- ຜົນກວດວິເຄາະຜູ້ຕິດເຊື້ອໃໝ່ 4 ຄົນ ເຊິ່ງລາຍລະອຽດ ດັ່ງຕໍ່ໄປນີ້:
ກໍລະນີຢັ້ງຢືນທີ 55
ເພດຍິງ, ອາຍຸ: 25 ປີ, ສັນຊາດ: ລາວ, ອາຊີບ: ແມ່ບ້ານ ເຮັດວຽກຢູ່ບາງກອກ ປະເທດໄທ ມີລູກສາວ ອາຍຸ 1 ປີ 10 ເດືອນ ແລະ ຜົວ (ຍັງເຮັດວຽກຢູ່ຮ້ານອາຫານຢູ່ບາງກອກ) ທີ່ຢູ່ປະຈຸບັນ: ເມືອງຫີນບູນ, ແຂວງຄຳມ່ວນ
ປະຫວັດການເຄື່ອນໄຫວ:
- ວັນທີ 14 ເມສາ 2021 ຜູ້ກ່ຽວ ແລະ ລູກສາວ ຂື້ນລົດໂດຍສານ ຢູ່ບາງກອກ, ປະເທດໄທ, ມີຜູ້ໂດຍສານທັງໝົດ 9 ຄົນ (ລວມທັງຜູ້ກ່ຽວ ແລະ ລູກສາວ) ມາສະຖານີຂົນສົ່ງ ນະຄອນພະນົມ, ມາຮອດ ສປປ ລາວ ຜ່ານດ່ານ ຂົວມິດຕະພາບແຫ່ງທີ 3 (ເຂົ້າມາຖືກຕາມລະບຽບຫຼັກການ) ແລະ ຖືກຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ ໃນເມືອງທ່າແຂກ
- ວັນທີ 15 ເມສາ 2021 ເວລາ 17:30 ໂມງ, ໄດ້ຖືກເກັບຕົວຢ່າງມາກວດ ຢູ່ໂຮງໝໍແຂວງຄຳມ່ວນ.ເວລາ 22:00 ໂມງ, ມີໄຂ້ ແທກອຸນຫະພູມໄດ້ 37.9 ອົງສາ ຈຶ່ງໄດ້ກິນຢາປາຣາ, ອາການດີຂຶ້ນ
- ວັນທີ 16 ເມສາ 2021 ຜົນກວດວິເຄາະ ພົບເຊື້ອ COVID-19. ປະຈຸບັນ ຜູ້ກ່ຽວເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວ ຢູ່ສະຖານທີ່ປິ່ນປົວ ທີ່ທາງແຂວງກຳນົດໄວ້. ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 4 ຄົນ, ພວກເຮົາໄດ້ເກັບຕົວຢ່າງມາກວດວິເຄາະ, ປະຈຸບັນ ແມ່ນຍັງລໍຖ້າຜົນກວດ. ພ້ອມດຽວກັນນັ້ນ ພວກເຮົາຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ
ກໍລະນີຢັ້ງຢືນທີ 56
ເພດຊາຍ, ອາຍຸ: 32 ປີ, ສັນຊາດ: ລາວ, ອາຊີບ: ຂາຍເຄື່ອງນອນ ຢູ່ແຖວວົງວຽນໃຫຍ່, ຖະໜົນຈັກກະເພັດພາອຸລັດ, ບາງກອກ, ປະເທດໄທ.ກ່ອນເດີນທາງເຂົ້າມາ ສປປ ລາວ ບໍ່ໄດ້ກວດຊອກຫາເຊື້ອ COVID-19
ປະຫວັດການເຄື່ອນໄຫວ
- ວັນທີ 7 ເມສາ 2021 ອອກເດີນທາງຈາກ ບາງກອກ, ປະເທດໄທ ດ້ວຍລົດໂດຍສານຈາກສະຖານີໝໍຊິດ ເວລາ 19:00 ໂມງ, ຕະຫຼອດໄລຍະການເດີນທາງ ຜູ້ກ່ຽວໃສ່ຜ້າອັດປາກ-ດັງ ຕະຫຼອດເວລາ
- ວັນທີ 8 ເມສາ 2021 ເດີນທາງມາຮອດ ແຂວງມຸກດາຫານ ເວລາ 5:00 ໂມງເຊົ້າ ມີຜູ້ໂດຍສານຮ່ວມເດີນທາງທັງໝົດ 32 ຄົນ.ຂ້າມດ່ານ ຂົວມິດຕະພາບແຫ່ງທີ 2 ແລະ ມາຮອດ ແຂວງສະຫວັນນະເຂດ ເວລາ 8:00 ໂມງເຊົ້າ (ເຂົ້າມາຖືກຕາມລະບຽບຫຼັກການ) ພ້ອມດຽວກັນ ກໍ່ຖືກສົ່ງເຂົ້າສູນຈຳກັດບໍລິເວນທີ່ຄະນະສະເພາະກິດກຳນົດໄວ້ ໃນນະຄອນໄກສອນຜູ້ກ່ຽວຮູ້ສຶກເຈັບຫົວ ໄດ້ກິນຢາປາຣາ, ອາການດີຂຶ້ນ. ໄດ້ຖືກເກັບຕົວຢ່າງກວດຫາເຊື້ອ, ຜົນກວດແມ່ນ ບໍ່ພົບເຊື້ອ COVID-19.
- ວັນທີ 14 ເມສາ 2021 ເວລາ 13:45 ໂມງ ຜູ້ກ່ຽວໄດ້ຈ້າງລົດສາມລໍ້ ມາຄິວລົດສະຫວັນນະເຂດ ນັ່ງມານຳກັນ 4 ຄົນ (ລວມທັງຜູ້ກ່ຽວ), ໃນນັ້ນ 1 ຄົນ ຢູ່ເມືອງສອງຄອນ, ທີ່ເຫຼືອ ບໍ່ຮູ້ວ່າມາຈາກເມືອງໃດ. ຫຼານຜູ້ກ່ຽວມາຮັບ ຢູ່ຄິວລົດປາກຊ່ອງ ແລະ ມາຮອດເຮືອນ ເວລາ 17:00 ໂມງ, ຫຼັງຈາກນັ້ນ 1 ຊົ່ວໂມງຕໍ່ມາ ຜູ້ກ່ຽວຮູ້ສຶກໄຂ້ ຈຶ່ງກິນຢາປາຣາໃສ່. ໃນໄລຍະຢູ່ເຮືອນ ມີຄົນມາຫາ 3 ຄົນ ແລະ ໄດ້ກິນເຂົ້າຮ່ວມກັນ.
- ວັນທີ 15 ເມສາ 2021 ມີໄຂ້, ໄອ ຈຶ່ງມາກວດຢູ່ໂຮງໝໍສອງຄອນ, ຖືກແຍກປ່ຽວ ແລະ ຕິດອາການ
- ວັນທີ 16 ເມສາ 2021 ເກັບຕົວຢ່າງກວດຊອກຫາເຊື້ອອີກຄັ້ງ, ຜົນກວດວິເຄາະ ພົບເຊື້ອ COVID-19 ປະຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວຢູ່ໂຮງໝໍແຂວງສະຫວັນນະເຂດ. ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 8 ຄົນ, ພວກເຮົາໄດ້ເກັບຕົວຢ່າງມາກວດວິເຄາະ, ປະຈຸບັນ ແມ່ນຍັງລໍຖ້າຜົນກວດ. ພ້ອມດຽວກັນນັ້ນ ພວກເຮົາຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ.
ກໍລະນີຢັ້ງຢືນທີ 57
ເພດຊາຍ, ອາຍຸ 24 ປີ, ສັນຊາດ: ລາວ, ອາຊີບ: ເຮັດຮ້ານອາຫານ ຢູ່ເຂດລາມກຳແຫງລາດພ້າວ, ປະເທດໄທ. ທີ່ຢູ່ປະຈຸບັນ: ເມືອງສອງຄອນ, ແຂວງສະຫວັນນະເຂດ ກ່ອນເດີນທາງເຂົ້າມາ ສປປ ລາວ ບໍ່ໄດ້ກວດຊອກຫາເຊື້ອ COVID-19.
ປະຫວັດການເຄື່ອນໄຫວ
- ວັນທີ 14 ເມສາ 2021 ເວລາ 19:00 ໂມງ ເດີນທາງອອກຈາກບາງກອກ, ປະເທດໄທ ພ້ອມດ້ວຍໝູ່ 1 ຄົນ (ເປັນຄົນແຂວງສະຫວັນນະເຂດ) ດ້ວຍລົດໂດຍສານ ຢູ່ສະຖານີລົດໝໍຊິດ, ມີຜູ້ໂດຍສານຮ່ວມເດີນທາງ 28 ຄົນ.
- ວັນທີ 15 ເມສາ 2021 ມາຮອດມຸກດາຫານ ເວລາ 06:30 ໂມງເຊົ້າ ແລະ ຂ້າມດ່ານມາແຂວງສະຫວັນນະເຂດ (ເຂົ້າມາຖືກຕາມລະບຽບຫຼັກການ) ຜູ້ກ່ຽວມີໄອ, ເຈັບຄໍ ແລະ ກິນອາຫານບໍ່ຮູ້ລົດຊາດ. ໄດ້ເກັບຕົວຢ່າງກວດຫາເຊື້ອ ແລະ ຖືກສົ່ງໄປຈຳກັດບໍລິເວນຢູ່ສູນທີ່ຄະນະສະເພາະກິດກໍານົດໄວ້ ໃນນະຄອນໄກສອນ.
- ວັນທີ 16 ເມສາ 2021 ຜົນກວດວິເຄາະ ພົບເຊື້ອ COVID-19 ປະຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວຢູ່ໂຮງໝໍແຂວງສະຫວັນນະເຂດ, ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 20 ຄົນ, ພວກເຮົາໄດ້ເກັບຕົວຢ່າງມາກວດວິເຄາະ, ຜົນກວດທັງໝົດ ແມ່ນບໍ່ພົບເຊື້ອ. ພ້ອມດຽວກັນ ພວກເຮົາຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ.
ກໍລະນີຢັ້ງຢືນທີ 58
ເພດຍິງ, ອາຍຸ: 25 ປີ, ສັນຊາດ:ລາວ, ອາຊີບ: ແມ່ບ້ານ ເຮັດວຽກຢູ່ເມືອງສີລາຊາ, ແຂວງຊົນບູລີ, ປະເທດໄທ. ທີ່ຢູ່ປະຈຸບັນ: ເມືອງບໍລິຄັນ, ແຂວງບໍລິຄຳໄຊ.
ປະຫວັດການເຄື່ອນໄຫວ
- ວັນທີ 6 ເມສາ 2021 ຂຶ້ນຍົນຈາກສະໜາມບິນສົງຂາ ມາຫາ ສະໜາມບິນອຸດອນ. ຂຶ້ນລົດແທັກຊີ (ໃນລົດມີ 4 ຄົນ: ຄົນຂັບລົດ, ໝູ່ 2 ຄົນ ແລະ ຜູ້ກ່ຽວ) ມານອນຢູ່ລີສອດບຶງການ, ປະເທດໄທ.
- ວັນທີ 6 – 13 ເມສາ 2021 ພັກຢູ່ລີສອດບຶງການ, ປະເທດໄທ
- ວັນທີ 14 ເມສາ 2021 ຜູ້ກ່ຽວໄດ້ໃຫ້ພີ່ນ້ອງເອົາລົດສ່ວນຕົວ ມາສົ່ງຂຶ້ນເຮືອ (ໃນລົດມີພີ່ນ້ອງ 1 ຄົນ ແລະ ຕົນເອງ). ເວລາ06:00 ໂມງເຊົ້າ ຜູ້ກ່ຽວມາຂຶ້ນເຮືອຢູ່ເຂດບຶງການ ໂດຍມີຜູ້ຂັບເຮືອຈາກຝັ່ງລາວ ຂ້າມມາຮັບ ເພື່ອມາສົ່ງຢູ່ເຂດເມືອງປາກກະດິງ. ເວລາ 8:00 ໂມງເຊົ້າ ຜູ້ຂັບເຮືອຈອດລົດໄວ້ທ່າປາກກະດິງ ແລະ ເມຍຜູ້ຂັບເຮືອຂີ່ລົດຈັກຮັບເອົາຜູ້ຕິດເຊື້ອນ້ຳເບີ 58 ໄປພັກຢູ່ບ້ານຂອງຕົນຊົ່ວຄາວ. ຫຼັງຈາກນັ້ນ ຜູ້ກ່ຽວ ກໍ່ໄດ້ຂຶ້ນລົດວີໂກ້ນຳເຈົ້າຂອງເຮືອ ໂດຍມີລູກເຈົ້າຂອງເຮືອ ອາຍຸ 4 ປີນັ່ງໄປນຳ ແລະ ໄດ້ໄປສົ່ງຜູ້ກ່ຽວຮອດ ເມືອງບໍລິຄັນ ເຊິ່ງມີພໍ່ຜູ້ກ່ຽວ ຂີ່ລົດຈັກມາລໍຖ້າ ແລະ ພາໄປສູນຈຳກັດບໍລິເວນທີ່ຄະນະສະເພາະກິດກຳນົດໄວ້.
- ວັນທີ 15 ເມສາ 2021 ຖືກເກັບຕົວຢ່າງມາກວດຫາເຊື້ອ
- ວັນທີ 16 ເມສາ 2021 ຜົນກວດວິເຄາະ ພົບເຊື້ອ COVID-19 ປະຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວຢູ່ໂຮງໝໍແຂວງບໍລິຄຳໄຊ. ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 04 ຄົນ, ພວກເຮົາໄດ້ເກັບຕົວຢ່າງມາກວດວິເຄາະ, ປະຈຸບັນຍັງລໍຖ້າຜົນກວດ. ພ້ອມດຽວກັນ ພວກເຮົາຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ
ປັດຈຸບັນ, ສປປ ລາວ ມີຜູ້ຕິດເຊື້ອລວມທັງໝົດ 58 ຄົນ, ປິນປົວຢູ່ທີ່ໂຮງໝໍ 9 ຄົນ , ປິນປົວຫາຍດີ 49 ຄົນ