ຈະມີຫຼາຍຄັ້ງທີ່ເຮົາຈະຄາດຄະເນຊີວິດການເປັນຢູ່ ດ້ວຍຄຳທຳນາຍຂອງນາງສັງຂານ ໃນແຕ່ລະປີ, ໂດຍປີນີ້ກໍເຊັ່ນກັນ ບຸນປີໃໝ່ລາວມື້ທຳອິດແມ່ນກົງກັບວັນສຸກ ແຮມ 9 ຄໍ່າ ເດືອນ 5 ເຊິ່ງເຮົານັບເອົານາງສັງຂານປະຈຳວັນສຸກ ເປັນນາງສັງຂານປະຈຳປີໃໝ່ລາວ ພ.ສ 2566 ຈ.ສ 1385 ແລະ ຄ.ສ 2023 ເຊິ່ງມີນາມວ່າ “ນາງ ກິມິທາເທວີ”.
- ເຄື່ອງປະດັບ ແກ້ວບຸສສະຣາຄັມ
- ສະເຫວີຍ ກ້ວຍນ້ຳເປັນອາຫານ
- ມືຂວາຖືພຣະຂັນ ມືຊ້າຍຖືພິນ
- ຂີ່ຄວາຍເປັນພາຫະນະ
ເກນພິຣຸນະສາດ: ວັນຈັນເປັນອະທິບໍດີ ບັນດານໃຫ້ຝົນຕົກ 500 ຫ່າ, ຕົກໃນຈັກກະວານ 200 ຫ່າ, ຕົກໃນປ່າຫິມະພານ 150 ຫ່າ, ຕົກໃນມະຫາສະໝຸດ 100 ຫ່າ ແລະ ຕົກໃນມະນຸສສະໂລກ 50 ຫ່າ.
ເກນທາຣາທິຄຸນ: ຕົກຣາສີວາໂຍ ນ້ຳຈະຫນ້ອຍ ພະຍຸໜັກ, ນາກຫຼິ້ນນໍ້າ 2 ໂຕ ຝົນຕົ້ນປີຫນ້ອຍ, ກາງປີພໍດີງາມ, ປາຍປີອຸດົມດີ ນາດອນ ແລະ ນາລຸ່ມ ດີ ທັງສອງຢ່າງ ຈະມີລົມພັດມາບາງຄັ້ງຄາວຈາກທິດທັງ 4 ຕາມລະດູການ.
ເກນທັນຍາຫານ: ຕົກມັຊຊິມາ ເຂົ້າກ້າໄຮ່ນາ ໄດ້ເຄິ່ງ ເສຍເຄິ່ງ ປະຊາຊົນມີຄວາມສຸກພໍປານກາງ ຫມາກໄມ້ດົກຫຼາຍ.
ເກນຣຸກຂະຊາດ: ໄມ້ສັກເປັນພະຍາ ເຂົ້າປາອາຫານຈະແພງ ໂລກຈະເກີດສົງຄາມ ບາງແຫ່ງດີ ບາງແຫ່ງຮ້າຍ.
ເກນກາລະໂຢກ: ວັນເສົາເປັນທຸງໄຊ, ວັນພຸດເປັນອະທິບໍດີ, ວັນອັງຄານເປັນອຸບາດ, ວັນສຸກເປັນໂລກາວິນາດ.