ຄະນະບໍລິຫານງານຊາວໜຸ່ມ ປປລ ເມືອງນາຊາຍທອງ ນະຄອນຫຼວງວຽງຈັນ ສົມທົບກັບຄະນະນໍາຫ້ອງການສຶກສາທິການ ແລະ ກິລາເມືອງ ຜູ້ອຳນວຍການໂຮງຮຽນຄູ-ອາຈານ ແລະ ເລຂາຊາວໜຸ່ມຫ້ອງການຕ່າງໆພາຍໃນເມືອງ ໄດ້ຈັດງານພົບປະເຍົາວະຊົນທັນວາ ຄັ້ງທີ 16 ປະຈໍາປີ 2019.
ຜ່ານມານີ້ ຢູ່ທີ່ໂຮງຮຽນມັດທະຍົມສົມບູນຟ້າສີຄາມ ໂດຍການເຂົ້າຮ່ວມຂອງສະຫາຍ ບຸນຊູ ພະວິເສດ ຮອງເລຂາພັກເມືອງ ປະທານກວດກາພັກ ຫົວໜ້າຫ້ອງການກວດກາລັດ (ຜູ້ຊີ້ນໍາວຽກງານອົງການຈັດຕັ້ງມະຫາຊົນ) ສະຫາຍ ໄຊຍະບັດ ຊຸ່ມມະນີວົງ ຮອງເລຂາຄະນະບໍລິຫານງານຊາວໜຸ່ມ ປປລ ນະຄອນຫຼວງວຽງຈັນ ມີບັນດາຄູ-ອາຈານ ເລຂາຊາວໜຸ່ມເມືອງ ແລະ ນ້ອງນ້ອຍເຍົາວະຊົນທັນວາ ເຂົ້າຮ່ວມຢ່າງພ້ອມພຽງ.
ສະຫາຍ ນາງ ປາວິນາ ສຸຂະບັນດິດ ເລຂາຄະນະບໍລິຫານງານຊາວໜຸ່ມ ປປລ ເມືອງນາຊາຍທອງກ່າວວ່າ: ຈຸດປະສົງໃນການຈັດງານພົບປະໃນຄັ້ງນີ້ ກໍ່ເພື່ອເປັນການສ້າງຂະບວນການ ຂໍ່ານັບຊົມເຊີຍກອງປະຊຸມໃຫຍ່ ຄັ້ງທີ IX ຂອງຜູ້ແທນຊາວໜຸ່ມທົ່ວເມືອງນາຊາຍທອງ ແລະ ຂໍ່ານັບຊົມເຊີຍວັນສໍາຄັນຂອງຊາດ ຂອງພັກ
ພິເສດແມ່ນສ້າງຂະບວນເພື່ອຂໍ່ານັບຮັບຕ້ອງກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງນາຊາຍທອງ ແລະ ກອງປະຊຸມໃຫຍ່ ຄັ້ງທີ VIII ຂອງຜູ້ແທນຊາວໜຸ່ມ ທົ່ວນະຄອນຫຼວງວຽງຈັນ ພ້ອມທັງເປັນການກະຕຸກຊຸກຍູ້ໃຫ້ຄູ-ອາຈານຜູ້ທີ່ຮັບຜິດຊອບວຽກງານເຍົາວະຊົນ-ອະນຸຊົນ ໄດ້ເຂົ້າຮ່ວມພົບປະແລກປ່ຽນກັບໝູ່ເພື່ອໃຫ້ກວ້າງຂວາງ ແລະ ສາມັກຄີຮັກແພງຊ່ວຍເຫຼືອເຊີ່ງກັນ ແລະ ກັນ
ເວົ້າສະເພາະກໍ່ແມ່ນເພື່ອຍົກສູງພາລະບົດບາດຂອງຄະນະຊາວໜຸ່ມ ກໍ່ຄືການຈັດຄັ້ງຊາວໜຸ່ມໃຫ້ພົ້ນເດັ່ນ ເຮັດໃຫ້ນ້ອງນ້ອຍເຍົາວະຊົນ ຮູ້ໄດ້ຕໍ່ຄວາມສຳຄັນຂອງການຈັດຕັ້ງຊາວໜຸ່ມ ແລະ ມີຄວາມຕື່ນຕົວເຂົ້າຮ່ວມການເຄື່ອໄຫວນໍາການຈັດຕັ້ງຊາວໜຸ່ມ ສ້າງໄດ້ຄວາມສາມັກຄີຮັກແພງລະຫວ່າງສະມາຊິກເຍົາວະຊົນ-ອະນຸຊົນ ທັງພາກລັດ ແລະ ເອກຊົນແຕ່ລະໂຮງຮຽນທີ່ໄດ້ເຂົ້າຮ່ວມ ເຊິ່ງມີກິດຈະກໍາເຂົ້າຮ່ວມສະແດງ ແລະ ແຂ່ງຂັນທັງໝົດ 8 ກິດຈະກໍາຄື:
ກິດຈະກໍາຟ້ອນລວມໝູ່ຍິງ-ຊາຍ ກິດຈະກໍາຖາມ-ຕອບຄວາມຮູ້ຮອບຕົວ ກິດຈະກໍາເດີນແບບແຜນຂອງເຍົາວະ ຊົນທັນວາ ກິດຈະກໍາຮ່າຍນໍ້າໃສ່ແກ້ວ ກິດຈະກໍາວຽນອອ້ມຫຼັກ ກິດຈະກໍາເປົ່າປຸ້ມເປົ້າໃຫ້ແຕກ ແລະ ກິດຈະກໍາຮັກສາສິ່ງແວດລ້ອມ ການຈັດງານພົບປະໃນຄັ້ງນີ້ແມ່ນມີຄວາມເບີກບານມ່ວນຊື່ນ ສ້າງໄດ້ຄວາມສາມັກຄີຢ່າງໝັກແໜ້ນ ຮູ້ໄດ້ເກມແຂງຂັນ ແລະ ຮູ້ແພ້ຮູ້ຊະນະຮູ້ໃຫ້ອະໄພເຊິ່ງກັນ ແລະ ກັນ.
ແຫຼ່ງຂໍ້ມູນ: ຄະນະຊາວໜຸ່ມ ນະຄອນຫຼວງວຽງຈັນ Vientiane Capital Youth Union