ເນື່ອງໃນໂອກາດເຂົ້າຮ່ວມເປັນປະທານ ກອງປະຊຸມສະໄໝສາມັນຄົບຄະນະກຳມາທິການແຫ່ງຊາດ ເພື່ອການພັດທະນາຊັບພະຍາກອນ ມະນຸດ (ຄຊພຊ) ຄັ້ງທີ 8 ປະຈຳປີ 2019 ທີ່ ໄດ້ຈັດຂຶ້ນໃນບໍ່ດົນມານີ້ ທີ່ນະຄອນ ຫຼວງວຽງຈັນ, ທ່ານທອງລຸນ ສີສຸລິດ ນາຍົກລັດຖະມົນຕີ ໄດ້ກ່າວເນັ້ນໃຫ້ ຄຊພຊ ເລັ່ງປັບປ່ຽນການສຶກສາ ຫຼື ປະຕິຮູບໃໝ່ຕື່ມອີກ,
ຕ້ອງປັບປ່ຽນການສຶກສາໃຫ້ສາມາດຮອງຮັບກັບການປ່ຽນແປງໃໝ່ ໂດຍສະເພາະວຽກງານການສຶກສາໃຫ້ແກ່ຄູ ຜູ້ທີ່ຈະນຳພາການປັບປ່ຽນການສຶກສາໃນຍຸກສະໄໝໃໝ່ທີ່ມີການປ່ຽນແປງຢ່າງຫຼວງຫຼາຍ ແລະ ວ່ອງໄວ.
ນອກນັ້ນ ທ່ານຍັງໄດ້ຮຽກຮ້ອງໃຫ້ ຄຊພຊ ຂັ້ນສູນກາງ ແລະ ແຂວງ ສືບຕໍ່ເອົາໃຈໃສ່ແກ້ໄຂບັນຫາທີ່ຍັງຄົງຄ້າງ ແລະ ສິ່ງທ້າທາຍ ໂດຍສະເພາະແມ່ນບັນຫາການພັດທະນາຊັບພະຍາກອນມະນຸດໃຫ້ມີຄຸນນະພາບສູງຂຶ້ນ ແລະ ໃຫ້ສົມຄູ່ກັບຄວາມຕ້ອງການຂອງຕະຫຼາດແຮງງານ ຫຼື ມີວຽກເຮັດງານທຳທີ່ມີຄ່າຕອບແທນ ສົມເຫດສົມຜົນຢູ່ພາຍໃນ ແລະ ສາມາດແຂ່ງຂັນກັບພາກພື້ນ ແລະ ສາກົນ.
ນອກຈາກນັ້ນ, ກໍ່ຕ້ອງເອົາໃຈໃສ່ສຶກສາຄົ້ນຄວ້າ, ວິເຄາະວິໄຈ ເພື່ອນຳເອົາຜົນໄດ້ຮັບມານຳໃຊ້ເຂົ້າໃນການວາງ ແຜນພັດທະນາຊັບພະຍາກອນມະນຸດຂອງຂະແໜງການຕົນໃຫ້ນັບມື້ດີຂຶ້ນ.
ການຈັດຕັ້ງປະຕິບັດຍຸດທະສາດການພັດທະນາຊັບພະຍາກອນມະນຸດແຫ່ງຊາດຕ້ອງໃຫ້ສອດຄ່ອງກັບແຜນພັດທະນາເສດຖະກິດສັງຄົມ 5 ປີ ຄັ້ງທີ 9.
ແຫຼ່ງຂໍ້ມູນ: ຂ່າວ : ວຽງຈັນທາຍ