ເທັກໂນໂລຢີ AI ຈະເປັນໂຕຢືນຢັນການພັດທະນາຂອງໂລກໃນອະນາຄົດເລີຍກໍວ່າໄດ້ ເມື່ອມີຂໍ້ມູນອອກມາວ່າ ຈະມີການນໍາໃຊ້ AI ເຂົ້າຊ່ວຍໃນລະບົບປະຕິບັດການ Windows ທີ່ເຮົາໃຊ້ຢູ່ທຸກມື້ນີ້.
ໃນງານ CES 2023 ທີ່ຜ່ານມາ Panos Panay ຮອງປະທານບໍລິຫານ ຂອງ Microsoft ໄດ້ຖືກເຊີນຂຶ້ນເວທີເປີດໂຕຜະລິດຕະພັນໃໝ່ຂອງ AMD ແລະ ຖືກຖາມຄຳຖາມກ່ຽວກັບທິດທາງການພັດທະນາຂອງ Microsoft ໃນອະນາຄົດ ເຊິ່ງລາວກໍໄດ້ເວົ້າເຖິງແນວທາງໃນການນໍາເອົາ AI ມາພັດທະນາແລະປະຍຸກໃຊ້ກັບງານທຸກດ້ານຂອງ Microsoft ລວມໄປເຖິງ Windows 12 ທີ່ຈະຫັນໄປຂັບເຄື່ອນດ້ວຍພະລັງຂອງ AI ຫຼາຍຂຶ້ນ.
ເຮົາອາດຈະເຫັນຍຸກທີ່ການປະມວນຜົນຂໍ້ມູນຕ່າງໆ ບໍ່ຈຳເປັນຕ້ອງໃຊ້ຮາດແວແຕ່ຢ່າງດຽວ ດ້ວຍການທີ່ເອົາພະລັງຂອງ AI ທີ່ສົ່ງຕົງມາຈາກ Cloud ຈະສາມາດມາເຮັດວຽກຮ່ວມກັບລະດັບ OS ເຂົ້າມາຊ່ວຍເສີມທາງໃຫ້ກັນ ເຮັດໃຫ້ມີການປະມວນຜົນໄວຂຶ້ນກວ່າທີ່ຜ່ານໆມາ.
ເຖິງຢ່າງໃດກໍຕາມ ຈາກຂໍ້ມູນຂອງ Microsoft ໄດ້ໃຫ້ຮູ້ອີກວ່າ Microsoft ກຳລັງພັດທະນາ AI ແລະ ຂໍຮ່ວມລົງທຶນກັບ OpenAI ເຊິ່ງນັ້ນສະແດງໃຫ້ເຫັນວ່າ ແນວທາງການໃຊ້ AI ເຂົ້າຮ່ວມໃນການເຮັດວຽກຂອງ Microsoft ອາດຈະມາເຖິງໃນໄວໆນີ້.
ຂໍ້ມູນຈາກ: AMD