ກະຊວງ ອຸດສາຫະກຳ ແລະ ການຄ້າ ໄດ້ອອກມາຊີ້ແຈງສາເຫດທີ່ມີການປັບຂຶ້ນລາຄານໍ້າມັນເຊື້ອໄຟຂາຍຍ່ອຍທົ່ວປະເທດ ເພາະວ່າໃນລະຫວ່າງວັນທີ 5-12 ຕຸລາ 2022 ລາຄານ້ຳມັນດິບ ແລະ ນ້ຳມັນສໍາເລັດຮູບໃນຕະຫລາດໂລກ ມີອັດຕາສະເລ່ຍສູງຂຶ້ນ.
ສະເລ່ຍລາຄານ້ຳມັນດິບໃນຕະຫລາດ Brent ແມ່ນ 94,7 ໂດລາ/ບາເລນ (ເພີ້ມຂຶ້ນ 5,2 ໂດລາ/ບາເລນ), WTI ແມ່ນ 89,4 ໂດລາ/ບາເລນ (ເພີ່ມຂຶ້ນ 6,8 ໂດລາ/ບາເລນ), Dubai ແມ່ນ 93,6 ໂດລາ/ບາເລນ, ສະເລ່ຍລາຄາ ມັນສຳເລັດຮູບ ແອັດຊັງພິເສດແມ່ນ 95,6 ໂດລາ/ບາເລນ (ເພີ່ມຂຶ້ນ 3,5 ໂດລາ/ບາເລນ), ແອັດຊັງທຳມະດາ 92,6 ໂດລາ/ ມາເລນ (ເພີ່ມຂຶ້ນ 4 ໂດລາ/ບາເລນ), ແລະ ກາຊວນ 139,9 ໂດລາ/ບາເລນ (ເພີ່ມຂຶ້ນ 16,7 ໂດລາ/ບາເລນ) ເຊິ່ງນີ້ແມ່ນການສົມທຽບໃສ່ ໄລຍະຜ່ານມາ 28 ກັນຍາ-4 ຕຸລາ 2022.
ດ້ວຍເຫດນັ້ນເອງ ເຮັດໃຫ້ກະຊວງອຸດສາຫະກຳ ແລະ ການຄ້າ ໄດ້ປະສານສົມທົບກັບຂະແໜງການກ່ຽວຂ້ອງສະມາຄົມນໍ້າມັນເຊື້ອໄຟ ແລະ ອາຍແກ໊ສລາວ ປັບລາຄານ້ຳມັນເຊື້ອໄຟຂຶ້ນ ເພື່ອຮັບປະກັນການສະໜອງນໍ້າມັນເຊື້ອໄຟພາຍໃນ ແລະ ບໍ່ໃຫ້ນໍ້າມັນເຊື້ອໄຟຂາດຄືດັ່ງໃນໄລຍະຜ່ານມາ.
ຕາມແຈ້ງການສະບັບເລກທີ 1411/ອຄ, ລົງວັນທີ 13 ຕຸລາ 2022, ໂດຍໃນການປັບລາຄາ ຄັ້ງນີ້ກໍ່ໄດ້ຄຳນຶງເຖິງຜົນກະທົບຕໍ່ພໍ່ແມ່ພີ່ນ້ອງປະຊາຊົນເປັນຫລັກ, ຊຶ່ງລັດຖະບານກໍ່ໄດ້ດັດສົມລາຄານ້ຳມັນເຊື້ອໄຟໄວ້ບໍ່ໃຫ້ມີ ລາຄາສູງຈົນເກີນໄປ ໂດຍການຫຼຸດ/ບໍ່ເກັບອາກອນຊົມໃຊ້, ອັດຕາການເກັບຄັງແຮນໍ້າມັນເຊື້ອໄຟ ແລະ ນະໂຍບາຍອື່ນໆ.
