ພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ ສົມທົບກັບກົມການຄ້າພາຍໃນກະຊວງອຸດສາຫະກຳ-ການຄ້າ ແລະ ເມືອງໄຊເສດຖາ ພ້ອມທັງຕຳຫຼວດເສດຖະກິດ ໄດ້ລົງມາຕິດຕາມກວດກາລາຄາສິນຄ້າ ແລະ ສະພາບການຊື້-ຂາຍຢູ່ຕະຫຼາດຫົວຂົວ ເມືອງໄຊເສດຖາ ນະຄອນຫຼວງວຽງຈັນ.
ທ່ານ ນັນຕາ ສານຸວົງ ຮອງຫົວໜ້າພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ ໄດ້ກ່າວວ່າ:
ຜ່ານການລົງກວດກາຕິດຕາມສະພາບການຊື້-ຂາຍ ແລະ ລາຄາສິນຄ້າ ອີງໃສ່ການຈັດຕັ້ງປະຕິບັດຄຳສັ່ງເລກທີ 0653/ອຄ.ນວ.ຄພນ ລົງວັນທີ 3 ເມສາ 2020 ໂດຍກຳນົດລາຄາຈຳໜ່າຍສິນຄ້າຫຼາຍປະເພດໄວ້ ໜຶ່ງໃນນັ້ນ ກຳນົດລາຄາຈຳໜ່າຍຂາຍຍ່ອຍຊີ້ນໝູ ປະເພດ 1 ໃນລາຄາ 40.000 ກີບ/ກິໂລ ປະເພດ 2 ລາຄາ 38.000 ກີບ/ກິໂລ ບັນດາຕະຫຼາດທີ່ໄດ້ລົງສຳຫຼວດ ປະກອບມີ 8 ຕະຫຼາດໃຫຍ່ຄື:
ຕະຫຼາດໄຮຄຳ ໂນນຄໍ້ ໜອງຈັນ ໂພນສະຫວ່າງ ໂພນຕ້ອງຈອມມະນີ ຫ້ວຍຫົງ ສີໄຄຕະຫຼາດອົດຊີ ແລະ ຕະຫຼາດຫົວຂົວ ພົບ 3 ຕະຫຼາດທີ່ຂາຍຊີ້ນໝູເກີນກຳນົດຄື: ໜອງຈັນ ລາວ-ອົດຊີ ແລະ ຫົວຂົວ.
ສຳລັບການລົງກວດກາຢູ່ຕະຫຼາດຫົວຂົວໃນມື້ນີ້ ກໍໄດ້ພົບເຫັນແມ່ຄ້າຈຳນວນ 2 ຄົນ ຂາຍເກີນລາຄາທີ່ກຳນົດໄວ້ ຕໍ່ກັບຜູ້ທີ່ຂາຍເກີນລາຄາ ແມ່ນໄດ້ຖືກປັບໃໝຕາມລະບຽບ.
ທ່ານ ນັນຕາ ສານຸວົງ ໄດ້ກ່າວຮຽກຮ້ອງເຖິງຊາວຄ້າຂາຍ ປະຕິບັດຕາມແຈ້ງການຢ່າງເຂັ້ມງວດ ເນື່ອງຈາກລາຄາສິນຄ້າແມ່ນໄດ້ກຳນົດອອກມາຕາມໂຄງປະກອບລາຄາ ຫາກພົບເຫັນບໍ່ປະຕິບັດຕາມແຈ້ງການ ແມ່ນຈະໄດ້ປະຕິບັດຕາມລະບຽບການທີ່ກຳນົດໄວ້ ຄື ປັບໃໝ 1 ລ້ານກີບ ຫາ 3 ລ້ານກີບ ນອກຈາກນັ້ນ ຖ້າຜູ້ບໍລິໂພກພົບເຫັນຊາວຄ້າຂາຍຂາຍເກີນລາຄາທີ່ກຳນົດ ແມ່ນໃຫ້ເກັບຫຼັກຖານ ແລະ ຂໍ້ມູນທີ່ລະອຽດແລ້ວໂທແຈ້ງຜ່ານໝາຍເລກ 1510.
ແຫຼ່ງຂໍ້ມູນ: ວຽງຈັນໃໝ່