ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ໄດ້ມີຄຳເຫັນໂອ້ລົມຕໍ່ກອງປະຊຸມສະຫຼຸບຕີລາຄາຂະບວນການແຂ່ງຂັນຮັກຊາດ ແລະ ພັດທະນາ ໂດຍໄດ້ເນັ້ນ 6 ບັນຫາສຳຄັນ ເພື່ອຊຸກຍູ້ໃຫ້ຂະບວນການແຂ່ງຂັນຈົນເຖິງປີ 2025.
ທ່ານ ທອງລຸນ ຍັງໄດ້ໃຫ້ຮູ້ອີກວ່າ ການແຂ່ງຂັນ “ຮັກຊາດ ແລະ ພັດທະນາ” ແມ່ນການສ້າງ ແລະ ຍົກລະດັບ ແນວຄິດ-ວັດທະນະທໍາຂອງຄົນລາວ ແລະ ຂອງສັງຄົມລາວ ແນໃສ່ສ້າງຄົນໃໝ່ ກ້າວໄປຕາມເສັ້ນທາງສັງຄົມນິຍົມ ທີ່ມີນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ, ມີລະບຽບວິໄນ, ປະດິດສ້າງ, ສ້າງໄດ້ຜະລິດຕະພັນໃໝ່, ສ້າງໄດ້ຂະບວນການໃໝ່ ທີ່ກ້າວໜ້າ, ບຸກທະລຸໄປສູ່ແບບແຜນ ທີ່ຕິດພັນກັບຄຳຂວັນ: “ຕົນເພື່ອສັງຄົມ ແລະ ສັງຄົມເພື່ອຕົນ” ຫຼື ທີ່ພວກເຮົາເຄີຍເວົ້າກັນຜ່ານມາວ່າຖ້າເຮົາຢືດໝັ້ນຈິດໃຈ: “ແຕ່ລະຄົນ ເພື່ອທຸກຄົນ, ທຸກຄົນ ເພື່ອແຕ່ລະຄົນ”.
ນອກນັ້ນ, ທ່ານປະທານປະເທດ ກໍໄດ້ຝາກບາງຄຳເຫັນ ຕໍ່ບັນດາທ່ານ ແລະ ປະຊາຊົນລາວໃນທົ່ວປະເທດ 6 ບັນຫາສຳຄັນ ຄື:
- ຂໍໃຫ້ສືບຕໍ່ ປຸກລະດົມທົ່ວປວງຊົນລາວບັນດາເຜົ່າ, ຊັ້ນຄົນຕ່າງໆໃນທົ່ວປະເທດ ພ້ອມກັນຕັ້ງໜ້າເຂົ້າຮ່ວມໃນຂະບວນການແຂ່ງຂັນ «ຮັກຊາດ ແລະ ພັດທະນາ» ຕາມຄາດໝາຍ ໃຫ້ໄວ, ໃຫ້ດີ, ໃຫ້ຫຼາຍ ແລະ ໃຫ້ຖືກຕ້ອງຕາມກົດໝາຍ.
- ຄະນະພັກ, ອົງການປົກຄອງແຕ່ລະຂັ້ນ ຕ້ອງສືບຕໍ່ປ່ຽນແປງຕົນເອງຢ່າງບໍ່ຢຸດຢັ້ງ ຕາມຈິດໃຈ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ.
- ການແຂ່ງຂັນ ຮັກຊາດ ແລະ ພັດທະນາ ຕ້ອງເຮັດໃຫ້ແຕ່ລະຄົນ, ແຕ່ລະຄອບຄົວ ແລະ ສັງຄົມ ມີຄວາມພາກພູມໃຈໃນຄວາມເປັນລາວ-ເປັນຄົນລາວ, ມີສະຕິຊາດ ເອກະພາບ, ເອກະລາດ, ເປັນເຈົ້າຕົນເອງ ໃຫ້ໄດ້ຮັບການເຊີດຊູ ຂຶ້ນສູ່ລະດັບສູງ, ຜະລິດ ແລະ ຊົມໃຊ້ ຜະລິດຕະພັນພາຍໃນຂອງພວກເຮົາໃຫ້ຫຼາຍ, ແກ້ໄຂຄວາມຫຍໍ້ທໍ້ດ້ານເສດຖະກິດ, ຕີຖອຍ ແລະ ກໍາຈັດປັດເປົ່າສິ່ງຫຍໍ້ທໍ້ຕ່າງໆ.
- ຕ້ອງສ້າງຕົວແບບດີເດັ່ນ, ນໍາໜ້າ ຈາກນ້ອຍຫາໃຫຍ່, ຈາກແຕ່ລະດ້ານດຽວກ້າວສູ່ຫຼາຍດ້ານ ແລະ ຂະຫຍາຍອອກໃຫ້ກວ້າງຂວາງ, ມີຄຸນນະພາບ, ຍືນຍົງ ແລະ ຂະຫຍາຍຕົວ.
- ໃຫ້ຖືເອົາການຕິດຕາມ, ຊຸກຍູ້, ກວດກາ ແລະ ຕີລາຄາວຽກດີ, ຄົນເດັ່ນ ທັງຈັດຕັ້ງຍ້ອງຍໍ ໃຫ້ຖືກຄົນ, ຖືກວຽກ ແລະ ທັນການ ເປັນໜຶ່ງໃນບັນດາມາດຕະການກະຕຸ້ນ ເພື່ອສົ່ງເສີມຂະບວນການ ໃຫ້ຂະຫຍາຍຕົວ ນັບມື້ກວ້າງ ຂວາງ ແລະ ແຂງແຮງ.
- ບັນດາອົງການຈັດຕັ້ງໃນທົ່ວລະບົບການເມືອງ ຕ້ອງໄດ້ສືບຕໍ່ເພີ່ມທະວີ ການນໍາພາຊີ້ນໍາ, ບັນຊາ ແລະ ຕິດຕາມ, ກວດກາ ການຜັນຂະຫຍາຍຂໍ້ແຂ່ງຂັນ ຮັກຊາດ ແລະ ພັດທະນາ.
