ເມື່ອບໍ່ດົນມານີ້ ໄມໂຄຊັອບ ໄດ້ເປີດໃຫ້ຄົນໃຊ້ Bing ສາມາດສົນທະນາກັບ Chat Bot (ເຊິ່ງໃຊ້ລະບົບຈາກ Chat GPT) ໃຫ້ສ້າງຮູບພາບແບບໃດກໍໄດ້ ໂດຍອາໄສເທັກໂນໂລຍີຈາກ DALL-E ເຊິ່ງເປັນໜຶ່ງໃນລະບົບສ້າງຮູບພາບດ້ວຍລະບົບ AI ໂຕເດັ່ນໆຂອງໂລກ ເຖິງວ່າມັນຈະຈິນຕະນາການຮູບພາບອອກມາຈະຕ້ອງເວລາດົນພໍສົມຄວນ ແຕ່ກໍເປີດໃຫ້ທຸກຄົນໄດ້ໃຊ້ງານແລ້ວ.
ດັ່ງນັ້ນ, ອິນໄຊລາວເຮົາ ກໍເລີຍຕ້ອງໄດ້ລອງໃຊ້ງານ ແຕ່ຕ້ອງບອກກ່ອນວ່າ AI ໂຕເດັ່ນໆໃນໂລກຕອນນັ້ນ ລ້ວນຂາດປະສົບການໃນການຈິດຕະນາການຮູບພາບກິດຕະກຳຂອງຄົນອາຊຽນ ໃຫ້ອອກມາໃກ້ຄຽງກັບຄວາມເປັນຈິງ ຮູບພາບທີ່ອອກມາຈຶ່ງບໍ່ຖືກຕ້ອງປານໃດ ແຕ່ກໍເອີ້ນວ່າ ເອົາໄວ້ເບິ່ງແບບບໍ່ຕ້ອງເກັບລາຍລະອຽດຫຼາຍ ເພື່ອໃຫ້ AI ນັ້ນ ຄິດວ່າຮູບພາບທີ່ເຮົາຂໍໃຫ້ສ້າງນັ້ນ ໜ້າຈະມີໜ້າຕາອອກມາເປັນແບບໃດ
ໂຈດທີ່ເຮົາໃສ່ໃຫ້ Bing ສ້າງຮູບພາບນັ້ນຂຶ້ນມາຄື “ເທດສະການປີໃໝ່ລາວ ຜູ້ຄົນຫຼິ້ນສາດນໍ້າກັນໃນເຂດວັດ ພວກເຂົາໃສ່ຊຸດສີສັນສົດໃສ ຍິ້ມແຍ້ມ ບາງຄົນຫົວ ແລະ ມີຄວາມສຸກໃນເທດສະການປະຈຳປີເຖິງວ່າອາກາດຈະຮ້ອນກໍຕາມ” ເຊິ່ງຮູບພາບທີ່ໄດ້ ໂດຍລວມກໍສະແດງເຖິງບັນຍາກາດດັ່ງກ່າວ
ໃນລາຍລະອຽດ ຫາກເບິ່ງຂ້າມຮູບພາບຄົນທີ່ກຳລັງມ່ວນຊື່ນ ແຕ່ເບິ່ງສະຫຍອງຕາມແນວທາງ AI ທີ່ມັກສ້າງສັດສ່ວນ ແລະ ໜ້າຕາຄົນມາຜິດຮູບແບບແລ້ວ ຈຸດທີ່ເຊື່ອວ່າທຸກຄົນເບິ່ງແລ້ວຮູ້ສຶກວ່າແປກ ກໍຄືທຸກພາບນັ້ນຢູ່ພື້ນເຕັມໄປດ້ວຍນໍ້າຄືກັບນໍ້າຖ້ວມ ເຊິ່ງກ່ອນໜ້ານີ້ Midjourney ເຊິ່ງເປັນ AI ອີກໂຕໜຶ່ງ ກໍສ້າງຮູບພາບປີໃໝ່ລາວມາໃນທຳນອງດຽວກັນ ແຕ່ນໍ້າຖ້ວມຮອດແອວ ເອີ້ນໄດ້ວ່າ ຈົນຮອດມື້ນີ້ ຍັງບໍ່ມີ AI ໂຕໃດເຂົ້າໃຈເຖິງວັນປີໃໝ່ລາວຢ່າງແນ່ນອນ
ສຳລັບໃຜທີ່ເຄີຍໃຊ້ AI ສ້າງຮູບພາບປີໃໝ່ລາວໄດ້ແບບງາມໆ ຝາກແນະນຳຂໍ້ຄວາມໃຫ້ໝູ່ເພື່ອນແນ່ເດີ້ ຈະໄດ້ມີຮູບພາບແປກໆ ແບບນໍ້າບໍ່ຖ້ວມກັນແດ່.