ຄະນະນຳແຂວງ ຊຽງຂວາງ ໄດ້ກໍານົດເອົາໄຫຫີນທີ່ເປັນວັນຖຸບູຮານມີອາຍຸຫຼາຍພັນປີ, ມີຄວາມໝາຍສຳຄັນ ແລະ ລືຊື່ທາງປະຫວັນສາດ ເຊິ່ງເປັນມໍລະດົກ ຂອງແຂວງ ຊຽງຂວາງ ກໍ່ຄືຂອງຊາດ ປະກອບໃສ່ສັນຍາລັກ ຂອງງານມະຫາກໍາກິລາແຫ່ງຊາດ ຄັ້ງທີ XI ຫຼື ຊຽງຂວາງ ເກມ ໃນລະຫວ່າງວັນທີ 22 ມີນາ-1 ເມສາ 2020.
ໄຫຫີນໜຶ່ງໜ່ວຍ ສື່ຄວາມໝາຍ ເຖິງຄວາມສາມະຄີເອກະພາບ ເປັນຈິດໜຶ່ງໃຈດຽວຂອງຊາວ ຊຽງຂວາງ ຕັ້ງຢູ່ໃນລັກສະນະທີ່ ສວຍງາມຂອງວັນຖຸບູຮານທີ່ເປັນມໍລະດົກຄູ່ກັບຊາວຊຽງຂວາງ, ເປັນມໍລະດົກຂອງຊາດ ແລະ ຈະໄດ້ສະເຫຼີມສະຫຼອງການ ເປັນມໍລະດົກໂລກພ້ອມກັບງານ ມະຫາກໍາກິລາແຫ່ງຊາດ ຄັ້ງທີ XI.
ໄຫຫີນ ສັນຍາລັກງານມະຫາກໍາ ກິລາແຫ່ງຊາດຄັ້ງນີ້ ປະກອບ 3 ລາຍເສັ້ນຄື:
ລາຍເສັ້ນສີຂຽວ ເຂັ້ມເບື້ອງເທິງສຸດໝາຍເຖິງສາຍ ພູຂອງແຂວງ ຊຽງຂວາງທີ່ອຸດົມ ໄປດ້ວຍປ່າດົງ, ຕົ້ມໄມ້ທີ່ມີລາຄາ ແພງປົກຫຸ້ມຢູ່ ເຊິ່ງມີຫຼາຍຈອມພູ ແລະ ສາຍພູໃນແຂວງ ຊຽງຂວາງ ທີ່ມີຊື່ສຽງໃນພູມີສາດ.
ລາຍເສັ້ນສີຟ້າກາງ ໝາຍເຖິງ ຄວາມອຸດົມສົມບູນຂອງສາຍນໍ້າແຂວງ ຊຽງຂວາງ ທີ່ມີແມ່ນໍ້າ ຫຼາຍສາຍກໍາເນີດເກີດຂຶ້ນ ໃນ ແຂວງ ຊຽງຂວາງ ທີ່ກາຍເປັນ ສາຂາທີ່ສໍາຄັນຂອງແມ່ນໍ້າຂອງ ໄຫຼປ່ອງສູ່ທະເລ ເຊິ່ງເປັນແມ່ ນໍ້າທີ່ສໍາຄັນໃນການພັດທະນາ ເສດຖະກິດຂອງແຂວງ ແລະ ຂອງປະເທດຊາດ.
ລາຍເສັ້ນສີຂຽວອ່ອນທາງລຸ່ມສຸດ ໝາຍເຖິງພູພຽງຊຽງຂວາງ ທີ່ປົກ ຄຸມໄປດ້ວຍທົ່ງຫຍ້າອັນອຸດົມສົມບູນທີ່ຂຽວງາມແບບທຳມະຊາດ ແລະ ຄວາມອຸດົມສົມບູນໃນການ ດຳດົງຊິວິດຂອງປະຊາຊົນແຂວງ ຊຽງຂວາງ.
ໃນນັ້ນ ດ້ານລຸ່ມຂຽນໂຕໜັງສືກົ່ງ ບົ່ງບອກເຖິງງານມະຫາກໍາກິລາ ແຫ່ງຊາດ (ຊຽງຂວາງ ເກມ 2020).
ແຫຼ່ງຂໍ້ມູນ: ຂ່າວ: ບົວຜັນ, ວຽງຈັນທາຍ
