ເດືອນກຸມພາເປັນເດືອນ ທີ່ເຕັມໄປດ້ວຍຄວາມສຸກຂອງການສະແດງຄວາມຮັກ, ຄວາມຫ່ວງໃຍຂອງຄົນທີ່ປາຖະໜາດີ ແລະ ຢາກໃຫ້ເຂົາມີຄວາມສຸກ ເຊິ່ງກໍເປັນທີ່ຮັບຮູ້ກັນດີຢູ່ແລ້ວວ່າ ວັນທີ່ 14 ກຸມພາ ເປັນວັນແຫ່ງຄວາມຮັກ ແລະ ຫຼາຍຄົນກໍສະແດງຄວາມຮັັກ ດ້ວຍການມອບດອກໄມ້ໃຫ້ແກ້ຄົນທີ່ເຮົາຮັກ ແຕ່ຈະໄຫວບໍ່ກັບລາຄາດອກໄມ້ທີ່ຈະຂຶ້ນເກືອບເທົ່າຕົວຂອງປີກາຍ.
ຈາກການສອບຖາມແມ່ຄ້າຂາຍດອກໄມ້ສົດ ທີ່ຮັບຈັດກະຕ່າດອກໄມ້, ຊໍດອກໄມ້ ແຖວຖະໜົນດົງປາຍນາ ບ້ານໂພນສະຫວັນ, ເມືອງສີສັດຕະນາກ, ນະຄອນຫຼວງວຽງຈັນ ເວົ້າວ່າ: ລາຄາດອກໄມ້ໃນປີນີ້ ໜ້າຈະສູງກວ່າປີກາຍຫຼາຍ ເພາະອັດຕາແລກປ່ຽນເງິນຂຶ້ນສູງ ຈຶ່ງເຮັດໃຫ້ດອກໄມ້ທີ່ເຮົານຳເຂົ້າມາ ຈາກປະເທດເພື່ອນບ້ານມີລາຄາສູງຂຶ້ນເປັນເທົ່າຕົວ ເຊິ່ງປີນີ້ລາຄາຈະຢູ່ທີ່ເທົ່າໃດນັ້ນຍັງບໍ່ສາມາດກຳນົດໄດ້ເທື່ອ, ແມ່ຄ້າຍັງເວົ້າອີກວ່າ: ປັດຈຸບັນຍັງຢູ່ທີ່ລາຄາ 100.000 – 300.000ກີບ ແຕ່ໃນຊ່ວງມີວັນທີ່ 13-14 ກຸມພາຈະມີລາຄາສູງຂຶ້ນ ເຊິ່ງປີກາຍນີ້ຈະຢູ່ທີ່ 100.000-700.000 ກີບ.
ດອກໄມ້ທີ່ໄດ້ຂາຍດີ ໃນຊ່ວງວັນແຫ່ງຄວາມຮັກນີ້ຈະເປັນ ດອກກຸຫຼາບແດງ ເພາະດອກກຸຫຼາບແດງ ເປັນຕົວແທນແຫ່ງຄວາມຮັກ, ຄວາມງົດງາມ ແລະ ຄວາມໂຣແມນຕິກ ອີກທັງຍັງເຊື່ອມໂຍງກັບເທບພະເຈົ້າແຫ່ງຄວາມຮັກ ຈຶ່ງເຮັດໃຫ້ຄົນສ່ວນໃຫຍ່ ນິຍົມມອບດອກກຸຫຼາບແດງ ໃຫ້ກັບຄົນຮັກ ເພື່ອສື່ເຖິງຄວາມໃນໃຈ.