ເຕືອນໄພຄົນໃຊ້ One Drive ຕະຫຼອດຊີວິດໃນລາຄາບໍ່ຮອດ 100.000 ກີບ (ແສນກີບ), ຂອງດີລາຄາຖືກບໍ່ມີແທ້ ມີແຕ່ຂອງ “ເຖື່ອນ”
ມີນັກສຶກສາ ແລະ ຜູ້ບໍລິໂພກບາງສ່ວນ ທີ່ຕ້ອງໃຊ້ງານບໍລິການ Cloud Storage ເພື່ອເກັບຂໍ້ມູນຕ່າງໆ ບໍ່ວ່າຈະເປັນ: ເອກະສານ, ຮູບພາບ, ວີດີໂອ ແລະ ເອກະສານໃຫຍ່ໆຕ່າງໆ, ແຕ່ວ່າລາຄາຂອງມັນກໍຈະສູງຫຼາຍ ເລີຍເຮັດໃຫ້ມີການໄປເລືອກການຊື້-ຂາຍ ບໍລິການ One Drive ໃນລາຄາທີ່ຖືກກວ່າ ໄດ້ຄວາມຈຳສູງເຖິງ 5 TB (500.000 GB), ສາມາດໃຊ້ງານ Microsoft office 365 ໄດ້ຟີຼ ແລະ ຍັງສາມາດໃຊ້ງານໄດ້ຕະຫຼອດຊີວິດ ອີກດ້ວຍ.
ຂອງດີລາຄາຖືກແບບນີ້ ແນ່ນອນວ່າທຸກຄົນຕ້ອງການຊື້ມາໃຊ້ງານແນ່ນອນ, ແຕ່ຮູ້ບໍ່ວ່າ ເຖິງບໍລິການດັ່ງກ່າວສາມາດໃຊ້ງານໄດ້ແທ້ ແຕ່ກໍບໍ່ແມ່ນຕະຫຼອດຊີວິດ ແລະ ຍັງເປັນຂອງທີ່ໂກງມາຫຼືວ່າຂອງເຖື່ອນນັ້ນເອງ ເຊິ່ງສ່ຽງຕໍ່ການທີ່ໄອດີດັ່ງກ່າວຖືກກວດພົບເຫັນ ແລະ ຂໍ້ມູນເຮົາອາດຈະຖືກລົບອອກທັງໝົດກໍ່ເປັນໄດ້.
ສະນັ້ນ, ຂອງດີລາຄາຖືກບໍ່ມີແທ້ ມີແຕ່ຂອງລາຄາຖືກທີ່ເປັນຂອງເຖື່ອນ, ແນະນຳໃຫ້ທຸກຄົນບໍ່ຄວນໃຊ້ຂອງເຖື່ອນ ເຮົາທຸກຄົນຄວນໃຊ້ຂອງແທ້ດີກວ່າ ເພາະຈະໄດ້ໝັ້ນໃຈໃນເລື່ອງຂອງຄວາມປອດໄພ ແລະ ກໍຍັງບໍ່ສ່ຽງທີ່ຂໍ້ມຸນຈະຖືກລົບ ອີກດ້ວຍ
ຂໍ້ມູນຈາກ: DroidSans
