ຊີວິດປົກກະຕິໃນຮູບແບບໃໝ່ ຂອງແຂວງບໍ່ແກ້ວ ແມ່ນແນວໃດ ?

ຫຼາຍມື້ທີ່ຜ່ານມານີ້, ຄະນະສະເພາະກິດ ແຂວງບໍ່ແກ້ວ ໄດ້ອອກປະກາດຄຳແນະນຳການໃຊ້ຊີວິດແບບໃໝ່ ຫຼື ເອີ້ນເປັນອັງກິດວ່າ “ນິວນໍມອນໄລ້ຟ໌” (New Normal Life) ຄວບຄູ່ໄປກັບເພີ່ມການປ້ອງກັນພະຍາດໂຄວິດ-19 ເພື່ອເປັນການປ້ອງກັນ, ຄວບຄຸມ ແລະ ແກ້ໄຂ ການລະບາດພາຍໃນແຂວງບໍ່ແກ້ວ

ຊີວິດປົກກະຕິໃນຮູບແບບໃໝ່ນີ້ ບໍ່ແມ່ນຄຳແນະນຳຊື່ໆ ແຕ່ມີຂໍ້ກຳໜົດໃຫ້ຕ້ອງເຮັດຕາມຢ່າງມີວິໄນ ເຄັ່ງຄັດ ທັ້ງກັບປະຊາຊົນ ນິຕິບຸກຄົນ ແລະ ການຈັດຕັ້ງພາຍໃນແຂວງບໍ່ແກ້ວ ໂດຍມີມາດຕະການຕໍ່ຜູ້ລະເມີດພ້ອມ

ດ້ວຍເຫດນີ້ ເຮັດໃຫ້ຄົນຢູ່ບໍ່ແກ້ວຈຳເປັນຕ້ອງປ່ຽນແປງບາງປະເພນີ, ບາງວັດທະນະທຳ, ບາງຄວາມລຶ້ງເຄີຍ ແລະ ວິຖີຊິວິດແບບເກົ່າໆ ຫຼາຍເລື່ອງ ເຊິ່ງຈະແມ່ນແນວໃດນັ້ນ ອິນໄຊລາວເຮົາເຮັດເປັນຫົວຂໍ້ສະຫຼຸບມາໃຫ້ແລ້ວ ດັ່ງນີ້:

1.ໃຊ້ຊີວິດແບບກຽມພ້ອມຮັບມືການລະບາດ

• ເພີ່ມພູນການຜະລິດຜົນ, ສຸມໃສ່ການປູກຝັງ ແລະ ລ້ຽງສັດ ໃຫ້ເປັນສິນຄ້າກຸ້ມຢູ່ກຸ້ມກິນພາຍໃນຄອບຄົວ ແລະ ຜະລິດສິນຄ້າທີ່ມີການແລກປ່ຽນຊື້ຂາຍ
• ປຸກຈິດສຳນຶກໃຫ້ປະຊາຊົນຢູ່ຮ່ວມກັນຢ່າງສາມັກຄີ ຮັກແພງຊ່ວຍເຫຼືອເຊິ່ງກັນ ແລະ ກັນ ມີສິດສະເໝີພາບຕໍ່ໜ້າກົດໝາຍ
• ທຸກພາກສ່ວນຕ້ອງຊ່ວຍກັນມີສະຕິລະວັງຕົວ ແລະ ຕິດຕາມ ເບິ່ງການລັກລອບເຂົ້າ-ອອກ ຕາມຊາຍແດນ, ກອງຫຼອນ ແລະ ປກສ ບ້ານຂອງຕົນ ຕ້ອງເຄື່ອນໄຫວຍາມເປັນປົກກະຕິ ແລະ ຊຸກຍູ້ໃຫ້ແກ້ໄຂຄວາມບໍ່ສະຫງົບ ແລະ ປະກົດການຫຍໍ້ທໍ້

2.ຕ້ອງປ້ອງກັນຕົນເອງ ແລະ ຄົນອ້ອມຂ້າງ

• ກ່ອນອອກຈາກເຮືອນຕ້ອງມີສະຕິຮັກສາໄລຍະຫ່າງ, ໃສ່ຜ້າປິດປາກ-ດັງ ຫຼີກລ່ຽງການຈັບມືເຊິ່ງກັນ ທັກທາຍກັນດ້ວຍການຍໍມືນົບເຊິ່ງກັນ ແລະ ກັນ ຖ້າໄອຈາມກໍໃຫ້ຫັນໄປບ່ອນບໍ່ມີຄົນ
• ອະນາໄມເຮືອນຊານມື້ລະຄັ້ງ, ອະນາໄມລວມບໍລິເວນເຮືອນອາທິດລະຄັ້ງ, ທຸກສະຖານທີ່ຕ້ອງມີຖັງຂີ້ເຫຍື້ອ, ບໍ່ໃຫ້ມີນໍ້າຂັງ ແລະ ງານປະຊຸມ ຫຼື ສຳມະນາໃຫ້ ເວັ້ນບ່ອນນັ່ງໄວ້ 1 ບ່ອນ
• ທຸກໆສະຖານທີ່ ໃຫ້ນັ່ງຫ່າງກັນ 1 ແມັດຂຶ້ນໄປ, ກຳນົດບ່ອນລ້າງມືທີ່ມີນໍ້າສະອາດໃຊ້, ມີສະບູ ແລະ ເຈວປະສົມເຫຼົ້າ 70% ໄວ້ໃຊ້ລ້າງມືທຸກຄັ້ງ

3.ຕ້ອງປ້ອງກັນການລະບາດ ຈາກງານປະເພນີຕ່າງໆ

• ງານບຸນ ເຊັ່ນ: ບຸນປະເພນີ, ງານລ້ຽງ, ງານສ້າງສັນ ແລະ ອື່ນໆຕ້ອງມີທິດຊີ້ນໍາ ແລະ ແຈ້ງຄະນະສະເພາະກິດຊາບເພື່ອປະຕິບັດມາດຕະການຢ່າງເຂັ້ມງວດ ຈຳກັດຈຳນວນໂຕະ-ຕັ່ງ, ຜູ້ຄົນທີ່ເຂົ້າຮ່ວມງານບໍ່ເກີນ 200 ຄົນ ເອົາແຕ່ເນື້ອຫາໃນພິທີເທົ່ານັ້ນ
• ງານແຕ່ງດອງ: ຈຳເປັນຕ້ອງສູ່ຂໍຕາມປະເພນີ ແມ່ນໃຫ້ເປັນລັກສະນະສູ່ຂໍພາຍໃນຄອບຄົວຂອງທັງສອງຝ່າຍ, ການຈັດພາຂັວນບາສີກໍຈັດພໍເປັນຮີດຄອງປະເພນີເທົ່ານັ້ນ
• ງານອອກກຳເດືອນ: ໃຫ້ສືບທອດຕາມປະເພນີ ຮັບເອົາຂັວນແອນ້ອຍ ແລະ ພໍ່ແມ່ເດັກເກີດໃໝ່, ໃຫ້ຖືເອົາຈົດທະບຽນການເກີດເປັນຫຼັກ, ຖ້າມີພີ່ນ້ອງມາຮ່ວມຕ້ອງປະຕິບັດຕາມມາດຕະການປ້ອງກັນພະຍາດໂຄວິດ-19
• ງານສົບ: ແມ່ນຮັກສາໄລຍະຫ່າງ 1 ແມັດຂຶ້ນໄປ, ມີແພດກວດອຸນຫະພູມ, ມີບ່ອນລ້າງມື ໃສ່ຜ້າປິດປາກ-ດັງ, ຫຼຸດຜ່ອນຈຳນວນມື້ອົບອຸ່ນຈິດໃຈລົງ ແລະ ສັບປ່ຽນກັນມາຮ່ວມງານສູງສຸດບໍ່ໃຫ້ເກີນ 3 ຊົ່ວໂມງ
• ງານບຸນປະເພນີ, ພິທີທາງສາສະໜາ ງານບວດ: ຈັດແບບກະທັດຮັດ, ຂະບວນການແຂ່ງຂັນຜົນຜະລິດ ແລະ ຮີດຄອງຕ່າງໆ ແມ່ນຈັດພາຍໃນບ້ານເທົ່ານັ້ນ
  ບໍ່ອະນຸຍາດໃຫ້ຄົບງັນ, ແຮ່ຂະບວນທີ່ມີສຽງເນືອງນັ່ນ, ແອອັດ ແລະ ຈັດຫຼາຍວັນ
  -ງານລ້ຽງ: ໃຫ້ກຳນົດຜູ້ເຂົ້າຮ່ວມ, ຈັດໂຕະ-ຕັ່ງໃຫ້ເໝາະສົມ, ຈັດພາເຂົ້າມາກິນອາຫານຈານດຽວ ບໍ່ກິນນຳກັນ, ຫຼີກລ່ຽງອາຫານດິບ, ບໍ່ຄວນເປີດເພງດັງເກີນຂອບເຂດ ແລະ ບໍ່ໃຫ້ກາຍ 23 ໂມງ ຫຼື 11 ໂມງແລງ

4.ອົງກອນລັດຕ້ອງປ່ຽນແນວທາງເຮັດວຽກ

• ໂຮງຮຽນທຸກແຫ່ງ: ຈັດໂຕະ-ຕັ່ງ ໄລຍະຫ່າງ 1 ແມັດ, ຕິດຕັ້ງບ່ອນລ້າງມືໄວ້ຫຼາຍຈຸດ, ມີເຈວ ຫຼື ສະບູໄວ້ໃຊ້, ນຳພານັກຮຽນໃຫ້ໃສ່ ຜ້າອັດປາກ-ດັງ ໃນເວລາອອກຈາກເຮືອນ ຫຼື ໃນເວລາຮຽນ ບ່ອນທີ່ມີການຮຽນຜ່ານສື່ອອນລາຍຕ່າງໆ ແມ່ນໃຫ້ສົ່ງວຽກບ້ານໃຫ້ນັກຮຽນ
• ກອງປະຊຸມ, ສຳມະນາ ແລະ ຝຶກອົບຮົມ: ຕ້ອງຫັນໄປຈັດແບບຜ່ານສື່ອອນໄລ ( G-Chat, Video Conference )

5.ປັບປ່ຽນແນວທາງການໃຫ້ບໍລິການຕ່າງໆ

• ສະຖານນີຂົນສົ່ງສິ່ງຕ່າງໆ: ຕ້ອງພົ່ນຢາຂ້າເຊື້ອລົດທຸກຄົນທີ່ເຂົ້າ-ອອກດ່ານ, ບໍ່ໃຫ້ມີການສຳພັດພະນັກງານດ້ວຍກັນ, ຫຼີກລ່ຽງໃຫ້ພະນັກງານຕ່າງປະເທດໃກ້ຊິດກັບຕົນ, ຫຼີກເວັ້ນການພັກລົດ, ຈອດລົດ ແລະ ນອນຄ້າງໃນລົດ ສະເພາະລົດຂົນສົ່ງໂດຍສານ ຕ້ອງຂັ້ນບ່ອນນັ່ງ, ມີຜ້າປິດປາກແຈກໃຫ້ລູກຄ້າ, ບໍ່ອະນຸຍາດຂົນສົ່ງໂດຍໃຫ້ຄົນຕ່າງປະເທດທີ່ບໍ່ມີເອກະສານ
• ຮ້ານອາຫານ ແລະ ຮ້ານບັນເທີງ: ຫຼຸດຈຳນວນໂຕະ-ຕັ່ງລົງ, ອະນາໄມຊຸດເຟີນິເຈີ, ປິຕິບັດຕາມາດຕະການທີ່ວາງອອກ, ຖ້າສະດວກໃຫ້ເປີດຮ້ານອາຫານເປັນສົ່ງເຖິງທີ່
• ໂຮງແຮມ: ຕ້ອງເບິ່ງປະຫວັດການເດີນທາງ (ກ່ອນ 14 ມື້ ) ແລ້ວຈຶ່ງຮັບເຂົ້າບໍລິການ, ປັບຕຽງຄູ່ເປັນຕຽງດ່ຽວ

6.ມາດຕະການຕໍ່ຜູ້ລະເມີດ

• ຄັ້ງທີ1: ກ່າວເຕືອນ, ເຮັດບົດບັນທຶກ, ໂຈະພຶດຕິກຳ ແລະ ຢຸດກິດຈະການຊົ່ວຄາວ
• ຄັ້ງທີ2: ສຶກສາອົບຮົມ, ເຮັດບົດບັນທຶກ, ຖອນໃບທະບຽນດຳເນີນທຸລະກິດ, ປັບໄໝຕາມລະບຽບການ
• ຄັ້ງທີ3: ກໍລະນີບໍ່ເຂັດລາບ, ຮ້າຍແຮງ, ສ້າງຄວາມເສຍຫາຍຕໍ່ຊີວິດ, ຊັບສິນ, ກຽດຊື່ສຽງຂອງປະເທດ ຈະໄດ້ວິໄນທາງດ້ານບໍລິຫານ, ປັບໄໝໃຊ້ແທນທາງແພ່ງ ແລະ ປະກອບສຳນວນຕັດສິນທາງອາຍາ

ປະຈຸບັນ ອາດກ່າວໄດ້ວ່າ ແຂວງບໍ່ແກ້ວແມ່ນໜຶ່ງໃນແຂວງຂອງລາວທີ່ມີຄວາມສ່ຽງສູງໃນການຮັບເອົາຜູ້ຕິດເຊື້ອເຂົ້າປະເທດ ເພາະແມ່ນແຂວງທີ່ມີຊາຍແດນຕິດກັບຕ່າງປະເທດ ເລິຍເຮັດໃຫ້ມີປາກົດການຫຍໍ້ທໍ້ເຊັ່ນ: ການລັກລອບຂ້າມຊາຍແດນ, ລັກລອບຂົນສົ່ງສິນຄ້າ ແລະ ປະຊາຊົນບາງກຸ່ມຍັງ ມີການໃຊ້ຊີວິດທີ່ປະມາດ ບໍ່ພາກັນໃສ່ປ້າປິດປາກ-ດັງ ແລະ ເຕົ້າໂຮມຊຸມນຸມກັນ

ແນວໃດກໍ່ຕາມ ຄຳແນະນຳນີ້ ຈະມີຜົນບັງຄັບໃຊ້ຊົ່ວຄາວ ຈົນກວ່າສະຖານະການໂຄວິດຂອງລາວເຮົາ ແລະ ປະເທດອ້ອມຂ້າງໃນພູມມິພາກອາຊີຈະດີຂຶ້ນກວ່ານີ້ ເຊິ່ງອາດເຮັດໃຫ້ປະຊາຊົນທີ່ຢູ່ໃນແຂວງບໍ່ແກ້ວ ຈຳເປັນຕ້ອງປ່ຽນແປງການດຳລົງຊີວິດໃນເມືອງໄປຫຼາຍຢູ່ ແຕ່ເຮົາກໍ່ໍເຊື່ອໝັ້ນວ່າ ທຸກທ່ານຈະຜ່ານພົ້ນຊ່ວງເວລາເຊັ່ນນີ້ໄປໄດ້ດ້ວຍດີ ແລະ ຂໍເປັນກຳລັງໃຈໃຫ້ຄົນບໍ່ແກ້ວ ແລະ ຄົນທີ່ີມີຍາດພີ່ນ້ອງຢູ່ແຂວງບໍ່ແກ້ວທຸກຄົນເລີຍເດີ້