ກອງປະຊຸມປຶກສາຫາລື ກ່ຽວກັບການຄົ້ນຄ້ວາແຜນຍຸດທະສາດ ການພັດທະນາເສດຖະກິດຂອງແຂວງ 2021-2030 ໄດ້ຈັດຂຶ້ນຢູ່ຫ້ອງປະຊຸມຫ້ອງວ່າການແຂວງບໍລິຄຳໄຊ ໂດຍພາຍໃຕ້ການເປັນປະທານຂອງທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ, ມີຄະນະປະຈຳພັກແຂວງ, ຫົວໜ້າ, ຮອງຫົວໜ້າຈາກພະແນກການທີ່ກ່ຽວຂ້ອງ ແລະ ຜູ້ຕາງໜ້າຈາກບັນດາເມືອງພາຍໃນແຂວງ ເຂົ້າຮ່ວມ.
ໃນພິທີ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ຜູ້ຊີ້ນຳວຽກງານເສດຖະກິດ ໄດ້ລາຍງານກ່ຽວກັບແຜນຍຸດທະສາດການພັດທະນາເສດຖະກິດຂອງແຂວງວ່າ:
ແຂວງບໍລິຄຳໄຊເປັນບ່ອນກິ່ວສຸດ ແລະ ເປັນທາງຜ່ານໃນການບໍລິການຂົນສົ່ງສິນຄ້າ, ສະນັ້ນ ຈຶ່ງເປັນທ່າແຮງໃນການຂົນສົ່ງສິນຄ້າທັງພາຍໃນ ແລະ ຕ່າງປະເທດ, ໃນແຜນຍຸດທະສາດການພັດທະນາດ້ານເສດຖະກິດຂອງແຂວງນີ້ ມີ 7 ໂຄງການ ແລະ 61 ໂຄງການຍ່ອຍ ທີ່ຈະໄດ້ຄົ້ນຄ້ວາໃນການປະຕິບັດໃນຕໍ່ໜ້າ
ເປັນຕົ້ນແມ່ນໂຄງການສ້າງຂົວມິດຕະພາບແຫ່ງທີ 5 ປາກຊັນ-ບຶງການ ທີ່ມີສາງສິນຄ້າສາມາດຮອງຮັບໄດ້ຈຳນວນຫຼາຍ ຈຶ່ງເປັນເຂດອຳນວຍຄວາມສະດວກໃນການຂົນສົ່ງສິນຄ້າລະຫວ່າງປະເທດ, ໂຄງການແຫຼ່ງທ່ອງທ່ຽວອ່າງຫ້ວຍສຽດ ທີ່ສາມາດຮອງຮັບນັກທ່ອງທ່ຽວໄດ້ເປັນຈຳນວນຫຼາຍ ໃນນັ້ນ ຈະມີໂຮງແຮມ ແລະ ຮ້ານອາຫານ, ຫາດ, ຮ້ານຄ້າ, ເຮືອນວິນລາໃຫ້ເຊົ່າ ແລະ ກິດຈະກຳການແຂ່ງກິລາ, ແຂວງຍັງມີແຜນປູກໄມ້ໃຫ້ໝາກ ເຊັ່ນ: ການປູກໝາກມ່ວງ, ກ້ວຍ, ໝາກມີ້ ແລະ ໝາກໄມ້ຊະນິດ ອື່ນໆ ຫຼື ສາມາດນຳມາແປຮູບແລ້ວສົ່ງອອກ, ນອກນັ້ນ ຍັງມີການລ້ຽງໄກ່, ຟາມງົວ ແລະ ໂຮງງານຫຼອມເຫຼັກ. ການເຕີບໂຕເສດຖະກິດມະຫາພາກພື້ນ ໃນການຄາດຄະເນໃຫ້ຢູ່ໃນລະດັບ 7% ຕາມທີ່ຄາດການໄວ້.
ແຫຼ່ງຂໍ້ມູນ: ເວບໄຊ ແຂວງບໍລິຄຳໄຊ