ໃນວັນທີ 18 ມັງກອນ 2022 ທີ່ຜ່ານມາ ຢູ່ທີ່ຫໍປະຊຸມແຫ່ງຊາດ, ຜົນສະຫຼຸບຂອງກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຫ້ອງການສຳນັກງານນາຍົກ ໄດ້ຮັບຮອງເອົາແຜນພັດທະນາວຽກ ງານວິຊາສະເພາະຂອງ ຫສນຍ ໄລຍະ 2021-2025 ເຊິ່ງເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ເປັນແຜນງານ, ແຜນວຽກລະອຽດ, ໃນນັ້ນ ໄດ້ຮັບຮອງເອົາ 4 ຄາດໝາຍ ແລະ 3 ໜ້າທີ່ຕົ້ນຕໍຂອງ ຫສນຍ ໃນຕໍ່ໜ້າ.
ໃນກອງປະຊຸມໄດ້ຮັບຟັງການໂອ້ລົມຈາກສະຫາຍ ແລະ ໄດ້ສະແດງຄວາມເປັນຫ່ວງເປັນໄຍ ຕໍ່ດ້ານອ່ອນ, ຂໍ້ຄົງຄ້າງ ແລະ ໄດ້ຮຽກຮ້ອງໃຫ້ຄະນະພັກຊຸດໃໝ່ ສືບຕໍ່ປັບປຸງ, ແກ້ໄຂ ບັນຫາສຳຄັນ ຈຳນວນໜຶ່ງ ດັ່ງນີ້:
- ສ້າງການຫັນປ່ຽນຢ່າງແຂງ ແຮງ, ເລິກເຊິ່ງ, ຮອບດ້ານ ທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກ ກໍ່ຄືຄຳຂວັນກອງປະຊຸມໃຫຍ່ຄັ້ງທີ V ຂອງອົງ ຄະນະພັກຫ້ອງວ່າການສຳ ນັກງານນາຍົກລັດຖະມົນຕີ.
- ເພີ່ມທະວີການຊີ້ນໍາ-ນຳພາ ສະມາຊິກພັກ, ພະນັກງານ ເປັນເຈົ້າການໃຫ້ຫຼາຍຂຶ້ນ ໂດຍໃຫ້ມີ ການຫັນປ່ຽນຢ່າງແຂງແຮງ, ເລິກເຊິ່ງຮອບດ້ານ ໃນການຈັດ ຕັ້ງປະຕິບັດໜ້າທີ່ ເປັນເສນາທິການທີ່ດີ, ເກັ່ງ, ຮັບປະກັນຄວາມຖືກຕ້ອງ, ວ່ອງໄວ, ໂປ່ງໃສ ເປັນມືອາຊີບ.
- ຕ້ອງປັບປຸງ ແລະ ເພີ່ມທະວີການເຮັດໜ້າທີ່ ປະສານງານ ກັບແໜງການກ່ຽວຂ້ອງ ແລະ ອົງການປົກຄອງທ້ອງຖິ່ນ ລວມທັງປະສານງານກັບຫ້ອງວ່າການສູນກາງພັກ, ຄະນະເລຂາທິການສະພາແຫ່ງຊາດ ແລະ ຫ້ອງວ່າການປະທານປະເທດ.
- ເອົາໃຈໃສ່ເປັນພິເສດຕໍ່ການຮັກສາຄວາມລັບທາງລັດຖະການ ເປັນຕົ້ນ ຄວາມລັບໃນການເຄື່ອນ ໄຫວ, ຊີ້ນໍາ ແລະ ຕົກລົງ ຂອງລັດຖະບານ, ນາຍົກລັດ ຖະມົນຕີ ແລະ ບັນດາຮອງນາຍົກລັດ ຖະມົນຕີ, ຄວາມລັບທາງດ້ານເອກະສານໃຫ້ໄດ້ດີກວ່າເກົ່າ.
- ຍົກສູງບົດບາດ, ໜ້າທີ່ ແລະ ຄວາມຮັບຜິດຊອບ ເຂົ້າໃນວຽກງານໂຄສົກລັດຖະບານ, ການສະໜອງຂໍ້ມູນຂ່າວສານ, ການໂຄສະນາເຜີຍແຜ່ ຕ້ອງວ່ອງໄວ ແລະ ຮັບປະກັນ ຄຸນນະພາບ ໂດຍສະເພາະການແກ້ຂ່າວທີ່ໂຈມຕີລັດຖະບານ ຕ້ອງທັນການ, ຂໍ້ມູນຈາກລັດຖະບານ ຫາ ປະຊາຊົນ ແລະ ຈາກປະຊາຊົນ ເຖິງລັດຖະບານ ຕ້ອງຊັດເຈນ, ແທດເຖິງຕົວຈິງ ແລະ ທັນການ.
- ສືບຕໍ່ຄົ້ນຄວ້າປັບປຸງການຈັດຕັ້ງ ແລະ ການ ເຄື່ອນໄຫວຂອງຕົນ ໃຫ້ແທດເໝາະກັບເງື່ອນໄຂໃໝ່ ແລະ ຮັບປະກັນການປະຕິບັດໜ້າທີ່ວຽກງານຂອງຕົນໄດ້ ຕາມທິດກະທັດຮັດ, ມີປະສິດທິຜົນ, ການບໍລິຫານ-ການຈັດການ ໃຫ້ມີຄວາມວ່ອງໄວ, ຊັດເຈນ, ເດັດຂາດ ໂປ່ງໃສ ແລະ ມືອາຊີບ.
- ບັນດາສະຫາຍໃນຄະນະພັກຊຸດໃໝ່ ຈົ່ງສືບຕໍ່ຝຶກຝົນຫຼໍ່ຫຼອມຕົນເອງ ທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ຕັ້ງໜ້າຄົ້ນຄວ້າຮ່ໍາຮຽນ, ຍົກສູງຄວາມຮັບຜິດຊອບດ້ານເມືອງ ເພື່ອຍົກລະດັບຄວາມຮູ້ຄວາມສາມາດ ຕິດພັນກັບການປັບປຸງແຜນການນໍາພາ ແລະ ວິທີເຮັດວຽກຂອງຕົນ ໃຫ້ດີຂຶ້ນເປັນກ້າວໆ.
ກອງປະຊຸມ ໄດ້ຮຽກຮ້ອງໃຫ້ພະນັກງານ, ສະມາຊິກພັກທຸກສະຫາຍ ພາຍໃນອົງຄະນະພັກ ຫສນຍ ຈົ່ງເຊີດຊູຄວາມເປັນແບບຢ່າງນໍາໜ້າ ໃນການປະຕິບັດມະຕິຂອງກອງປະຊຸມໃຫຍ່ຄັ້ງນີ້ ໃຫ້ປະກົດຜົນເປັນຈິງ.
ຂໍ້ມູນຈາກ: Lao National Radio