ສປປ ລາວ ຄາດວ່າຈະປັບປຸງອັນດັບໃນການເລີ່ມຕົ້ນທຸລະກິດ ໃຫ້ເຫືຼອສອງຕົວເລກ ໃນປີໜ້າ ຫຼັງຈາກປີນີ້ຖືກຈັດເປັນອັນດັບ 181 ຂອງການເລີ່ມຕົ້ນທຸລະກິດ ຈາກ 190 ເສດຖະກິດທົ່ວໂລກ, ຕົກລົງ 1 ອັນ ດັບຈາກປີ 2019.
ທ່ານ ສົມພວງ ພຽນພິນິດ, ຫົວຫນ້າ ກົມທະບຽນ ແລະ ຄຸ້ມຄອງວິສາຫະກິດ ກະຊວງອຸດສາຫະກຳ ແລະ ການຄ້າ ໄດ້ກ່າວລະຫວ່າງກອງປະຊຸມເຜີຍແຜ່ຄວາມຄືບໜ້າໃນການປັບປຸງຂັ້ນຕອນການເລີ່ມຕົ້ນທຸລະກິດ ໃນວັນທີ 21 ກຸມພາ ທີ່ ນະຄອນຫຼວງວຽງຈັນ ວ່າ: ສປປ ລາວ ໄດ້ປັບປຸງຫຼາຍຂອດ ທີ່ເປັນອຸປະສັກໃນການເລີ່ມຕົ້ນທຸລະກິດ ຕາມຄຳສັ່ງນາຍົກລັດຖະມົນຕີ ເລກທີ 02/ນຍ ເລີ່ມແຕ່ທ້າຍປີ 2018 ເປັນຕົ້ນມາ,
ເຊີ່ງຂອດການເລີ່ມຕົ້ນທຸລະກິດແມ່ນປັບປຸງຈາກ 10 ຂອດເຫຼືອພຽງ 3 ຂອດ (ບໍ່ກວມຂອດອະນຸຍາດ) ແລະ ຫຼຸດເວລາລົງຈາກ ປະມານ 7 ເທົ່າຕົວ ຈາກ 178 ວັນ ໂດຍສະເລ່ຍ ເຫຼືອພຽງ ບໍ່ເກີນ 30 ວັນ.
ສ່ວນສາເຫດທີ່ ສປປ ລາວ ຍັງຈັດຢຸ່ໃນ ອັນດັບທ້າຍໆ ແມ່ນຍ້ອນບາງບໍລິສັດ ຫຼື ຫົວໜ່ວຍທຸລະກິດ ຍັງເຂົ້າໃຈວ່າ ໃບທະບຽນວິສາຫະກິດ ແລະ ໃບອະນຸຍາດດຳເນີນທຸລະກິດແມ່ນອັນດຽວກັນ ເຮັດໃຫ້ ພາກສ່ວນກ່ຽວຂ້ອງ ໃຫ້ຄະແນນການເລີ່ມຕົ້ນທຸລະກິດໃນລາວຕ່ຳ.
ແຫຼ່ງຂໍ້ມູນ: ຂ່າວ: ສຸກສະໄຫມ, ວຽງຈັນທາຍ