“ບັງເອີນຮັກ ຂ້ອຍຮັກເຈົ້າ Loser Lover” ຮູບເງົາ Romantic Comedy ລະຫວ່າງລາວ-ໄທ ຈາກຜູ້ກຳກັບ ຊານເສດ ວິເສດໄຊ ແລະ ວິດທາວິນ ເລີດລັດສະໝີມາລາ ກັບມຸມມອງຂອງຄວາມຮັກຂອງສອງປະເທດທີ່ຢາກນຳສະເໜີຜ່ານຮູບເງົາ ເຊິ່ງຮູບເງົາເລື່ອງນີ້ເປັນການຮ່ວມທຶນສ້າງລະຫວ່າງ 2 ປະເທດ ລາວ ກັບ ໄທ ໂດຍໄດ້ດາລາລາວຊື່ດັງ ລູກນໍ້າ ທິດາລັດ Miss Laos 2011 ແລະ ແຮນນ້າ 4Eve ມາເປັນນັກສະແດງໃນເລື່ອງນີ້.
ທີມງານ ອິນໄຊລາວ ໄດ້ມີໂອກາດສຳພາດຜູ້ກຳກັບຮູບເງົາເລື່ອງນີ້ ເຊິ່ງເຮົາຈະພາໄປໂອ້ລົມກ່ຽວກັບຄວາມເປັນມາ ແລະ ຄວາມຮູ້ສຶກ ລວມເຖິງແຮງບັນດານໃຈໃນການສ້າງຮູບເງົານີ້ຂຶ້ນມາ.
ຈຸດເລີ່ມຕົ້ນໃນການສ້າງຮູບເງົາລະຫວ່າງ ລາວ-ໄທ ບັງເອີນຮັກຂ້ອຍຮັກເຈົ້າ Loser Lover
ຜູ້ກຳກັບ: ຮູ້ສຶກວ່າມີຄວາມຜູກພັນກັບປະເທດລາວ ປະກອບກັບມີຍາດພີ່ນ້ອງທາງລາວນໍາ ແລະ ຍັງຮູ້ສຶກວ່າ ຢູ່ທີ່ລາວມີສິ່ງທີ່ໜ້າຈະຫຼິ້ນ ຫຼື ເອົາມາໃຊ້ກັບໜັງພໍສົມຄວນ ແຕ່ກໍຍັງບໍ່ໄດ້ຖືເຜີຍແຜ່ອອກໄປ ອາດຈະເປັນເລື່ອງຂອງທີ່ກົດລະບຽບ ລວມໄປເຖິງ ທີ່ອຸດອນ ຢູ່ປະເທດໄທກໍຄືກັນ ເພາະທີ່ອຸດອນບໍ່ຕ່າງຈາກວຽງຈັນ ຍັງບໍ່ເຄີຍຖືກນໍາສະເໜີອອກເປັນໜັງ 100%
ແຕ່ເບິ່ງອີກມຸມໜຶ່ງວ່າ ຈະເຮັດແນວໃດໃຫ້ໜັງເປັນ Romantic Comedy ກ່ຽວກັບລະຫວ່າງປະເທດຈະເປັນສ່ວນໃຫຍ່ ກໍເລີຍໄດ້ລົມກັບ ລູກນໍ້າ ເພາະຊ່ວງຕອນນັ້ນ ພວກເຮົາກຳລັງຊອກຫານັກສະແດງຢູ່ລາວ ແລະ ພໍດີເຄີຍຮ່ວມງານກັບນໍ້າ ມາແລ້ວ ໂປຟາຍຂອງນໍ້າກໍຈະເປັນສິ່ງທີ່ສາມາດຮ່ວມງານກັນໄດ້ ແລະ ໂປເຈັກເຮົາກໍເລີ່ມຂຶ້ນມາວ່າ ເປັນການຊອກຫາຄວາມຮັກ, ແລະຍັງເຫັນມີຮູບເງົາເລື່ອງໜຶ່ງ ສະບາຍດີຫຼວງພະບາງ ກໍຄືໄທມາຖ່າຍຢູ່ລາວໃຊ້ຊີວິດຢູ່ລາວ ແຕ່ບາດນິເຮົາເອົາລາວ ໄປໃຊ້ຊີວິດຢູ່ໄທບາດນິ ເຊິ່ງຈະເປັນແພັດຊັນທີ່ໄທກັບມາຊອກຫາ.
ຄວາມຮັກທີ່ຈະນໍາສະເໜີຜ່ານຮູບເງົາເລື່ອງນີ້ ເປັນຄວາມຮັກໃນແບບໃດ
ຜູ້ກຳກັບ: ຄວາມຮັກທີ່ຍາກນໍາສະເໜີ ກໍແມ່ນຄວາມຮັກແຕ່ລະຄົນນິ ມັນຂຽນຄືກັນ ເວົ້າ ຄືກັນ ແຕ່ຄວາມຮູ້ສຶກມັນຕ່າງກັນ ຄວາມຮັກຂອງນາງເອກກໍເປັນອີກຮູບແບບໜຶ່ງ ຂອງພະເອກກໍເປັນອີກຮູບແບບໜຶ່ງມັນເຮັດໃຫ້ເຮົາຢູ່ເປັນເສັ້ນຄູ່ຂະໜານ ບາງຄົນທີ່ບໍ່ເຊື່ອອີ່ຫຍັງເລີຍ ທີ່ບໍ່ເຊື່ອເລື່ອງຂອງສາດແຫ່ງຄວາມເຊື່ອ ແຕ່ເຊື່ອວິທະຍາສາດຫຼາຍກວ່າ, ເຂົາກະເລີຍບອກວ່າ ການທີ່ທັງສອງມາພົບກັນມັນເປັນເລື່ອງບັງເອີນ ຈະໄປໃສມັນກະເປັນເລື່ອງຂອງຄວາມບັງເອີນ ແຕ່ສຳລັບອ້າຍຖ້າມັນເຊື່ອແລ້ວ ມັນກະຄືພົມລິຂິດ.
ມຸກຕະຫຼົກທີ່ນໍາສະເໜີໃນຮູບເງົາ ຄົນລາວເຮົາຈະເຂົ້າໃຈມຸກຫຼືບໍ່
ຜູ້ກຳກັບ: ເຂົ້າໃຈ 100% ເນື່ອງຈາກວ່າ ພາສາຂອງເຮົາສອງພາສາ ພາສາລາວ ກັບ ພາສາໄທ ບໍ່ໄດ້ຕ່າງກັນເລີຍ ແຕ່ຄວາມເຂົ້າໃຈຄື ຄົນລາວຈະເຂົ້າໃຈໃນມຸກ ແລະ ອາລົມຄວາມຮູ້ສຶກຂອງໄທ ເປັນສ່ວນໃຫຍ່, ມີມຸກທີ່ເຮົາສ້າງຂຶ້ນນິປະມານ 90% ໝັ້ນໃຈເລີຍວ່າຈະບໍ່ຄືໃຜ ເພາະລະຫວ່າງສ້າງຮູບເງົາ ບາງເທື່ອເຮົາກະຄິດມຸກສົດໆເລີຍ ເຫັນຫຍັງຢູ່ອ້ອມຂ້າງ ກໍເອົາຈາກຄວາມເປັນຈິງທີ່ຍັງບໍ່ເຄີຍຖືກເອົາອອກມາ ເຊິ່ງຮູບເງົາເລື່ອງນີ້ຖ້າແບ່ງສັດສ່ວນຈະເປັນ Romantic ຈະຢູ່ທີ່ປະມານ 40% ແລະ Comedy ຈະຢູ່ທີ່ 60%.
ກັງວົນກ່ຽວກັບ ເລື່ອງຮູບເງົາຂອງເຮົາອາດຈະບໍ່ມີຄົນເບິ່ງຫຼືບໍ່ ເພາະວ່າມື້ຮູບເງົາເຂົ້າໂຮງແມ່ນຕໍາກັນຮູບເງົາລະດັບໂລກ John Wick 4
ຜູ້ກຳກັບ: ກັງວົນຢູ່ ແຕ່ບໍ່ 100% ເທົ່າໃດ ເພາະຄິດວ່າ ຄົນເຮົາອາດຈະບໍ່ໄດ້ເບິ່ງເລື່ອງດຽວຕະຫຼອດທັງ Season ຕິ! ກໍຈະຕ້ອງມີຄົນມາເບິ່ງໜັງເຮົາແນ່ ແລະ ອີກຢ່າງໜຶ່ງ ໜັງເຮົາເປັນແນວໃໝ່ ຈະແຕກຕ່າງຈາກໄທບ້ານເດິຊີຣີ້, ການຮ່ວມທຶນລະຫວ່າງປະເທດ ເບິ່ງວ່າເປັນໂປເຈັກທີ່ ບໍ່ທຳມະດາ ເພາະວ່າກວ່າຈະມີອອກມາເລື່ອງໜຶ່ງທີ່ເປັນຮູບເງົາ ລາວ-ໄທ ຮ່ວມກັນກໍດົນໆເທື່ອໜຶ່ງ ເຊິ່ງຖ້າແບ່ງ Part ຂອງເລື່ອງທີ່ຜ່ານມາເບິ່ງວ່າ ເລື່ອງນີ້ອາດຈະໂປເຈັກບໍ່ໃຫຍ່ປານໃດ ປະມານນັ້ນ.
ຝາກຮູບເງົາ “ບັງເອີນຮັກ ຂ້ອຍຮັກເຈົ້າ Loser Lover”
ຜູ້ກຳກັບ: ສຸດທ້າຍກໍຢາກຝາກພີ່ນ້ອງຊາວລາວ ໃຫ້ມາຮ່ວມເບິ່ງຮູບເງົາເລື່ອງນີ້ ເຊິ່ງທີມງານ ແລະ ດາລານັກສະແດງທຸກຄົນ ຕັ້ງໃຈຫຼາຍໂດຍສະເພາະ ພະເອກກັບນາງເອກ ເຮົາຢາກໃຫ້ພີ່ນ້ອງ ສປປ ລາວ ໄດ້ເຫັນວ່າ ຢູ່ລາວກໍສາມາດຫຼິ້ນໄດ້ຄືກັນ ນັກສະແດງກໍສາມາດ Create ຕາມປະເທດໄທໄດ້ ປະເທດໄທກໍສາມາດຕາມປະເທດລາວໄດ້ ເຊິ່ງຈະເປັນໜັງທີ່ເປັນແນວໃໝ່ກວ່າທີ່ຜ່ານມາ ແລະ ຂອບໃຈທຸກຄົນອີກດ້ວຍ.
ສຳລັບມື້ສາຍຮູບເງົາແມ່ນກົງກັບວັນພະຫັດ ວັນທີ 23 ມີນາ 2023 ເປັນຕົ້ນໄປ ຢ່າລືມໄປເບິ່ງສະໜັບສະໜູນຮູບເງົາທີ່ຄົນລາວເຮົາຮ່ວມສ້າງ ແລະ ສະແດງ ຫຼາຍໆເດີ້.