ທີ່ວິທະຍາໄລສິລະປະສຶກສາ ໄດ້ຈັດພິທີສະເຫຼີມສະຫຼອງວັນສ້າງຕ້ັງໂຮງຮຽນສິລະປະສຶກສາ ຄົບຮອບ 37 ປີ , ວັນສ້າງຕັ້ງໂຮງຮຽນສ້າງຄູສິລະປະສຶກສາ ຄົບຮອບ 31ປີ ແລະ ຄົບຮອບການປະກາດເປັນວິທະຍາໄລ ສິລະປະສຶກສາ ຄົບຮອບ 10 ປີພໍດີ.
ໂດຍງານໄດ້ສຳເລັດລົງຢ່າງຈົບງາມເປັນທີ່ຮຽບຮ້ອຍ ພາຍໃຕ້ການໄດ້ຮັບກຽດເປັນປະທານໂດຍ ທ່ານນາງ ຂັນທະລີ ສິລິພົງພັນ ຮອງລັດຖະມົນຕີກະຊວງສຶກສາທິການແລະກິລາ ເປັນກຽດເຂົ້າຮ່ວມມີທ່ານເອກອັກຄະລັດຖະທູດ ແຫ່ງຣາຊະອານາຈັກໄທ ປະຈຳສປປ.ລາວ ທ່ານວິຣະວັນ ບຸນສຸຂໄທ ຮັກສາການກົມພະລະແລະສິລະປະ ທ່ານຜູ້ຕາງຫນ້າຂອງມະຫາໄລແຮກສ່ຽວຈາກ ສສ.ຫວຽດນາມ ທ່ານຜູ້ຕາງຫນ້າວິທະຍາໄລນາດຕະສິນຮ້ອຍເອັດ
ພ້ອມນັ້ນຍັງມີຕົວແທນສະຖາບັນແລະວິທະຍາໄລແຮກສ່ຽວອ້ອມຂ້າງ ມີແຂກທີ່ຖືກເຊີນ ສິດເກົ່າ ແລະ ນ້ອງນັກສຶກສາເຂົ້າຮ່ວມຢ່າງໜາແໜ້ນເຕັມໄປດ້ວຍບັນຍາກາດອັນອົບອຸ່ນ ແລະ ຟົດຟື້ນມ່ວນຊື່ນຫລາຍ
ເຊິ່ງພາຍໃນງານໄດ້ມີກິດຈະກຳຫລາຍຢ່າງເຊັ່ນ:
ຊົມການສະແດງສິລະປະວັດທະນະທຳທີ່ສື່ເຖິງເນື້ອໃນຂອງງານ ຮັບຟັງການເລົ່າຄືນມູນເຊື້ອຂອງວິທະຍາໄລສິລະປະສຶກສາ ຕະຫຼອດ 37 ປີ ຜ່ານມານັບຕັ້ງແຕ່ມີການເປີດການຮຽນ-ການສອນ ຮັບຟັງການສະແດງຄວາມຮູ້ສຶກຈາກຕົວແທນສິດເກົ່າ ຈາກນັ້ນໄດ້ມີການຜ່ານຂໍ້ຕົກລົງມອບຫຼຽນໄຊແຮງງານ ແລະ ໃບຍ້ອງຍໍລັດຖະບານໃຫ້ແກ່ວິທະຍາໄລພ້ອມພະນັກງານຄູອາຈານແຕ່ອະດີດຮອດປັດຈຸບັນແກ່ຜູ້ມີຜົນງານ.
ນອກນັ້ນຍັງມີການເປີດງານວາງສະແດງຜົນງານສິລະປະກຳຂອງຄູອາຈານພ້ອມນັກສຶກສາ ວາງສະແດງຜົນງານທາງວິຊາການຂອງວິທະຍາໄລ ຮັບຊົມການຈັດວາງສະແດງຫ້ອງມູນເຊື້ອທີ່ເປັນຜົນງານການເຄື່ອນໄຫວນັບແຕ່ມື້ສ້າງຕັ້ງ ພ້ອມວາງສະແດງອຸປະກອນການຮຽນ-ການສອນໃນອະດີດ ແລະ ປັດຈຸບັນ ຕໍ່ຈາກນັ້ນແມ່ນຮັບຊົມການຈັດວາງສະແດງຫ້ອງປະຕິບັດການຮຽນກາສອນ ວິຊາພາບພິມ ກັບຫ້ອງເຄື່ອງປັ້ນດິນເຜົາ…
ຫລັງຈາກນັ້ນແມ່ນຮ່ວມຮັບປະທານອາຫານທ່ຽງຮ່ວມກັນລະຫວ່າງແຂກທີ່ຖືກເຊີນພ້ອມຄູອາຈານ ແລະ ສິດເກົ່າທີ່ມາຮ່ວມສະແດງຄວາມຍິນດີ (ພາຍໃຕ້ຂໍ້ປະຕິບັດໂຮງຮຽນປອດສິ່ງເສບຕິດ ຄືປອດສານມຶນເມົາ) ໂດຍມີຜາມອາຫານຕ່າງໆທີ່ຄອຍໃຫ້ບໍລິການແຂກມາຮ່ວມງານ ຈາກນ້ອງໆນັກສຶກສາທຸກຊັ້ນຮຽນ ພ້ອມກັນນັ້ນກໍ່ໄດ້ຈັດການມອບໃບອຸປະກາລະຄຸນແກ່ຜູ້ສະຫນັບສະຫນຸນງານ ແລະ ຮັບຂອງທີ່ລະນຶກຈາກສິດເກົ່າແຕ່ລະລຸ້ນທີ່ມາຮ່ວມ ໆລໆ
ກິດຈະກຳສຸດທ້າຍໃນຊ່ວງບ່າຍ ເວລາ 15:00 ໂມງໄດ້ຈັດການຫລີ້ນ
ກິລາເຕະບານສາມັກຄີລະຫວ່າງ ຄູອາຈານ ກັບແຂກແລະສິດເກົ່າທີ່ ເດິ່ນເຕະບານ ວັນມະໂນ.
ແຫຼ່ງຂໍ້ມູນ: Photo & Report by : @ Douangdeth Chanthamaly , ວິທະຍາໄລ ສິລະປະສຶກສາ. ວສປ