ການຄຸ້ມຄອງລາຄາສິນຄ້າ ຢູ່ໃນນະຄອນຫຼວງວຽງຈັນໄລຍະຜ່ານມາ ແມ່ນປະຕິບັດຕາມແຈ້ງການ ເລກທີ 0499/ອຄ. ນວ.ຄພນ ກ່ຽວກັບການກຳນົດລາຄາການຂາຍຍົກ-ຂາຍຍ່ອຍຊີ້ນໝູ ເຫັນວ່າສາມາດຄຸ້ມຄອງລາຄາທີ່ກຳນົດ ໂດຍສະເພາະ ແມ່ນໄລຍະເດືອນກຸມພາ ຫາ ເດືອນທັນວາ 2019
ລາຄາຊີ້ນໝູ ປະເພດ 1 ຢູ່ລະຫວ່າງ 35.000 ກີບ ຫາ 36.000 ກີບຕໍ່ກິໂລ ຊີ້ນໝູປະເພດ 2 ຢູ່ລະຫວ່າງ 33.000 ກີບ ຫາ 34.000 ກີບຕໍ່ກິໂລ ມາຮອດກາງເດືອນທັນວາ 2019 ສະພາບລາຄາຊີ້ນໝູມີການປັບປ່ຽນລາຄາເພີ່ມຂຶ້ນ.
ຕໍ່ກັບສະພາບການດັ່ງກ່າວນີ້ ທ່ານ ເບີລິນ ເພັດຈັນທະຣາດ ຫົວໜ້າແນກອຸດສາຫະກຳ ແລະ ການຄ້າ ນວ ໄດ້ຊີ້ແຈງຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ນະຄອນຫຼວງວຽງຈັນ (ສປ ນວ) ຊຸດທີ I ກ່ຽວກັບຄາລາຊີ້ນໝູທີ່ມີການຂຶ້ນລາຄາ ເຊິ່ງສາເຫດຂອງການປັບຂຶ້ນລາຄາ ຍ້ອນວ່າສະພາບໝູຂາດແຄນ ໃນຂອດນາຍຮ້ອຍທີ່ເກັບຊື້ໝູຈາກຕ່າງແຂວງ ຟາມຂະໜາດນ້ອຍ ແລະ ລ້ຽງແບບຄອບຄົວເຮືອນ
ໂດຍສະເພາະ ຟາມຢູ່ ນວ ແມ່ນຫຼຸດລົງຈາກ 187 ຟາມ ຍັງເຫຼືອ 137 ຟາມ ຫຼຸດລົງ 74 ຟາມ ແລະ ຍ້ອນສາເຫດຕົ້ນຕໍທຶນການຜະລິດເພີ່ມຂຶ້ນ ເນື່ອງຈາກໄລຍະທີ່ພະຍາດໝູອາຟຣິກາລະບາດ ທຸລະກິດລ້ຽງໝູຕ້ອງໄດ້ແບກຫາບຕົ້ນທຶນ ການປ້ອງກັນໂຣກລະບາດພະຍາດສັດ ແລະ ບວກກັບອັດຕາແລກປ່ຽນ ຫຼື ອັດຕາເງິນເຟີ້ມີການເໜັງຕີງປັບຂຶ້ນ
ໂດຍຕິດພັນກັບຕົ້ນທຶນການນຳເຂົ້າສ່ວນປະສົມມາຜະລິດຫົວອາຫານສັດທີ່ຕ້ອງນຳເຂົ້າຈາກຕ່າງປະເທດ ຄວາມຕ້ອງການບໍລິໂພກຊີ້ນໝູ ໃນ ນວ ປະມານ 60 ໂຕນຕໍ່ວັນ ຫຼື ປະມານ 700-750 ໂຕຕໍ່ວັນ ຖ້າວັນເທສະການບຸນປະເພນີຕ່າງໆການບໍລິໂພກຊີ້ນໝູເພີ່ມຂຶ້ນ ປະມານ 68 ໂຕນຕໍ່ວັນ ຫຼື 800-900 ໂຕຕໍ່ວັນ ສ່ວນການສະໜອງໝູຂອງບັນດາຟາມ ແມ່ນຍັງສາມາດສະໜອງໄດ້ປົກກະຕິ 400-450 ໂຕຕໍ່ວັນ ເຫຼືອນັ້ນແມ່ນຟາມນ້ອຍ ຫຼື ລ້ຽງໃນຄົວເຮືອນ.
ສຳລັບລາຄາຊີ້ນໝູທີ່ລັດກຳນົດ ແມ່ນ 36.000 ກີບ/ກິໂລ ຖ້າທຽບໃສ່ລາຄາຊີ້ນໝູຢູ່ປະເທດໄທ ລາຄາແມ່ນ 48.000 ກີບ/ກິໂລ ເຫັນວ່າສູງກວ່າ 33,33% ແລະ ສົມທຽບໃສ່ລາຄາຊີ້ນໝູຢູ່ປະເທດຫວຽດນາມ 60.000 ກີບ/ກິໂລ ເຫັນວ່າສູງກວ່າ 66,67%.
ຖ້າສົມທຽບລາຄາຊີ້ນໝູໃນປັດຈຸບັນ ແມ່ນ 40.000 ກີບ/ກິໂລ ຖ້າທຽບໃສ່ລາຄາຊີ້ນໝູຢູ່ປະເທດໄທ ລາຄາ 48.000 ກີບ/ກິໂລ ເຫັນວ່າສູງກວ່າ 20% ແລະ ສົມທຽບໃສ່ລາຄາຊີ້ນໝູຢູ່ປະເທດຫວຽດນາມ ລາຄາ 60.000 ກີບ/ກິໂລ ເຫັນວ່າສູງກວ່າ 50% ສາເຫດທີ່ພາໃຫ້ລາຄາເໜັງຕີງນັ້ນ ແມ່ນເກີດມາຈາກ 2 ປັດໄຈ ຄື: ປັດໄຈພາຍໃນ ແມ່ນອັດຕາເງິນເຟີ້ໃນເດືອນພະຈິກ 2019
ອັດຕາແລກປ່ຽນມີການປັບຂຶ້ນ-ລົງ ການສະໜອງເງິນຕາຕ່າງປະເທດບໍ່ພຽງພໍກັບຄວາມຕ້ອງການ ລາຄານ້ຳມັນພາຍໃນປະເທດ ປີ 2019 ມີການປັບຂຶ້ນ-ລົງ ຈຳນວນ 13 ຄັ້ງ ລາຄາໄຟຟ້ານຳເຂົ້າໃນການຜະລິດຍັງສູງ ສ່ວນປັດໄຈພາຍອອກ ແມ່ນຍັງມີການນຳເຂົ້າຫົວອາຫານ ແລະ ສ່ວນປະສົມຫົວອາຫານ ຢາປ້ອງກັນພະຍາດຈາກຕ່າງປະເທດ ລາຄາໝູປະເທດອ້ອມຂ້າງມີການປັບຂຶ້ນລາຄາ ແລະ ບັນຫາໂລກລະບາດພະຍາດສັດ.
ແຫຼ່ງຂໍ້ມູນ: ໜັງສືພິມວຽງຈັນໃໝ່