ຄົນລາວເຮົາມີນໍ້າໃຈຕໍ່ກັນສະເໜີ ບໍ່ວ່າຈະເກີດເຫດການຫຍັງ ກໍ່ມີນໍ້າໃຈຊ່ວຍເຫລືອກັນ ບໍ່ຖິ້ມກັນ ດັ່ງທຸກມື້ນີ້, ປະເທດເຮົາ ພວມຮັບມືກັບສະພາບການແຜ່ລະບາດຂອງພະຍາດໂຄວິດ-19 ເຮັດໃຫ້ບັນດາແພດໝໍ ຜູ້ເປັນແນວໜ້າຕ້ານ ແລະ ສະກັດກັ້ນພະຍາດນີ້ຕ້ອງເຮັດວຽກໜັກຕໍ່ສູ້ກັບພະຍາດຮ້າຍ ນີ້ແບບບໍ່ຮູ້ອິດເມື່ອຍ ແລະ ຈາກນີ້ເຮັດໃຫ້ທົ່ວສັງຄົມໄດ້ອອກມາສະແດງນໍ້າໃຈຜ່ານການຮ່ວມບໍລິຈາກວັດຖຸສິ່ງຂອງ.
ຂະນະດຽວກັນ ສິລະປິນ,ນັກຮ້ອງຫລາຍຄົນ ກໍ່ໄດ້ສົ່ງແຮງໃຈຜ່ານສຽງເພງ ໃຫ້ທີມແພດໝໍລາວ.
ທ້າວ ເປັກ ພົມມະສານ ສິລະປິນຈາກຄ້າຍທີເຄຊາວລາວ ໜຶ່ງໃນສິລະປິນທີ່ຖ່າຍທອດອາລົມເພງໃຫ້ກໍາລັງໃຈແພດໝໍລາວ ໄດ້ສະແດງຄວາມຮູ້ສຶກວ່າ:
ໃນໄລຍະທີ່ພະຍາດໂຄວິດລະບາດນີ້ໄດ້ສົ່ງຜົນກະທົບຫລາຍດ້ານບໍ່ວ່າຈະເປັນເສດຖະກິດກໍ່ຄືການທໍາມາຫາກິນ, ການໄປມາຫາສູ່ ແລະ ການປະ ຕິບັດໜ້າທີ່ວຽກງານ…ເຖິງຢ່າງໃດກໍ່ຕາມ,ພວກເຮົາ ກໍ່ໄດ້ປະຕິບັດຕາມຂັ້ນເທິງກໍ່ຄືຄໍາສັ່ງຂອງນາຍົກລັດຖະມົນຕີເລກທີ 06/ນຍ ໃນໄລຍະຜ່ານມາ ແລະ ສືບຕໍ່ຂະຫຍາຍ 14 ມື້ ກໍ່ພ້ອມປະຕິບັດຕາມເພື່ອສະກັດກັ້ນບໍ່ໃຫ້ພະບາດຍາດແຜ່ລາມ.
ນອກນີ້ແລ້ວ ຍັງໄດ້ນໍາສະເໜີເພງໃໝ່ທີ່ຊື່ວ່າ ນັກຮົບເສື້ອຂາວ ປະພັນໂດຍທ່ານ ພອນສະຫວັນ ພັນທະວິຈິດ ແລະ ນາງແພດປະຕິວັດ ປະພັນໂດຍທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫລງຂ່າວ,ວັດທະນະທໍາ ແລະ ທ່ອງທ່ຽວ ເພື່ອໃຫ້ກໍາລັງແພດໝໍ, ເຈົ້າໜ້າທີ່ກ່ຽວຂ້ອງ ແລະ ພໍ່ແມ່ປະຊາຊົນ ຊຶ່ງເປັນຜົນງານເພງທີ່ຂ້າພະເຈົ້າຖ່າຍທອດອອກໄປເພື່ອສ່ອງແສງໃຫ້ເຫັນເຖິງບົດບາດຄວາມສໍາຄັນຂອງແພດໝໍລາວທີ່ຕ້ອງເຮັດວຽກເປັນແນວໜ້າຕໍ່ສູ້ກັບພະຍາດນີ້.
ສະນັ້ນ ຈຶ່ງຂໍມອບເພງນີ້ໃຫ້ໄປເຖິງແພດໝໍລາວ, ພະນັກງານທະຫານ, ຕຳຫລວດ ລວມເຖິງພໍ່ແມ່ປະຊາຊົນ ໄດ້ຟັງເພື່ອຫລຸດຜ່ອນຄວາມເຄັ່ງຕຶງ ແລະ ມີກໍາລັງໃຈຕໍ່ສູ້ພະຍາດນີ້ໄປນໍາກັນ.
ລິ້ງເພງ: ນັກຮົບເສື້ອຂາວ https://youtu.be/CZxRw1x4-K0
ແຫຼ່ງຂໍ້ມູນ: ໂດຍ:ມາລີດາ, ຂປລ