ກາຍເປັນກະແສກັບມາໃນໂລກອອນລາຍອີກຄັ້ງ ເມື່ອມະຫາວິທະຍາໄລແຫ່ງໜຶ່ງໃນ ຟິລິປິນ ໄດ້ນໍາແນວຄິດໝວກປ້ອງກັນການກ່າຍ ມາໃຊ້ໃນການສອບເສັງ ໂດຍໃຫ້ນັກສຶກສາເປັນຜູ້ຄິດຂຶ້ນມາເອງ ຈົນເປັນຂ່າວດັງໄປທົ່ວໂລກ.
ໂດຍຫຼັງຈາກທີ່ສຳນັກຂ່າວ BBC ນໍາເອົາພາບຈາກເພຈ Mary Joy Mandane-Ortiz ເຊິ່ງເປັນສາສະດາຈານວິສະວະກຳເຄື່ອງກົນ ທີ່ມະຫາວິທະຍາໄລດ້ານວິສະວະກຳ Bicol University College of Engineering ໃນເມືອງ Legazpi City ປະເທດຟິລິປິນ ມາເຜີຍແຜ່ ກໍໄດ້ຮັບການແຊຣ໌ ແລະ ນໍາໄປເຜີຍແຜ່ອີກຈຳນວນຫຼາຍ.
Mandane-Ortiz ກ່າວວ່າ ໂຕລາວເອງໄດ້ແຮງບັນດານໃຈມາຈາກມະຫາວິທະຍາໄລໃນປະເທດໄທ ເມື່ອປີ 2013 ເຊິ່ງສ້າງກະແສທັງດ້ານບວກ ແລະ ດ້ານລົບມາແລ້ວ ໂດຍໃນຄັ້ງນີ້ ລາວໄດ້ໃຫ້ນັກສຶກສາອອກແບບໝວກປ້ອງກັນການກ່າຍ ໃນແບບຂອງໂຕເອງ ເຊິ່ງກໍມີທັງໜ້າຕາທີ່ສວຍງາມ ແລະ ແປກປະຫຼາດ ອອກມາດັ່ງໃນພາບ ຈົນເປັນຂ່າວດັ່ງກ່າວ.
ຈາກແນວຄວາມຄິດນີ້ ນອກຈາກນັກສຶກສາຈະໄດ້ຄວາມມ່ວນ ແລະ ໄດ້ໃຊ້ຄວາມຄິດສ້າງສັນ Mandane-Ortiz ກ່າວວ່າ ນັກສຶກສາຍັງເຮັດບົດສອບເສັງໄວຂຶ້ນ ໂດຍບໍ່ມີການກ່າຍອີກດ້ວຍ.
ແນວຄວາມຄິດການປ້ອງກັນການກ່າຍນັ້ນ ຖືເປັນອີກໜຶ່ງເລື່ອງທີ່ທຸກໂຮງຮຽນພະຍາຍາມຫາແນວທາງໃໝ່ໆ ມາປັບໃຊ້ ບໍ່ວ່າຈະເປັນການອອກແບບບົດເສັງຫຼາຍຊຸດ ການຈັດໂຕະແບບສະຫຼັບແຂ້ວປາໃນຈີນ ຫຼື ລວມໄປເຖິງການນໍາເອົານັກສຶກສາອອກມາຕັ້ງກາງແຈ້ງຄືໃນ ກຳປູເຈຍ ແລະ ຫວຽດນາມ ເປັນຕົ້ນ.
ເຖິງຢ່າງໃດກໍຕາມ ການກ່າຍບົດສອບເສັງ ຈະເປັນເຄື່ອງວັກແທກດ້ານຈັນຍາບັນ ແລະ ສິນລະທຳຢ່າງໜຶ່ງຂອງສັງຄົມ ທີ່ເຖິງວ່າຈະມີການສອນດ້ານນີ້ຢູ່ແລ້ວ ແຕ່ກໍຍັງມີອີກຫຼາຍປັດໄຈທີ່ເຮັດໃຫ້ຈຳເປັນຕ້ອງນໍາແນວທາງປະຕິບັດອື່ນໆ ມາໃຊ້ປະກອບກັນ.
ສຳລັບໃນປະເທດລາວ ຖ້າໂຮງຮຽນໃດມີໄອເດຍປ້ອງກັນການກ່າຍບົດສອບເສັງທີ່ສ້າງສັນກວ່ານີ້ ກໍສາມາດເອົາມາແບ່ງປັນໃຫ້ເບິ່ງແນ່ເດີ້.
ຂໍ້ມູນຈາກ: BBC ແລະ Philippine Star