ໃນວັນທີ 16 ກັນຍາ 2022 ທີ່ຫ້ອງປະຊຸມອົງການພັດທະນາ ແລະ ບໍລິຫານຕົວເມືອງ ໄດ້ຈັດພິທີເຊັນສັນຍາການດໍາເນີນກິດຈະກໍາການຄຸ້ມຄອງ ແລະ ການຈັດການຂີ້ເຫຍື້ອແບບທັນສະໄໝຢູ່ສະໜາມເມືອງຫຼວງນໍ້າທາ ລະຫວ່າງ ອົງການພັດທະນາ ແລະ ບໍລິຫານຕົວເມືອງຫຼວງນໍ້າທາ ຮ່ວມກັບ ບໍລິສັດ ວົງພານິດລາວ ໂດຍມີ ທ່ານ ຄຳມີ ວົງບົວລົມ ຮອງປະທານຜູ້ປະຈຳການ ອົງການພັດທະນາ ແລະ ບໍລິຫານຕົວເມືອງ ຫຼວງນໍ້າທາ ຮ່ວມກັບ ທ່ານ ເຄວິນ ລາດຊະຄໍາ ອໍານວຍການບໍລິສັດ ວົງພານິດລາວ, ມີຜູ້ຕ່າງໜ້າຈາກຫ້ອງວ່າການແຂວງພະແນກແຜນການ ແລະ ການລົງທຶນ, ພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ, ພະແນກໂຍທາທິການ ແລະ ການຂົນສົ່ງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂດຍການຈັດການຂີ້ເຫຍື້ອ ຢູ່ສະໜາມເມືອງຫຼວງນໍ້າທານີ້ ຈະເປັນການນໍາໃຊ້ການບໍລິຫານຈັດການແບບທັນສະໄໝ ດ້ວຍຮູບແບບຄັດແຍກ, ແປຮູບຜະລິດຕະພັນ, ປະດິດໃໝ່ ແລະ ສົ່ງອອກຈໍາໜ່າຍ, ແນ່ໃສ່ເພື່ອຫຼຸດຜ່ອນ ປະລິມານຂີ້ເຫຍື້ອພາຍໃນສະໜາມ ເພື່ອເຮັດໃຫ້ລະບົບການຈັດການໃຫ້ມີປະສິດທິພາບ, ໃຫ້ທັນສະໄໝຫຼາຍຂຶ້ນ ແລະ ເປັນການຫຼຸດຜ່ອນມົນລະພິດໃຫ້ກັບສິ່ງແວດລ້ອມຂອງແຂວງ ຫຼວງນໍ້າທາ.
