ອີກບໍ່ພໍເທົ່າໃດ ກໍຈະຮອດມື້ສົ່ງທ້າຍປີເກົ່າຕ້ອນຮັບປີໃໝ່ແລ້ວ ແຕ່ສຳລັບໃຜທີ່ຍັງສົງໄສວ່າ ກ່ອນມື້ປີໃໝ່ຄວນເຮັດຫຍັງແດ່ ເພື່ອຕ້ອນຮັບໂຊກລາບ, ສິ່ງດີໆ ທີ່ຈະເກີດຂຶ້ນໃນມື້ປີໃໝ່ ມື້ນີ້ເຮົາມີ ຄວາມເຊື່ອບາງຢ່າງ ກ່ຽວກັບສິ່ງທີ່ ຄວນເຮັດ ແລະ ບໍ່ຄວນເຮັດໃນມື້ຂຶ້ນປີໃໝ່ມາໃຫ້ຮູ້ກັນ.
- ກ່ອນວັນ 31 ທັນວາ ຕ້ອງອະນາໄມ, ປັດກວດເຮືອນຊານໃຫ້ສະອາດ ເກັບມ້ຽນເຄື່ອງຂອງໃຫ້ເປັນລະບຽບຮຽບຮ້ອຍ ພ້ອມເປີດຮັບສິ່ງໃໝ່ໆ ໃນມື້ປີໃໝ່.
- ຕື່ນເຊົ້າ ເຂົ້າວັດ ເຮັດບຸນ ຖວາຍສັງຂະທານ ອຸທິດສ່ວນກຸສົນ ໃຫ້ກັບເຈົ້າກຳນາຍເວນຜູ້ທີ່ລ່ວງລັບໄປ ເພື່ອສ້າງບຸນກຸສົນ ເພື່ອເປັນສີລິມຸງຄຸນໃຫ້ແກ່ຊີວິດ.
- ເຄົາລົບພໍ່ແມ່, ຜູ້ມີພະຄຸນທີ່ລ້ຽງດູ ແລະ ອົບຮົມສັ່ງສອນເຮົາມາ ພ້ອມກັບນຳພວງມະໄລງາມໆມານົບຂໍພອນຈາກພວກທ່ານ ເຊິ່ງພອນທີ່ໄດ້ຮັບຈາກຜູ້ມີພະຄຸນນັ້ນ ຖືເປັນພອນອັນປະເສີດ.
- ຕັ້ງເປົ້າໝາຍໃນປີໜ້າຢ່າງໜ້ອຍ 1 ຢ່າງ ວ່າຢາກເຮັດຫຍັງໃຫ້ສຳເລັດ.
- ສຳລັບໃຜທີ່ມີບັນຫາທາງດ້ານການເງິນ ຄວນຫຼຸດລາຍຈ່າຍທີ່ບໍ່ຈຳເປັນ ແລະ ໃຊ້ວິທີເກັບອອມເຊັ່ນ: ຢອດກະປຸກ, ຝາກປະຈຳ ແລະ ອື່ນໆ.
- ວຽກງານທີ່ຍັງຄ້າງຄາໃນປີນີ້ ກໍຮີບສະສາງກ່ອນທ້າຍປີ ຈະຊ່ວຍໃຫ້ໝົດຄວາມກັງວົນໃຈ ແລະ ສິ່ງສຳຄັນຢ່າລືມເກັບມ້ຽນໂຕະເຮັດວຽກໃຫ້ເປັນລະບົບລະບຽບ ສຳລັບການເລີ່ມຕົ້ນວຽກໃໝ່ດ້ວຍຄວາມພ້ອມ ຫຼັງຈາກພັກຍາວ.
- ຈັດການກັບບັນຫາທາງດ້ານຈິດໃຈ ບໍ່ວ່າຈະຮູ້ສຶກຊັງ ຫຼືບໍ່ພໍໃຈໃຜຢູ່ ກໍຄວນປ່ອຍວາງ ແລະ ໃຊ້ໂອກາດນີ້ໃຫ້ອະໄພ ໃນສິ່ງທີ່ຄຽດແຄ້ນກັນ ນອກຈາກຈະຊ່ວຍໃຫ້ສະບາຍໃຈແລ້ວ ຍັງຖືເປັນບຸນກຸສົນຢ່າງໜຶ່ງອີກດ້ວຍ.
- ສົ່ງຂໍ້ຄວາມຫາຄົນທີ່ເຈົ້າຮັກ ບໍ່ວ່າຈະໂທ ຫຼືສົ່ງຂໍ້ຄວາມ ກໍລ້ວນແລ້ວແຕ່ເຮັດໃຫ້ຜູ້ໄດ້ຮັບມີຄວາມສຸກ.
- ຈັດງານລ້ຽງສະຫຼອງຕາມຄວາມເໝາະສົມ, ມີກິດຈະກຳມ່ວນໆ ຈັບສະຫຼາກແລກຂອງຂວັນ, ຫຼິ້ນເກມ, ຮ້ອງເພງ ແລະ ອື່ນໆ ເພື່ອກະຊັບຄວາມສຳພັນໃນຄອບຄົວ ແລະ ຍາດຕິພີ່ນ້ອງ.
ນອກຈາກນັ້ນຍັງມີຄວາມເຊື່ອບາງຢ່າງ ທີ່ບໍ່ຄວນເຮັດໃນມື້ປີໃໝ່ກໍຄື: ຫ້າມສະຜົມໃນມື້ທ້າຍປີ ແລະ ວັນທີ 1 ມັງກອນ, ຫ້າມໃຊ້ຂອງມີຄົມ, ບໍ່ຄວນອະນາໄມເຮືອນ ເພາະຈະນໍາຄວາມໂຊກດີອອກໄປໝົດ ແລະ ຄວນຫຼີກລ້ຽງການໄປງານສົບ, ຢ່າເວົ້າເຖິງຄົນຕາຍເປັນຕົ້ນ
ໝາຍເຫດ: ນີ້ເປັນພຽງຄວາມເຊື່ອສະເພາະບຸກຄົນເທົ່ານັ້ນ ຖ້າຫາກທ່ານໃດຢາກລອງເຮັດເພື່ອວ່າປີໜ້າຈະໄດ້ມີສິ່ງດີໆເຂົ້າມາໃນຊີວິດ ກໍສາມາດນຳໄປປະຕິບັດຕາມກັນໄດ້ເດີ.