລີນສຸກ ຂອງບໍລິສັດ ດວງດີ ກໍ່ສ້າງຂົວ-ທາງ ຈໍາກັດຜູ້ດຽວນັ້ນ, ດ້ານຫຼັກການເຫັນດີໃຫ້ຢຸດຕິການກໍ່ສ້າງ ແລະ ໃຫ້ໄລ່ລຽງມູນຄ່າ ທີ່ບໍລິສັດໄດ້ກໍ່ສ້າງສໍາເລັດແລ້ວຜ່ານມາໃຫ້ເປັນເອກະພາບ ແລະ ມີຄວາມຊັດເຈນຕາມໜ້າວຽກທີ່ໄດ້ກໍ່ສ້າງສໍາເລັດຕົວຈິງ.
ຈາກນັ້ນ, ໃຫ້ກະຊວງແຜນການ ແລະ ການລົງ ທຶນເປັນໃຈກາງສົມທົບກັບພາກສ່ວນທີ່ກ່ຽວຂ້ອງເຈລະຈາກ່ຽວກັບຮູບການຊໍາລະຄືນໃຫ້ບໍລິສັດ, ແລ້ວລາຍງານຜົນການເຈລະຈາໃຫ້ລັດຖະບານພິຈາລະນາ.
3). ສໍາລັບໂຄງການກໍ່ສ້າງເສັ້ນທາງແຕ່ສາມແຍກຫຼັກ 21 ເມືອງບາຈຽງຈະເລີນສຸກ ຫາ ທາງແຍກ 16 A ເມືອງປາກຊ່ອງ, ແຂວງຈໍາປາສັກ ຂອງກຸ່ມບໍລິສັດ ຮຸ້ນສ່ວນພາກໃຕ້ລາວ ຈໍາກັດ, ໃຫ້ກະຊວງແຜນການ ແລະ ການລົງທຶນ
ໃນນາມຄູ່ສັນຍາເປັນໃຈກາງສົມທົບກັບພາກສ່ວນກ່ຽວຂ້ອງເຈລະ ຈາກັບບໍລິສັດຕາມທິດໃຫ້ສືບຕໍ່ເຮັດແບບ BOT, ແຕ່ໃຫ້ເກັບຄ່າບໍລິການຜ່ານທາງຫຼຸດລົງໃນລະດັບໃດໜຶ່ງ (ຢ່າງໜ້ອຍກໍໃຫ້ຫຼຸດລົງເທົ່າກັນກັບຄ່າຜ່ານທາງຂອງເສັ້ນທາງແຕ່ຂົວປາກເຊ-ຊາຍແດນວັງເຕົ່າ) ແລະ ລັດອາດເພີ່ມອາຍຸສໍາປະທານໃຫ້ບໍລິສັດຕື່ມຕາມຄວາມເໝາະສົມ.
ລາຍລະອຽດຕາມແຈ້ງການ
ແຫຼ່ງຂໍ້ມູນ: ຊຸບຊິບອັບເດດ
